27/05/2026
ঈদ-উল-আজহা উপলক্ষে হাফলঙৰ স্থানীয় মছজিদ কৰ্তৃপক্ষৰ সৈতে জিলা প্ৰশাসনৰ গুৰুত্বপূৰ্ণ বৈঠক
ডিমা হাছাও টাইম
হাফলং। ২৭ মে
আগন্তুক ঈদ-উল-আজহা উৎসৱ উপলক্ষে ডিমা হাছাও জিলাত চৰকাৰী নিৰ্দেশনা আৰু বিধি-বিধান সম্পৰ্কে সজাগতা সৃষ্টিৰ উদ্দেশ্যে ডিমা হাছাও জিলাৰ জিলা আয়ুক্ত গায়ত্ৰী দেৱীদাস হ্যালিংগে আজি হাফলঙ আৱৰ্ত ভৱনত স্থানীয় মছজিদ কমিটিৰ সভাপতি-সম্পাদক তথা মুছলিম সমাজৰ প্ৰতিনিধি সকলৰ সৈতে এক গুৰুত্বপূর্ণ বৈঠক অনুষ্ঠিত কৰে।
বৈঠকত বিশেষভাৱে অসম গৰু সুৰক্ষা আইন (Assam Cattle Prevention Act) কঠোৰভাৱে কার্যকৰী কৰাৰ বিষয়ত আলোচনা কৰা হয়।
জিলা আয়ুক্ত গৰাকীয়ে মুছলিম সমাজৰ প্ৰতিনিধি সকলক অৱগত কৰে যে জিলাখনত গৰু জবাই সম্পূর্ণৰূপে নিষিদ্ধ আৰু এই ক্ষেত্ৰত আইন ভংগ কৰা সকলৰ বিৰুদ্ধে কঠোৰ ব্যৱস্থা গ্ৰহণ কৰা হ’ব।
জিলা আয়ুক্তৰ লগতে জ্যেষ্ঠ আৰক্ষী অধীক্ষক ৰিপুঞ্জয় কাকতি আৰু অতিৰিক্ত জিলা আয়ুক্ত শৌৰ্য্য শৰ্মায় জিলাখনত শান্তি আৰু সম্প্ৰীতি বজাই ৰাখিবলৈ কেইবাটাও বাধ্যতামূলক নিৰ্দেশনা প্ৰকাশ কৰে। লগতে জনোৱা হয় যে পশু বলিদানৰ গ্ৰাফিক ফটো বা ভিডিঅ’ কোনো অনলাইন প্লেটফৰ্মত শ্বেয়াৰ কৰাটো সম্পূর্ণৰূপে নিষিদ্ধ।
বৈঠকৰ অন্তত মুছলিম সমাজৰ নেতৃবৃন্দই জিলা প্ৰশাসনক আইন-শৃংখলা ৰক্ষাত পূৰ্ণ সহযোগিতা আগবঢ়াই ডিমা হাছাও জিলাজুৰি শান্তিপূৰ্ণ, সম্প্ৰীতিৰ আৰু আইন সম্মতভাৱে ঈদ উদযাপন নিশ্চিত কৰাৰ আশ্বাস প্ৰদান কৰে।
DIPR Dima Hasao
