Agape weekly (2026)

27/11/2018

TUOLSUNG CHANCHIN
Vol.13 Issue No. 32 November 19 - 25, 2018

** Tarik 5th December, 2018 hin sawrkara inthawk chawl puonga lo umna le inzawmin Silver Jubilee ropui taka hmang tum a ni a, NC Hills (Dima Hasao) ah Hmar chengna khuo tin ah hi Sikpui Ruoi ropui taka hmang tum a nih. Muolhoi a khawm ropui taka hmang a ni ding a ni a, programme hai induong fel vawng a ni tah. Hi huna Chief Guest ding chu- Pu Sum Ronghang, HAD Minister, Guest of Honour: Pu Debolal Gorlosa, CEM, NCHAC, Functional President: Pu Ngamrothang Hmar, EM, NCHAC, Chief Host: Pu : L. Hlima Keivom, MAC, NCHAC.

** Assam sawrkar chun Indigenous People Forum (IPF) hai inbiekpuina nei dingin a hung fiel. Amitabh Rajkhowa, Deputy Commissioner, Dima Hasao fe thlenga fielna lekha lo dawng dungzuiin ei hma 7 December, 2018 chawhnung dar 3:00 khin Minister, Finance, PWD etc. Himanta Biswa Sarma chun IPF thuoituhai chu inbiekna nei pui a tih. Thu dawngna in a tarlang danin hi inbiekna hin tuk*m Krismas hmain iem ani tak ra tha an suo ngei beisei a nih.

** Tarik 23rd November, 2018, khan Pu Lalchawisang Khawbung S/o Upa Sumneikhup Khawbung, Boro Muolkoi, N.C.Hills khuoa cheng chu khawhrelo a umin anrang thei anga Guwahati Medical College panpui nghal ani a, Doctor han theitawp insuo in an enkawla amiruokchu vangduoithlak takin san hman ta loin zingkar dar 7: 30 vel khan ei lo the tah. Pu Lalchawisang Khawbung hi 5th Assam Commando Battallion a thawk Havildar ani a, Guwahati a posting niin an suongkuo a cheng ani bawk. A ruong hi an veng Boro - Muolkoi tieng vuiliem dingin Guwahati an’thawk panpui a nih.

** Liemtah tarik 17 Novemeber, 2018 zing dar 11:00 bawrvel khan Tv. John Lalbeisei Varte chun chatuon ram a mi lo inlawisan tah. Ama hi Biekin ngaina mi ve tak a ni a, a bik takin Muolhoi EFCI Biekin lem chu a ngaina a, Krismas / Good Friday etc. hai hin hungin inkhawmnaa hai dam a thang hlak, khawsawt a suk um hle a nih. Hi ni vek zan dar 9:00 bawrvel khan Pi Thanglienkim Buongpui (86) M/o. Nk. Lalramhnem Buongpui chun chatuon ram tieng a mi lo inlawisan ta bawk. Ama hi July, 2018 thla lai vela a nauhai hung kan a um chu taksa bawrsawmna’n a tlakbuok zui pei ta a nih. A ruong hi Rengkai, Churachanpur tieng phur kaiin Thawtanni khan pasal a thlan kawla phum a lo ni tah. Lunsun sungkuo hai Pathienin thlamuongin um pui mawl raw se.

** Tarik 21 Nov, 2018 zan khan CH Khawthlang Memorila Hall, Muolhoiah HSA Assam Hills JHQ chun Assam Public Service Commission huoihawtna hnuoia CC Examination, 2016 result suokna a hlawtlingna chang hai chu chawimawina hunser a hmangpui. Hi hunser an hmangna a hin Hmar Women’s Association (HWA) N.C. Hills & Karbi Anglong Region khawmin hlawtlingna changhai chawimawina thucha le Hmar Thangsuopuon, Muffller inhlanna an nei bawk. Programme hunsera APSC hnuoia hlawtlingna chang hai chu lawmlutna le lawmpuina thucha President Pu John Mark Pena in a hril a, hlawtlingna changhai chawimawina thilpek inhlan a ni zoin tawngtaipekna Rev. Jubileethang Hrangchal in a nei a, chun Rev. Kawlthanglien Infimate infuina thucha hrilna a nei bawk. Hi zana hin Muolhoi khawsungah mi pali hlawtlingna chang hai baka Nk. Joy Christina Ngamlai, ACS D/o Pu Thangpuia Ngamlai, Fiangpui le Nk. Pinky Kimneinem Changsan, ACS, D/o Pu Suonmang Changsan, Songpijang hai kuoma khawm chawimawina inhlan a ni bawk.

** Tuta kar Ningani khan Harangajao ah Police motor changsuol ah mi pahni in hliem an tuoka, thina tuok em chu an um nawh. Hliem tuok pahni laia na zuol lem chu Chunglien Lhoujiem (47) chu Harangajao Public Health Centre ah khawsung mi haiin an thak lut. Hi motor hin dawr pakhat bawin nasa takin a suksiet. Hi motor khaltu hi police dept. a thawk ve tho niin driver reng khawm ni lo a nih.

** Date 24th November (Inrinni) zing dar 7:30 khan HSA Jt. Higher Sec. and Colleges Unit hai chun Unit puitling a hlangkai an nina K*m 1 na (anniversary) chu CH. Khawthlang Memorial Hall ah lawmna hunser hmang anih. Hi huna hin Pu John Mark Pena,President, HSA Assam Hills Jt. Hqrs. in HSA flag keipharna a nei zo in thu le hla hai ngaithlakna nei a nih. HSA JHSC Unit hai hi Unit a hlangkai an ni hma khawma k*m tam taka inthawk ta khan thuoitu tha tak tak neiin kawng tinrenga hma nasataka lo la hlak an ni a, damnaw inrik, thisen mamaw tam tak hai chu thisen pein an lo thangpui hlak bawk a nih.

** Songpijang road chu a khuo mi haiin Zirtawpni khan Krismas a hnai tak leiin siemthatna an nei leiin motor inlawn chu Thawtanni zingtieng chen an khap. Songpijang Churches Fellowship hai chun thusuok siemin local Biekin popo hai chu khuo sunga lamlien hai chun siem dingin chanvo siemin, sum khawm a tul ang seng thawin sukfaina le siemthatna nei dingin thu an suo a nih.

** Nov. 23 (Zirtawpni) khan C.H Khawthlang Memorial Hall, Muolhoi, Haflong hmuna Hmar Artiste Association N.C.Hills & Karbi - Anglong Joint Headquarters k*m 2018 -2020 sunga thuoitu dinga inthlangna nei a ni a, hieng a hnuoia hai hi lunginruol taka thlangtling an nih.

1. President : Pu Lalzarlien Joute
2. V. President : Pu Lalnunthar Amo
3. General Secretary : Pu George Mang Neishiel
4. Asstt. Gen. Secy. : Tv. Lalropui Tuolor
5. Fin. Secy : Pu Lalzairem Khawbung
6. Treasurer : Pu. Samuel Lalhma\huoi Tuolor
7. Secy. Info. Media
& Publicity : Tv. Hranghmingthang Hrangchal
8. Secy. Public Relation : Tv. Albert L. Pangulate

Hi inthlangna hi Pu L.H. Thiek, Presiding Officer keiruoina hnuoia nei a ni a, Tv. James Selate, Tv. Simeon L. |hiek le Pu. Little John Joute hai chun Election Secretary sin an thaw a, Tv. Sumneikung |hiek chu observer a hmang a nih. Thlangthara umhai Oath- Taking-na Upa K. Bhuhril in an nei tir nghal bawk a nih.

** Hmar Bible Golden Jubilee Muolhoi Public Ground ah December 1 & 2, 2018 a hmang ding le inzawmin inbuotsaina chu a fe mup mup zing a, Celebration Committee hai chun thil tul dang dang an tintuo zo thawkkhat ta a, Souvenir Board hai khawm zan imu hmu dukdak lova sinthawin Inrinni chena hin Press a print thei ta dingin an inzo fel beisei a nih. Chun khing tieng ah Sikpui Ruoi Silver Jubilee Celebration khawm an inzo fel tep tep. Programme induong fel an ta a, mipui hmu thei dingin Gift Coupon tieng khawm 1st Prize (Scooter) lo pholang lawk tan an ta bawk.
Zirtawpni zing tieng khan ‘Sikpui Nite’ mawphurtu bik dinga ruot Valupa le VDP Joint Meeting ah tuolsung soloist hai khawm ruotna an nei fel tah. Hienga hnam huopa K*t hmang dinga inbuotsaina le inzawma mipui hriet ding thu pawimaw Publicity tienga inthawk thu puong hai khawm hi k*m tawp School exam chawkbuoi naw zawnga hun awl len lai le lekha tiem hun naw lai inchan hram hram tum a ni a, vantlang sawr ding / hriet tlang dinga pawimaw ni hran lo risie naran ruokchu a thei chena inkhuokhir tum a nih.

06/11/2018

TUOLSUNG CHANCHIN
Vol.13 Issue No. 29 Oct. 29 - Nov 4, 2018

** Tulai hnai el khan Pu David R. Neingaite APS S/o. Upa H.L. Sanga Neingaite, Muolhoi le Pi Marlyn Zawlsangmawi APS D/o. Pu Thangchuoilo Khojol, Muolhoi hai chu Deputy Superintendent of Police (Junior Grade) a’thawk Additional Superintendent of Police, Assam Police Service (Senior Grade-II) ah hlangkai an lo ni tah. Ei lawmpui taluo

** Pi Sungkim Darngawn hai chun tarik 2-11-18 khan Car i10 an lo inchawk nawk tah. Chun Pu Thlenga Khojol khawma Bolero ZLX a tulna naa a khal khuol ding a lo inchawk bawk. Thilthar nei hai Agape Ed. Board chun a lawmpui hle.

** Miss Exclusive and Extraordinary 40 Plus Contest 2018 New Delhi hmuna 25-28 Oct. 2018 sûnga nei a khan India khawpui huopa State dang dang an thawkin mi sawmhni 20 Finalist an thlang suok lai chun Ms. Lanunhlim Hmar khawm thang vein, ama hin Miss Charming Title chu a dawng ve phak a nih. Hi Contest-a a thangna le inzawm hin HYA Joint Headquarters NC Hills chun a fe tawmin tawngtaia inthlana le hlawtling taka a hung kir nawk huna hin New Haflong Station ah ropui takin an lo hmuok bawk a nih. Ms. Lalnunhlim Hmar (Kim ti a hriet lar) hi HYA Joint Headquarters ah kûl a taia inhmang Member active êm êm a na, chun ama hi Medical deptt. a thawk lai zing a nih. Tuhin Muolhoi Kalibari Road a khawsa a nih. Ei lawmpui hle.

** Tuta kar sung khan EFCI N. C. Hills Presbytery le Muolhoi EFCI Local thuoituhai chun Guwahati hmuna ram an inchawk tawm enfelna le in bawl dan ding entlangin Guwahati-ah an fe a, sin pawimaw le tul danghai la hung bawzuiin Upa R. S. Puruolte chu a la hung chambangin zirtawpni khan a lo hung inlawilut nawk tah. Hi hmuna hin Golden Jubilee Building mawitak inthut dinga rel a lo ni ta bawk a nih.

** Tv. Freddie Lalsawmdawl |hiek le Nk. Esther Lalsiemfel Ralsun hai chun hung tlung ding November 9, 2018 (Zirtawpni) PCI Biekin, Muolhoi-ah Kohran dan thienghlimin Pastor k*ta innei an tih. Nk. Esther Lalsiemfel hi Pu Lalvenglien Ralsun (Agape chairman) a nau mitlum a ni a, November 8 hin inthlana hunser buotsai ning a tih.
Bar-thla ei chuongkai ta leiin nupa tuok thar insiem ding iemani zat an um nuol thu hriet a ni a, thalaihai lai kohran dan thienghlim taka innei nuomna a hung pung pei hi lawm a um hle. Nupa tuok thar hung ni mekhai malsawmna tamtak dawnga Kristien sungkuo tha indintu ni dingin ditsakna insangtak ei inhlan nghal.

** Tuta kar sung Oct. 26 khan Ramkuiwangbe (Ramkui) Jeme chu NITTE Mangaluru, Karnataka University chun ‘Doctor of Science’ chu a lo inhlan. Hieng ang Doctor of Science hi Social work le social activity tienga sin thaw thahai kuoma inhlan hlak a nih. Ama Dr. Ramkui Jeme hi District Primary Education Officer (PEO) N. C. Hills Autonomous Council hnuoia sin lo chel ta le retired ta a nih. Chun, ama hi Heraka Association All India a khawm President sin chellai a ni bawk. N. C. Hills sunga Jeme hnam hai lai doctorate degree hmu hmasa pawl nia hril a ni bawk.

** N.C.Hills Indigeneous Peoples Forum (IPF) in hung tlung ding November 5&6 sung bandh huoihawt dinga a ti chu vai puja ding leiin \hul hri a ni a, amiruokchu hi ‘Indefinite bandh’ hi tarik 13 Nov. 2018 anthawk nei ni dingin thulakna chun a suklang. IPF chun Nov. 10 bo hma ngeia sawrkarin inbiek nawk dinga thu a lo tiem angin a sukpuitling ngei an ngiet a nih.

** Tarik 29.10.18 (Thawtanni) khan Umrangsuo hmuna Sengya Tularam Senapati lima siem Statue lungphunna chu Debolal Gorlosa, CEM NCHAC chun a lo nei tah. Ama ruol hin Local MLA le Chirperson Ranu Langthasa, EM, le mipui thenkhat hai an thangve in an uop ve a nih.

** Supreme court in India mi le sa taphawt chun AADHAR card siem dinga thu a lo rel le State dang haiin siem zo ta hai sien khawm eini Assam chu NRC leia la siem zo lo a ei um chu, tuhin mitinin siem thei dingin thusuok a siem fel tah. Dima Hasao district sunga centre 28 thlang dawk a ni a. Chulai chun Haflong area sunga hmun 5 um in hieng (1) N.C.Hills A/c office,(II) Deputy Commissioner Office, Haflong (III) Town Committee Night Shelter House, (IV) Sericulture Technical Office, Sarkari Bagan, (V) BDO Harangajao ITDP Block haia mani document pakhatak original chawia ngaiven thei a nih tiin District Commissioner chun thusuok an suo.

**Assam Education Dept chun Inchukna tieng panga hma a sawn nawk theina ding tiin Gunatsav Phase II chu District 17 a Inrinni tarik 31st November, 2018 sung khan harsatna taluo um loin zofel a lo ni tah. Dima Hasao District a khawm 1-3 sung neiin a tawp ni ding 3rd Nov, 2018 a nih. Assam bandh ding leiin Naresh Gosh, IAS Principal Secretary NCHAC chun chawhnung-tieng khan a hun hi sawn dingin order insuo in a lo uma sienkhawm a hnungah fe thlengpui nawk ding thu Aruna Rajoria IAS, Mission Director, SSA Assam chun Order insuoin felfai taka zotheiin a um. Hi thil leia hmun tum tuma mawphurna nei Muolhoi khawsunga inthawka suokhai khawmin khuo an lo hung inlawi nawk mek tah.

**Hmun tum tuma um Kuki hnam hai chun liemtah November 1, 2018 khan ‘Chavang K*t’ hmangin hlim takin hun an hmang. Chavang k*t vawi 30-na chu Assam rama Kuki hnam headquarter Songpijang (Haflong) a khawm ropui taka hmang a ni a, hi huna hin Kulendra Daulagupu EM chu Chief Guest-a hmang a ni a, Chief Host dingin Asst. GB Songpijang Village L. M. Chongloi chu hmang a ni bawk. Chief Guest in a thuhrilnaa chun, hun liemta hai enin Kuki le Dimasa hnam hai chun inlaichinna tha tak an nei a, chu inlaichinna tha chu kengkaw pei dingin an fui a, lawmthu a hril bawk. Chun, Council CEM in an khuoin an pawimaw an ngiet hai chu a ngaituo ding thu a hrillang sa bawk. Chavang k*t hi ei district sunga khawm holiday-a puong a ni bakah Assam ram sunga ding khawma ‘restricted holiday’ a puong a nih.

24/10/2018

TUOLSUNG CHANCHIN
Vol.13 Issue No. 27 October 15 - 21, 2018

** EFCI Kohran rorelna khawlpui Executive Council 99-na, Pastoral Committee, CKTP Board meeting le CKNP Board meeting Shillong-ah Oct. 16-18 sunga nei chu tluong taka nei a ni a, Palaihai khawm damtakin an hung tlung nawk tah. CKTP Board meeting dungzuiin Inter-Presbytery visit 2019 ah N.C.Hills PKTP chun Darchawi PKTP kanna nei an ta, Pilangkata (Guwahati) in N. C. Hills hung kan bawk an tih. Chun, NEICCYA Gen. Conference 2019 May thla, Gosaigoan, Kokrajhar hmuna um dingah EFCI kohran palai 30 tir dinghai laiah N.C.Hills PKTP khawm thang veng an tih.

** Council chun Child Evangelist 1 lak belsa dingin a rel a, chun Pastor thenkhat an posting hmun sawnkuol an um nuol bawk.

** CKNP meeting dungzuiin March 2019 khin Pastor nuhmeihai po po puola Seminar, Churachandpur-ah buotsai tum a nih. Meeting huna hin CKNP Committee member laia mi Pi Dr. Vanrammawi Pakhuongte (Secretary) le Pi Hnemi Tuolor (Asst. Secy.) hai chu an thawkna anthawk full pension an lo hmu ta leiin lawmpuina thilpek le citation inhlan an nih.

**Hung tlung Oct.28 (Pathienni) EFCI kohranin thalai Ni (KTP Day) a hmang ding le inzawmin Muolhoi EFCI KTP khawmin hi huna hin tuk*m sunga KTP Group hai ‘One Day Wages’ sumbit rawn tak lawmman peksuok ning a tih. Chun, k*m danga la um ngailo k*mbula inthawka KTP Day chena thalai laia hla inchuk taima tak hai lawmman LMC in a buotsai chu peksuok ni bawk a tih. Hi lawmman hi hla pawl part tin soprano, contralto, Tenor, Bass haiah a taima tak hai chu a hran sengin pek a ni ding bakah KTP Committee members laia hla inchuk taima tak hai lawmman a hrana pek ni bawk a tih.

** Muolhoi EFCI Local Committee chairman lo ni tah Upa G. Thangbuong chu medical check-up le a tuhai kan malam dingin inrinni zantieng dar 7 bawrvel hin United Kingdom tieng pan dingin Guwahati a’n thawk vuong suok a tih. Upa G. Thangbuong hi lung (heart) tieng harsatna nei leiin k*m 3/4 vel liemta khan Operation hai chen lo thaw niin inen that a tul nawk ta leia inzin suok a nih. Damna tha tak neia a hung inlawi nawk vat theina dingin tawngtaina’n lo san ei tiu.

** Saron Youth Club huoihawtna hnuoia 1st Champion Trophy (Knockout Football Tournament) MSA Playground Mahur-a inkhel felai mek chu tarik 20.10.2018 (Inrinni) hin Final & Closing Ceremony nei ning a tih. Hi huna hin khuollien Tv. David Keivom, President NCHISF le Guest Honour Pu John Mark Pena, President HSA Assam Hills Jt. Hqrs. hai an nih. Final match hi Mahur Garden le P.Leikul haiin inkhel an ta, Champion hai hin Rs. 50,000 lawmmanin dawng an tih.

** Tarik 19th October, 2018 khan IPF Meeting pawimaw tak ISF Office, Haflong ah nei nih. Hi huna hin Assam sawrkar le inbiek fe meka um demand chungchang hai hriltlangna nei a nih. Karbi Inpui haiin IPF demand an thlawp thu le tha taka IPF inzawm khawmna hnuoia an thang nuom thu hai baka IPF district siem ding hin an thang ngei nuom thu an hril chu hriltlangna nei a ni le inzawmin anni inhmupui dingin fiel an ni angin Umrangsoah IPF palai hai le Inpui President tin fe dinga ti a nih. Chun hi huna hin Sangbar area-a GBs popo le thuoitu hai leh inbiek tlangna nei nghal dinga ti a ni bawk a, remruotna lo siem dingin Biate Inpui hai mawphurna pek an nih. Assam sawrkarin ei district pahnia the ding anga thu uma hin IPF Demand Map ang taka IPF mipui le khuo popo district pakhat hnuoia um ngei ei dit zie inentirna in Mass Rally huoihawt dinga ti a ni bawk.

** Liemtah 18.10.2018 (Ningani) khan Muolhoi UPC(MZ) kohran chun ‘One Day Mess’ ruoi inhnik tak an buotsai chu mi tlawmngaihai zarin a hlawk khawm sing le sang li lai zet an hmu suok thu lo dawng a nih.

** Tuta kar sung hi kohran tin deuthawin Vai Puja (sawrkar chawl) remchanga lain inkhawmpui an nei deu sup sup. PCI kohran, UPC (NEI), AGEI hai chun Muolhoi-ah an nei a, ICI kohran Nuhmei Pawlin Doiheng-ah, EFCI N. C. Hills Presbytery sunga NSSD biel tum tumhai khawmin Oct.19-21 sung hin Huonveng, Saron, Rekhaw, Hmunthazau haiah an nei. Chun, EFCI kohran hnuoia Presbytery iemanizat chun hi hun sung hin |halai khawmpui an hmang bawk a nih.

**18th October, 2018 (Ningani) khan C. H. Khawthlang Memorial Hall, Muolhoi, Haflong hmuna HSA Assam Hills Joint Headquarters 21st Conference -cum- Meritorious Award 2018 Programme phuisui taka hmang a nih. Hi huna hin zing dar 10:30 AM a hin Rorelna (Conference Session) neiin Unit le Block tina anthawk Palai Mi- 79 fekhawm a nih. Zan dar 7:00 PM ah Meritorious Award Ceremony Programme hmang a nih. Chief Guest (Khuollien) Pu Lalringum Sanate AES, Deputy Superintendent of Excise, Lakhipur Sub-Division, Cachar, Assam & Assam State Co-ordinator HSA GHQ le Guest of Honour (Khuol Inzaum) Tv. Obeth Darngawn, Fishery Development Officer, Govt. of Assam hai hmang an nih. Hi huna hin inchukna tienga thaw tha zuolhai HSCL (Cl-X) 75% & above, HSSLC (Cl-XII) 70% & above, TDC le PG First Class a Passed taphawt le Professional Line hlawtlingna chang Mi-31 (Sawmthum Pakhat) hai kuomah chawimawi Memento inhlan an nih. Chun k*m dang ang bawkin a) Lt. V. L. Lianjauva Memorial Award (HSLC Topper) Tv. Ramhluolien Infimate, Haflong s/o. Rev. Kawlthanglien Infimate, b) Lt. K.S. Pulamte Memorial Award (HSLC Hmar MIL Topper) Nk. Lawmnakim Tuolor, Buolmuol, Harangajao d/o. Lalhumhim Tuolor chun (HSSLC Hmar MIL Topper) Nk. Lily Grace Faihriem, Muolhoi, Haflong d/o. Macdonal Faihriem hai kuomah inhlan an nih. Lt. Darbiekthuom Hmar Memorial Award (HSSLC Topper) a vawikhatna dingin Pi Sungkim Darngawn le a sunghaiin an Pa hminga an hung buotsai chu Nk. Lalduotkim Hmar, Diphu d/o. Lt. Hmusuok Hmar kuomah inhlan a ni bawk. HSA Choir le artiste dang dang hai anthawk hla mawi tak tak ngaithlak a nih. Inchuklai le sin zawng mek hai ta dingin Pastor James Lalremthang in tawngtaipekna (Pastoral Prayer) a nei bawk.

** EFCI Rengram biel NSSD conference Rekho-ah Oct.19-21 sung hmang a ni a, hi huna hin thuhriltu dinga Pi Lalthamawi Pudaite (w/o. Rev. Lalsiemvel Pudaite, PS) khawm ruot a nina angin Inrinni hin hi inkhawmpui hmang dingin an inthawk suok.

** Pu Abhijit Thoasen le Pi Lalthazo (Khawbung) hai nupa chun tuta kar sung khan Maruti Alto K10 car thar hlawk el an inchawk chu Shillong-ah Rev. C. Kawldinglien in Pathien kuoma inhlanna a nei. Anni nupa hi Muolhoi EFCI kohrana inlawi an nih. Agape Board in a lawmpui hle.

16/10/2018

TUOLSUNG CHANCHIN
Vol.13 Issue No. 26 October 08 - 14, 2018

** Tuta kar thawtanni khan Pu Chungkhawhen Keivom (65) chu a sunghai leh rama an fenaah tluin chatuon ram a mi lo inlawi san tah. Ama hi taksa hrat lo hrim a ni a, thisen sang (high pressure) leia tlu nia ring a nih. A tlak lai hin a kuoma um an um naw a, a sanghaiin a ri an hrieta an hang ngaiven chun biek thei a lo um ta naw a nih. Ama hi Khuongluong khuoa pieng le seilien a ni a, hun iemani chena inthawk khan Muolhoi-ah in neia lo khawsa a ti tah. Muolhoi EFCI Kohrana khawm k*m 1995-98 sung NSSD teacher sin lo thaw ve a nih.

** Tarik 12.10.2018 (Zirtawpni) zan dar 9:10 bawrvel khan Muolhoi Kanaan venga cheng Pu Dhan Bh. Chetri (85) chu Ashma natna leiin Haflong Civil Hospital-ah chatuon ram a mi lo inlawisan tah. Ama hi 1992 khan Boildura PCI Biekinah Rev. Somnath k*ta Baptisma lo chang niin 1994 anthawk Kanaan EFCI Kohrana inlawiin a thini chen hin kohrana mi tangkai tak a nih. Nau malsawmna nuhmei 11 le pasal 4 a nei a, a nauhai lai hin Pastor le Missionary khawm an um. Biekin inkhawm taima, zing tawngtai thul ngai lo mi a nih. A ruong hi inrinni hin Muolhoi thlanmuolah Pastor Zodinglien in a vui. Lusun sungkuohai ei tuorpuiin Pathienin thlamuongin umpui raw se.

** EFCI N. C. Hills Presbytery huoihawtna hnuoiah October 11-14, 2018 sung hin Harangjao Biel, P. Hnachangzawl EFCI Biekinah “Gospel Camp” nei a nih. Rev. Sakhuolien Songate, EAL chu Speaker niin ama thangpuitu dingin Pastor-hai le mi thahnemngaihai an fe bawk. Hi Camp-a hin mi 70 bawrvel an lut nia chanchin lo dawng a nih. Hi Camp neina ding le inzawm hin Rev. Lalsiemvel Pudaite, Upa R. S. Puruolte, Pu Zokhawsiem Joute le Pastor James Lalremthang hai khawm Camp-a an mamaw dinghai phurin an zu fe a, zirtawpni khan an lo hung nawk tah.

** Dinthar EFCI Kohran chun liemtah 12.10.2018 (Zirtawpni) khan an Building fund dingin “One Day Mess” an buotsai a, bufak hunlai hin ruo intan lovin sur zing sienkhawm Lalrama mi thahnemngai tamtak ruoi kiltu le a hmun hung kher lova thangpuina sum hung petu tam tak an um.

** Muolhoi & Lower Muolhoi Biel EFCI NSSD chun inkhawmpui vawi 17-na chu hung tlung ding October 19-21, 2018 sung hin Huonveng-ah nei an tih. Hi huna hin inruolsiekna item chi dang dang khawm nei bawk an tih. Chun, biel dang danghai khawmin hi huna hin NSSD Conference nei an tih.

** Pu Joe Sangneikung Khobung, Sub-Inspector (SI) S/o (L) Ngurneikhup Khobung, Muolhoi, Haflong, tuta Dokmoka Police Station, Assam a Officer In Charge (OC) sin thaw lai zing chu Assam Police hnuoia Police officer iemanizat Inspector a kaisang ding an thlang dawk hai lai thang vein tuhin PTC Dergoan ah thla khat sunga dingin promotion training ah fe'ng a tih. Ama hi Assam rama Police station hmun hran hran hieng Kheroni, Bokajan, Jerikinding le Mailoo a hai OC sin lo thaw ta hlak a nih. A kaisangna hi ei lawmpui hle.
Ama hi thu le hla inhnikmi tak niin, "A rem naw maw" ti lekhabu (fiction) khawm lo ziek ve tah a nih. Chun hun iemanichen 'Nganban Thlifim' chanchinbu ah Editor sin a lo thaw tah bawk a nih. Chun, ei chanchinbu Agape ngaina em ema lo thangpui ta hlak a ni bawk.
A umna taphawt ah mi tam takin ei tangkaipui el bakah Khawtlang le Kohran ta dinga mi tangkai em em a nih. A biktakin Karbi Anglong sung EFCI Pastor le Missionary hai ta dinga innghatna ban pawimaw pakhat a ni bawk. Hmatieng peia khawm ram le hnam ta dinga mi tangkai ni pei dingin ei ditsak.

** Tuta kar sung khan Hmar Students’ Association, Harangajao Block chun a awpna ruom sunga Hmar nauhai hmasawngna ding ti ngaituona’n ‘One Day Education Awareness Programme’ huoihawtin Ditokcherra, Hmunthazau le Boro-Muolkoi khuoa hai hlawtling takin nei a nih. Hi Awareness programme hmangnaa Resource Person hai le an thupuihai chu - 1. Manners & Etiquette: Nk. Robony Khawbung (Asst. Professor of Hills Degree College) 2. Basic Education & Technology: Pu Rothan Vankal (Asst. Teacher of Huonveng LPS & Secretary, HSA Harangajao Block) 3. Hmar MIL: Pu Lalnghatsang Lungtau (Cluster Co-Ordination under SSA & Committe Member, HSA Harangajao Block). Hi programme hmangna thua block thuoituhai fe le hungna motor sengso popo chu Pu Ngamrothang Hmar (EM of NCHAC) in a tum pek a nih.

** EFCI Diphu KTP Unit hai chu Oct. 13&14 (Inrinni le Pathienni) hin Muolhoi EFCI KTP kan dingin mi 17 an hung inthawk suok a, Bus 1 le motor dang 1 hung thuoiin ruopui hnuoiah damtakin an hung inrinni zantieng hin an hung tlung a, inkantuo programme hlimtaka hmang beisei a nih.

** EFCI Kohran thuoituhai chu October 18&19 sung hin Shillong hmunah Council nei dingin fekhawm an tih. Chun, CKTP Board meeting khawm Oct. 17 hin Shillong hmunah nei ni nghal bawk a tih. Hi hun hmang ding hin N. C. Hills Presbytery anthawk khawmin thalai thuoituhai le Presbytery thuoituhai fe dingin an inbuotsai zing. Tawngtaina’n lo san ei tiu.

09/10/2018

TUOLSUNG CHANCHIN
Vol.13 Issue No. 25 October 01 - 07, 2018

** Tuta kar sung thawleni khan Muolhoi EFCI Kristien Nuhmei Pawl chun One Day Mess buotsaiin mi tlawmngai hai zarin a hlawk Rs. 28,000/- lai zet an hmu.

** Muolhoi tleirawl tulai football inkhelna tieng panga ei suongvawr Tv. Hosea Tuolor chu tuta thla tarik 22 vel khin Subroto Cup, Assam State hminga inhnel dingin India khawpui Delhi a pan ding a nih. Ama hi Pu Tuovung Tuolor, Muolhoi (Kannan veng) a naupa a ni a, NortEast United Football Club, I-League Under-15 a inkhel phak ding Hmar tlangval ei nei sun a la nih. Hma tieng peia hming inthang luoi luoi thei ding khawp hlawtling pei dingin ditsakna ei inhlan.

** Hmun dang le khawpui danghai ang bawkin Haflong khawpuia khawm Local Taxi service tan a lo ni tah. Hi taxi service hi district sung po poah khuolzin mihai hmang thei dinga riruong a ni a, chubakah Haflong sunga pickup, dropping, inchuklaihai thak lawn le thuomhnaw thakveltu ding khawma ruoi thei ding a nih. Ei hrietthiem dan ding chun khawpui danga Ola le Uber hai ang deuva hmang thei ning a tih. A hmang nuomtuhai chun 7086226097 / 8876110529 haia hin biekpaw thei ning a tih.

** Hun iemani chena a’nthawka National Small Holder Puoltry Development Trust a Poduction Manager sin lo chel tah Pu Dr. Titus L. Thiek chu APSC hnuoia Veterinary & Animal Husbandry, Govt. of Assam a Veterinary Officer ni dingin thlang suok a lo ni tah. Ama hi tuhin Dibrugarh, Assam hmuna posting mek a ni a, sienkhawm a sin thar a zawmna hmun ding ruok chu hril thei a la ni nawh. Ama hi Retzawl khuo mi a nih. A hlawtlingna hi Agape khawmin a lawmpui hle.

** Tuta kar Sept. 5 (Zirtawpni) khan North Cachar Hills Indegenous Students Forum(NCHISF) hmalakna zara MsDP Scheme sum hmanga bawl Ngaibantlang Presbytery Hostel zofela um chu hawngna nei a lo ni tah. Hi Hostel hawngna hi Amitabh Rajkhowa (Deputy Commissioner) in a nei a, hi hun hi hnam thuoitu pawimaw tak tak David Keivom (President NCHISF), Rosang Hrangchal(President Hmar Supreme House), John Mark Pena (President HSA joint HQ), Paolomthang Vaiphei (President Vaiphei Students), Paolui Jeme (Joint Secy. NCHISF Hjo. Block) le Rev. Jubileethang Hrangchal haiin an uop.

** Tuta kar sung khan Pu Ngamrothang Hmar (EM NCHAC) chun ama biel enkawl Lower Kharthong Constituency sunga khuo hai ta dingin Plastic chair semna a nei. Plastic chair 550 lai zet chu khawtin a mihriem tam dan izirin 50,30,20,10 peiin khawtin GB k*ta inhlan an nih.

** Liemtah Oct. 4 zan dar 8:40pm vel khan Diphu, Karbi Anglong-ah khawsawt inleng tin, Pu Zarmawi Keivom le a nuhmei Pi Siemkim hai nupa scooty a an tlanlai chu tata mobile 207 in an in baw leiin a nuhmei Pi Siemkim hi a hmunah thi nghalin, a pasal Pu Zarmawi Keivom chu a hliem inrik leiin Guwahati tieng fepui nghal a nih. A suktu motor hi a tlan hmang leiin man hman a ni naw a, a motor no. ruokchu lak a nih. HYA hotuhaiin FIR ziekin “Hit & Run” case siemkhum nghal a nih. Pu Zarmawi hi Assam police a SI sinthaw niin, Hamren a inthawka Diphu a hung transfer zo hlim a ni a. An nupa hin nau pasal k*m 17 le k*m 13 an nei a nih. Vangduoina tuoktuhai pawi ei ti pui hle.

** Hmun tum tumah HSA Founding Day ursun taka inser: Hmar Students’ Association (HSA) a piengchampha a k*m 79-na chu Hmar nauhai chengna hmun hran hran ah October 3 khan ursun taka inser a nih. Insukhlimna/Sports, Career guidance, lung phunna, HSA Flag keipharna, rimawi tieng panga insukhlimna le hmun thenkhat a hai chu ruoi meu thein hun hmang a nih. A biktakin HSA Assam Hills JHQ hnuoia Unit 43 um hai laia Unit tlawmte ti naw chu hi hun hi umni khamin programme puithu takin an hmang tawl seng a nih.
Muolhoi Unit chun sun le zan prokram CH Khawtlang Hall ah an hmanga, Chief Guest in Upa Lalsangmawi Hmar, AFS, Asst. Conservator of Forest, Govt.of Assam hmang a nih. Sun huna Career guidance prokram le hun chidang dang hai hmang a ni a, zan huna hla ruoi nei a nih. Mizo Rapper inlar Lilzo le local artiste ha’n mipui an awi tlei hle.
Huonveng Unit chun HSA Founding Day le HSA Huonveng Unit Silver Jubilee (1993-2018) lawmna chu Huonveng Community Hall ah an hmanga, hi huna hin Huonveng Unit lo phuntu Pu Lalthlirlien Darngawn, AFS, Chief Accounts Officer, Govt.of Assam chu khuollien-a hmang a nih. Silver Jubilee lung phunna, Jubilee Souvenir tlangzarna hai neiin, ruoi ropui tak the a nih. Hlasak thiem Tv. Jajai Singsit, Nk. Christina Shak*m, Rapper Tv. Je El Hmar le local artiste iemanizatin mipui an inawi bawk.

** Trinity High School, Mahur in Silver Jubilee an lawmna le inzawmin Ninlai khan 43rd Assam Rifles le inkawpin Bike Rally an huoihawt. Hi rally hi Mahur-a intanin AR Capt. Abilesh Singh in a liem a, Lamdukan, Mahadebtilla, Haflong a KCC a Exe.Secy. Rev. H. Haolai le School zirtirtu le inchuklaihaiin an lo hmuok. KCC Assam Synod House lutin AR Camp Sarkari Bagan an fe nawk a, chu hnungah Hossana Orphan Home, Muolhoi-a nau fahrahai thilpek inhlanna neiin Mahur tieng an kir nawk.

04/09/2018

TUOLSUNG CHANCHIN
Vol.13 No. 20 20th Aug- 02th Sept, 2018

** Tarik 31-08-18 (Zirtawpni) khan HSA, Joint Higher Secondary & College Unit, Haflong chun Freshers’ Meet 2018 an hmangna ding le inzawma sum sukhlawkna dingin C.H.Khawthlang M.Hall, Muolhoiah One Day Mess an buotsai chu mi tlawmngai tamtakhai zarin an hlawtling hle thu lo dawng a nih. Chun, Tuta kar sung khan RPC le Dinthar EFCI hai khawmin ‘One Day Mess’ an buotsai bawk.

** Tarik 30-8-2018 (Ningazan) khan C. H. Khawthlang Memorial Hall-ah Hmar tawnga lekhabu suok thar chu Pu John Mark Pena, President, HSA Assam Hills Jt. Hqr. in tlangzarna a lo nei tah. Hi lekhabu “Muolkhawpui” ti hming inbaka um hi Pu Siekkhohen Tamhrang in a ziek a ni a, Muolhoi Val Upa huoihawtna hnuoia tlangzarna programme hi buoitsai a nih. A ziektu hi ei khawsunga ding chun lekhabu chi dang dang lo ziek ta hlak le ngainuom um taka thusep thiem a ni a, Muolkhawpui lekhabu hi tiem manhla um tak ding a nih. Chanchin hriet danin copy khatah Rs.70/- vela zawr suok a ni ding a ni a, karthar sung hin zawrsuok tan beisei a nih. Mani tawnga thuziek le lekhabuhai hlutsakna chang hre dingin mitin ei infiel nghal bawk.

** Liemtah Aug 28 (Thawleni) khan EFCI N. C. Hills Presbytery huoihawtna hnuoiah Lower Muolhoi Biel ta ding b$ka Seminar Kanaan EFCI Biekin ah nei a nih. Hi Seminar-a hin Kanaan, Dinthar, Huonveng kohrana inthawkin mi 80 bawrvel an thang thei a, Seminar class-a thupui neihai chu - Church Doctrine, Church worship and present issue, Leadership & Management, Finance & Account tihai hi an nih.

** August 30 (Zirtawpni) khan EFCI Muolhoi & Lower Muolhoi Biel NSSD thuoituhai chun EFCI Conference hall-ah Committee neiin Biel Conference programme siem nghal a nih.

** Tuta kar sung ningani khan Dima Hasao sunga party thar pawl tak National Peoples Party (NPP) hai chun an party member thar dingin mi 56 hai chu Hatikhali NPP Office-ah lawmlutna an nei.

** Tarik 1.9.2018 (inrinni) zingtieng khan Nazareth Model High School, Muolhoi-a ACR Science Laboratory, MADP Scheme 2016-17 hnuoia ISF thuoituhai hmalakna zara bawla um hawngna hunser hmang a nih. Hi hunser hi HSA Assam Hills JHQ, Gen.Secy James Selate in a keihruoi a, Upa Ralthang Faihriem, Vice-President Hmar Inpui, Assam Hills Region in hawngna a nei.

** Tarik 25-26 August, 2018 sung khan Muolhoi EFCI KTP chun Upper Hmunthajao kanna an nei a, hi huna hin Pathien thu le hlaa inhawi taka inpawl khawmna nei a ni bak a, Pathien zing inkhawm tinin Ramthar ta dingin bawm zawnna nei a ni a, chutaka sum hmu suok po chu Rs.14000/- a tling a nih. Chun, Muolhoi EFCI KTP Committee chun upper Hmunthajao ta dinga iemani bek thaw dinga a ti chu- mi tlawmngai haia inthawkin sum thahnem tawk tak deng suokin celing fan man ding Rs.12000 an inhlan a, chun hun remchang hmasataka Microphone khawm pek an ni ding a nih. Hi baka hin Pu John L. Puruolte in a mimalin Kristien hlabu man ding le Holy Bible man ding tiin sumfai an hlan bawk. Hlima Pathien inpak pei pumin Pathienni (26-08-18) zan inkhawm tinin Muolhoi KTP hai chun veng tieng hun pan a ni nawk tah.

** Tuta kar sung khan Nk. Merelyn Zaithangpui Riengsete D/o Lalzinglien Riengsete, Muolhoi (Kanaan veng) chun Bar Council of India huoihawtna hnuoia All India Bar Examination (12) 2018 exam-ah hlawtlingna a chang. Nk. Merelyn Zaithangpui Riengsete hi University Law College, Gauhati University ah k*m 2016 khan LLB a zoa, tuhin Gauhati High Court hnuoi ah a practice mek a nih. Hi exam hi Bar Council of India in Law zo hai ta dinga k*m tina vawihni a huoihawt, law tieng panga an hrietna ensinna le practice theina ding ani a, a hlawtling hai hi ‘Certificate of Practice’ a pek hlak a nih. Ama hi Kanaan EFCI KTP fel em em a nih. A hlawtlingna hi ei lawmpui takzet.

** Pu Lalbiektluong Gangte chu Inrinni (01-09-2019) zingtieng dar 1:30 AM vel khan nat lawk um lova na thutin Haflong Civil Hospital-ah fam a mi lo chang san tah. A ruong hi Inrinni hin Muolhoi thlanmuolah vuiliem a nih.
Ama hi Pu Liendal Gangte le Pi Tingneichawng hai nau 7 hai laia upatak dawttu a ni a, Khuongluong khuoah 19.9.1973 khan a pieng a, k*m 2003 khan a nuhmei Pi Elizabeth (Sungte) leh inneiin nau pathum an nei. TET Examah hlawtlingna changin ME Teacher sin March 5, 2013 khan a thaw tan a, Kalimabong, Harangajao hmuna thawk lai zing a nih.
Zirtawpni zan dar 11 chen khawm sunghai le hun hmanga lungmuong taka an um lai, natlawk um lovin zan dar 1 vel khan inthuok harsa tiin a hung um ta thut leiin Haflong Hospital ah an rang thei anga tlanpui nghal a ni a, san thei ni ta lovin ei lo inthepui ta a nih. Ama hi Muolhoi EFCI KTP Group No.3 member a nih. Lusun sungkuohai ei tuorpui hle.

Tarik 29-8-2018 khan Doiheng khuoah HSA Assam Hills Jt Hqrs hmalaknain Free Medical Camp huoihawt a nih. Hi hun a hin Haflong anthawk Pu John Mark Pena, President, HSA Assam Hills JHQ inrawina hnuoi ah HSA thuoitu mi 16 an fe bakah HSA GHQ tieng anthawk Pu Josef V Tuolor, Gen. Secretary in a uop sa bawk. Doiheng khuo le a sevêl a mipui fekhawm an thahnem hle a, mi tamtak el fe le hungna harsa leia Doctor pan thei lo hai ta dinga HSA hmalaknaa a thlawna mani veng ngeia Doctor pan theina le damdawi hai a thlawna hmu theia an um chu khawsung mipuiin nasatakin lawmthu an hril. Hi medical camp hi HSA hmalakna in Holy Spirit Hospital, Haflong le 43rd Assam Rifle hai thangkawpa buotsai a nia, Doctor le Nurse hai khawm anni in an provide bakah Damdawi le thil dang dang chu Joint Director, Health Services, Dima Hasao in a tum bawk a nih.
Medical camp el ni lovin HSA chun Doiheng mipui le khawsung thuoitu hai kuomah 'Stop Illegal Killing of Birds' ti thupui hmangin ngenna an siem bakah Banner hai tarna an nei sa bawk. Doiheng khuo a hin vate (Migratory Birds) chi dang dang k*m tin an hung fuonkhawm hlaka, hi thil lei hin nasatakin mi ngaiven a hlawa, a en dingin Foreign anthawk dam in Doiheng khuo hi an hung pan hlak a nih.

Agape weekly

27/11/2018

06/11/2018

24/10/2018

16/10/2018

09/10/2018

04/09/2018

Address

Website

Alerts

Shortcuts

Share