16/10/2025
ശരിയായ ഉറക്കം കിട്ടുന്നില്ലേ? എങ്കില് 'മിലിട്ടറി സ്ലീപ്പ് മെത്തേഡ്' ഒന്ന് പരീക്ഷിച്ച് നോക്കൂ, വെറും 2 മിനിറ്റുകൊണ്ട് നിങ്ങള് ഉറക്കത്തിലേക്ക് വഴുതി വീഴും
തിരക്കേറിയ ജീവിതത്തിനും ജോലിക്കും ഇടയില് നന്നായി ഒന്ന് ഉറങ്ങാൻ പോലും കഴിയാത്ത പല ആളുകളും നമുക്ക് ഇടയിലുണ്ട്.
വേണ്ട രീതിയിലുള്ള ഉറക്കം കിട്ടാതെ വരുമ്ബോള് എങ്ങനെയെങ്കിലും കുറച്ചു നേരം സുഖമായി ഉറങ്ങാമെന്ന കരുതി ആളുകള് പല പോംവഴികളും തേടിപ്പോകാറുമുണ്ട്. ഹെർബല് ചായകള്, വെെറ്റ് നോയ്സ്, സ്ലീപ് മാസ്കുകള്, ലാവെൻഡർ സ്പ്രേകള് എന്നിവ ഉറക്കം കിട്ടാൻ ആളുകള് സ്വീകരിക്കുന്ന വഴികളില് ചിലത് മാത്രം. ഇതില് നിന്നും വ്യത്യസ്തമായി ഈയിടെ പ്രചാരത്തിലാകുന്ന മറ്റൊരു രീതിയാണ് ' മിലിട്ടറി സ്ലീപ്പ് മെത്തേഡ്'. ഈ വിദ്യയ്ക്ക് വളരെക്കാലത്തെ പഴക്കമുണ്ടെങ്കിലും കൂടുതല് ആളുകള് ഇതിനെപ്പറ്റി അറിഞ്ഞു വരുന്നേയുള്ളൂ എന്ന് പറയാം. വെറും മിനിറ്റ് കൊണ്ട് ഉറക്കത്തിലേക്ക് വഴുതി വീഴുന്ന മിലിട്ടറി സ്ലീപ്പ് മെത്തേഡിന്
ഇപ്പോള് സമൂഹ മാധ്യമങ്ങളില് നല്ല പ്രചാരമാണുള്ളത്.
സമ്മർദ്ദകരമായ സാഹചര്യങ്ങളില് പോലും സൈനികരെ വേഗത്തില് ഉറങ്ങാൻ സഹായിക്കുന്നതിനായി വികസിപ്പിച്ചെടുത്ത ഒരു വിശ്രമ രീതിയാണ് മിലിട്ടറി സ്ലീപ്പ് മെത്തേഡ്. 1981-ല് പുറത്തിറങ്ങിയ 'റിലാക്സ് ആൻഡ് വിൻ ചാമ്ബ്യൻഷിപ്പ് പെർഫോമൻസ്' എന്ന പുസ്തകത്തിലാണ് ഈ രീതിയെക്കുറിച്ച് വിശദീകരിച്ചിരിക്കുന്നത്. നിർബന്ധപൂർവ്വമല്ലാതെ തന്നെ നമ്മളെ വിശ്രമത്തിലേക്ക് തള്ളിയിടുന്ന രീതിയാണിത്.
ഇത് എങ്ങനെയാണ് പരിശീലിക്കേണ്ടതെന്നു നോക്കാം
1. സൗകര്യപ്രദമായി കിടന്ന്, കണ്ണുകളടച്ച്, സാവധാനത്തിലും ആഴത്തിലുമുള്ള ശ്വാസത്തില് ശ്രദ്ധ കേന്ദ്രീകരിക്കുക.
2. ശേഷം, നിങ്ങളുടെ മുഖത്തെ ഓരോ പേശിക്കും വിശ്രമം നല്കുക. നെറ്റി, കവിളുകള്, താടിയെല്ല്, നാവ് എന്നിവയിലൂടെ നീങ്ങുക
3. തോളുകള് അയച്ചിടുക. ക്രമേണ കൈകള്ക്കും വിരലുകള്ക്കും വിശ്രമം നല്കുക.
4. പതുക്കെ ശ്രദ്ധ നെഞ്ചിലേക്കും വയറിലേക്കും കൊണ്ടുവരിക. ശ്വാസം പുറത്തുവിടുമ്ബോള് ആ ഭാഗങ്ങള്ക്ക് ബോധപൂർവ്വം വിശ്രമം നല്കുക. ഇത് കാലുകളിലൂടെ തുടരുക, തുടകള് മുതല് കാല്വിരലുകള് വരെയുള്ള ഓരോ പേശിക്കും സന്ധിക്കും വിശ്രമം നല്കുക.
5. ശരീരം പൂർണ്ണമായി വിശ്രമിച്ചുകഴിഞ്ഞാല്, ശാന്തമായ ഒരു തടാകത്തില് പൊങ്ങിക്കിടക്കുന്നതോ അല്ലെങ്കില് ഒരു വെല്വെറ്റ് തൊട്ടിലില് കിടക്കുന്നതോ ആയി സങ്കല്പ്പിക്കുക. നിങ്ങള്പോലും അറിയാതെ നിങ്ങള് ഉറക്കത്തിലേക്ക് വഴുതി വീണിട്ടുണ്ടാകും.
പകല് സമയത്ത്, നിരന്തരമായ സമ്മർദ്ദം, സ്ക്രീനുകള്, ഒന്നിലധികം ജോലികള് എന്നിവ നിങ്ങളുടെ നാഡീവ്യൂഹത്തെ അലേർട്ട് മോഡില് നിലനിർത്തുന്നു. രാത്രിയില്, വിശ്രമിക്കുന്നതിനു പകരം നിങ്ങളുടെ തലച്ചോറ് അപ്പോഴും കാര്യങ്ങള് പ്രോസസ്സ് ചെയ്തുകൊണ്ടിരിക്കുകയാവും. അത്തരം സാഹചര്യങ്ങളിലാണ് ഈ രീതി പ്രയോജനപ്പെട്ടേക്കാവുന്നത്.
മിലിട്ടറി സ്ലീപ്പ് മെത്തേഡ് മനസ്സിനും ശരീരത്തിനും ഒരുപോലെ മികച്ചതാണ്. പേശികള്ക്ക് വിശ്രമം നല്കുകയും ശ്വാസത്തില് ശ്രദ്ധ കേന്ദ്രീകരിക്കുകയും ചെയ്യുന്നതിലൂടെ, നിങ്ങള് പാരാസിംപതറ്റിക് നാഡീവ്യൂഹത്തെ ഉത്തേജിപ്പിക്കുന്നുവെന്നാണ് ആരോഗ്യവിദഗ്ധരുടെ പറയുന്നത്
