30/05/2026
BEISEINA NUNG
Mihringte hi kan beidawng ṭhîn. A châng phei chuan thil ṭha kan tih ve te pawh hian, a hun lai chuan kan lâwm viau nâa, a hnu-ah kan thil ṭha tih avânga tawrh emaw sawichhiatna emaw chânna emaw a lo thlen hian kan thil ṭha tih te pawh hi inchhîr rum rum hial châng kan nei fo. Mahse, chuti ang chu mihringte chauh hi kan lo ni bîk hauh lo. Kan Pathian ngei pawh hi a beidawngin a inchhir ve asin!
Genesis 6:6-ah chuan, “Tichuan, leiah hian mihring a lo siam tâk avângin Lalpa chu a inchhîr a, rilru nat nân a hman phah ta a,” a ti. Chuvang chuan, keini pawhin lungngaih châng te, beidawn châng te kan nei hi a âwm lo hran lo; beiseina beidawng lo erawh kan neih a ngai.
Petera pawh khân Lal Isua-ah beiseina a nghat a, tui chunga a kal theih ngei a beisei a. A beisei ang takin a kal thei ta rêng a. Mahse, Lal Isua a beiseina hian tâwp chin a nei tlat hi a pawi. Tuifâwn leh thlipui a hmuh chiah khân Lal Isua a beiseina kha a tinung zo tawh lo tlat mai. A va pawi êm! Lal Isua a beiseina hi vuan nghet tlat sela chuan, kan Bible-ah hian kan Lal Isua chauh lo pawh tui chunga ke-a kal chanchin hi kan chhiar kan chhiar mai tûr! Mahse, Petera beiseina hian daih chin leh tâwp chin a nei a, a pawi ta! “Lalpa, min chhandam rawh” a tih ruai phah ta zâwk a nih kha.
Marthi rinna pawh hi keini rinna ang tho hi a nih hmêl riau! Lalpa chu a ring a, a beisei a; mahse, beisei hun chhûng a nei, a beiseina hian ramri kham chin a nei tlat. A unaupa Lazara kha kai tho thei tûra Lal Isua hi a beisei a nih rau rau chuan beisei nghet bur mai sela a ṭha tûr. Mahse, ni li lai a lo liam hman avângin Lal Isua’n a kai tho thei tawh lo tûrah a ngai deuh tlat niin a lang. Marthi nên hian kan va inang mai âwm e aw!
Lal Isua chu kan ring alâwm, a thiltihtheihna pawh kan ring. Mahse, rin chin kan nei tlat!
Abrahama leh Sari te beiseina nung neihte hi a va entawn tlâk tak êm! K*m 90 hnu-ah pawh fa neih an la beisei fan! Beisei tûr Lalpa an nei tlat alâwm! Keini chu ni ila, awmzia awm lo, tiin fa kan 'adopt' daih tawh ang chu. Anni chu an ni ve lo. Mahse, anni paw'n tih fuh loh zeuh erawh an nei. An tih fuh loh deuh chu, an beiseina vawn nun reng atâ an pêng ta zeuh hi a pawi ta êm êm a ni. 'Thutiam fa' ni lo an hrin pawizia kha, Hagari leh Ismaela te chanchin kal zêlah kan hmu!
Chuvangin, keini pawhin kan Pathian-ah beiseina nghat tlat ila, beidawng lovin i nghâk fan fan ang u. Mihringte ngaihah tlai angin lang ṭhîn mah se, ni thei tawh lo tûr ang hialin lang ṭhîn mah se, Lalpa erawh a hun takah a che ṭhîn zâwk a ni. I lungngaihna te, i beidawnna te, i mamawh te, i thil awh te, i hrisêl lohna te, a hnênah thlen zêl la, beidawng ngai suh ang che.
Khawvêla mi khawngaihthlâk berte chu mi beidawng, beiseina nei tawh lote hi an ni ṭhîn. Joba pawh a tawrhnaah hian a beidawng ve alâwm. Mahse, Joba chuan a beiseina mei a ti-mit duh lo va, a Pathianah a beiseina a nghat tlat a, a tâwpah a beisei lâwmman chu a hmu. Habakuka 2:3-ah kan Pathian thu chuan "Rei deuh mah se, nghâk rawh; a lo thlen ngei dâwn avângin a tlai chuang lo vang," a ti. Kan Pathian chu a daw ngai lo va, a ringtu apiang leh beiseina nghattu, a lama rilru dik tak putute chungah chuan, a chakzia tilang tûrin a mit chu a lên reng zâwk a ni. Beisei la, beidawng suh.
