18/09/2025
మనం మనం బరంపురం!
"మా ఉద్యోగాలు మీరు కాజేస్తున్నారు... మీ దేశానికి పోండి. మా దేశం మాదే, మా ఉద్యోగాలు మా వాళ్ళకే", అంటూ మన దేశస్థులను అమెరికా, కెనడా, బ్రిటన్, ఆస్ట్రేలియా అందరూ ఏకరువు పెడుతున్నాయి. వీసా నియమాలు కఠినతరం చేస్తున్నాయి.
ఈ నాన్చుడంతా ఎందుకు... ఒక్క మాటలో చెప్పాలంటే, "చల్... ఈడికెంచి దొబ్బెయ్యండి!", అంటున్నాయి.
ఇహ... మనోళ్ళు గింజుకుంటున్నారు. "అట్లెట్ల అంటారు. America is a land of immigrants", అంటూ.
అంటార్రా భయ్... మనం అనట్లేదా!
బెంగళూరులో కన్నడేతరులను అడపాదడపా అదేగా అంటున్నారు.
"మా ఉద్యోగాలు, ఆంధ్రోళ్ళు గుంజుకుంటుర్రు. మా ఉద్యోగాలు మాకే కావాలే", అనే కదా తెలంగాణ తెచ్చుకున్నది.
ఇస్మంటి లెక్కలతోనే కదా... అప్పట్లో తమిళనాడు నుండి ఆంధ్ర విడిపోయింది.
మనం అంటే తప్పు లేనిది... పొరుగు దేశాలంటే తప్పెట్లా అవుతుంది?
అయినా కొన్ని నిజాలు మాట్టాడుకుందాం...
1. కనీసం నూటికి తొంభై శాతం మంది... విదేశాలకి పోయేది చదవడానికి కాదు. ఇక్కడేం చెయ్యాలో తెలియక. ఇంట్లో అమ్మనాన్న పైసలు పెడతారు. లేదా లోన్ తీసుకుంటారు. అంతే!
2. చాలా కొద్దిమంది మాత్రమే... మెరిట్ తో అక్కడ మంచి కాలేజీలలో సీటు సంపాదించుకుంటారు. అలాంటివారి వలన ఆ దేశానికి ఉపయోగం ఉంటుంది కాబట్టి... వారు ఉండడానికి పెద్దగా అభ్యంతరం చెప్పరు.
3. జ్ఞానం అట్లుంచితే... ఇంగితం కూడా ఉండకపోతే కాలదా? When you are in Rome, be a Roman అన్నారు. అంటే ఆ దేశపు కట్టుబాట్లను గౌరవించమని, ఆచరించమని. కానీ, మనోళ్ళు... నన్ను చంద్రమండలం మీద వదిలినా... ఇక్కడున్నట్టే ఉంటా. డీజేలు పెడతా. ర్యాలీలు చేస్తా. మా వీరోకి పాలాభిషేకాలు చేస్తా. బస్సులలో చెకింగ్ లేకపోతే టికెట్టు ఎగ్గొడతా. థియేటర్లో కాగితాలు ఇసిరి పెంట పెంట చేస్తా. ఇప్పటి వరకు కనపడని, లేదా నేను చూడని, దరిద్రం ఏంటంటే... గోడ మీద గుట్కా మచ్చలు.
మరి ఇలా చేస్తే వాళ్ళకి కాలదా? భారత దేశంలో అంటే పౌరసత్వం ఉంది కాబట్టి, నచ్చినా నచ్చకున్నా ఇలాంటి వేషాలు వేస్తున్న వారిని భరించాల్సి వస్తుంది. వాళ్ళెందుకు భరించాలి?
మొదట్లో US, Aus వెళ్లేవారు.
Aus లో దాడులు చేస్తున్నారని, మొత్తం గాలి అంతా US వైపు మళ్ళింది.
ఇప్పుడు, ట్రంప్ తాత హాట్... హుట్... అనేసరికి UK వైపు గాలి మళ్ళింది.
ఇప్పుడు UK వాడు కూడా కళ్ళు తెరిచాడు.
సో, అంచేత...
ఈ పొజిషన్ కి మన మెంటాలిటీనే కారణం.
అయినా... ముందు అనుకున్నాం కదా...
మనమేం తక్కువ కాదు. మనమూ ఇలాంటి వాదాలకు అతీతులం కాదు.
అందుకే...
మనం మనం బరంపురం!
- Ravi Teja Boppudi
