17/07/2025
ৰাহুল গান্ধীৰ অসম ভ্ৰমণ:
ছয়গাঁও, ১৬ জুলাই ২০২৫: লোকসভাৰ বিৰোধী দলৰ নেতা তথা কংগ্ৰেছ নেতা ৰাহুল গান্ধীয়ে আজি অসমৰ ছয়গাঁওত এক কংগ্ৰেছ কৰ্মী সভাত অংশগ্ৰহণ কৰি দলীয় কৰ্মীসকলক উৎসাহিত কৰে। কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খাৰ্গৰ সৈতে তেওঁ এই সভাত অংশ লৈ ২০২৬ চনৰ বিধানসভা নিৰ্বাচনৰ প্ৰস্তুতিৰ বাবে জিলা, ব্লক আৰু মণ্ডলৰ সভাপতিসকলৰ সৈতে আলোচনা কৰে। এই সভাত তেওঁ অসমৰ কংগ্ৰেছৰ কৰ্মীসকলৰ প্ৰশংসা কৰি তেওঁলোকক দলৰ মেৰুদণ্ড বুলি অভিহিত কৰে।
ৰাহুল গান্ধীয়ে নিজৰ ভাষণত কৈছে, “আপোনালোক সকলো কংগ্ৰেছৰ বাঘ-বাঘিনী। আপোনালোক কাৰো আগত ভয় নকৰে। আপোনালোক আমাৰ দলৰ মেৰুদণ্ড। কংগ্ৰেছৰ আদর্শ আপোনালোকৰ ডি এন এত আছে। দেশত এতিয়া এটা আদর্শৰ যুঁজ চলি আছে।” তেওঁ অসমৰ কংগ্ৰেছ কৰ্মীসকলৰ সাহস আৰু নিষ্ঠাৰ প্ৰশংসা কৰি কয় যে তেওঁলোকৰ অধ্যৱসায়ৰ জৰিয়তে কংগ্ৰেছ দলে অসমত ন্যায়, সমন্বয় আৰু সামগ্ৰিক উন্নতিৰ বাবে কাম কৰি যাব।
অসমৰ প্ৰতি ৰাহুলৰ দৃষ্টিভংগী:
ৰাহুল গান্ধীয়ে অসমৰ সাংস্কৃতিক আৰু ৰাজনৈতিক গুৰুত্বৰ ওপৰতো জোৰ দি কয় যে অসমৰ জনগণৰ সমস্যা আৰু আকাংক্ষা কংগ্ৰেছৰ এজেণ্ডাৰ মূল অংশ। তেওঁ অসমৰ জনগণৰ মাজত থকা বৈচিত্ৰ্যক শক্তি হিচাপে উল্লেখ কৰি কয় যে কংগ্ৰেছে সদায় এই বৈচিত্ৰ্যক সন্মান জনাই আহিছে আৰু সকলো সম্প্ৰদায়ৰ উন্নতিৰ বাবে কাম কৰিব। তেওঁ ২০২৬ চনৰ বিধানসভা নিৰ্বাচনত জনগণৰ সমৰ্থন লাভৰ বাবে কৰ্মীসকলক আহ্বান জনায় আৰু কয় যে কংগ্ৰেছৰ দুৱাৰ সদায় সকলোৰে বাবে মুকলি।
✍🏻শ্বাহিদ আল আমিন
