15/09/2026
दार्जीलिङमा अलग राज्य गोर्खाल्याण्डको एकसूत्रीय माग लिएर नयाँ राजनैतिक पार्टीको उदय भएको छ - गोर्खाल्याण्ड संग्राम पार्टी।
यस पार्टीको घोषणा अनुसार, अलग राज्य गोर्खाल्याण्डबाहेक अरु कुनै पनि वैकल्पिक व्यवस्था उनीहरुलाई स्वीकार्य हुने छैन। पार्टीले दार्जीलिङ पहाडमा अबदेखि गोर्खाल्याण्ड बाहेक अन्य कुनै विकल्पको बारेमा छलफल गर्न बैठक नै नबसोस् भन्ने अडान पनि लिएको छ।
आइतबार गोर्खा दुःख निवारक सम्मेलन भवनमा भएको एक कार्यक्रममा पार्टीको औपचारिक घोषणा गरिएको हो। नयाँ पार्टीको अध्यक्षमा सञ्जय थुलुङ र महासचिवमा लीलाकुमार गुरुङ चयन भएका छन्। पार्टीको पूर्ण केन्द्रीय समिति भने आगामी ११ अक्टोबरमा गठन गरिने बताइएको छ।
कार्यक्रममा बोल्दै अध्यक्ष सञ्जय थुलुङले पहाडका अन्य दलहरुलाई कडा चेतावनी दिए। उनले भने - गोर्खा जातिको मुद्दामा सानो-सानो कुरामा सम्झौता गरेर वैकल्पिक व्यवस्थाको कुरा गर्ने सोच नै अब बन्द गर्नुपर्छ। सबै दलहरू अब केवल गोर्खाल्याण्डको लागि मात्र अघि बढ्नुपर्छ।
उनले थप भने, यदि कसैले वैकल्पिक व्यवस्थाको लागि सभा गर्छ भने उनीहरुमाथि लाग्न सक्ने गोली आफूहरुले छातीमा थाप्ने छन्। तर, गोर्खाल्याण्डको नाममा मिलावट गरियो भने त्यही गर्नेहरुका लागि गोर्खाल्याण्ड संग्राम पार्टी सबैभन्दा ठूलो बाधक बन्नेछ।
गोर्खाल्याण्ड असम्भव छ भन्नेहरुलाई जवाफ दिँदै थुलुङले भने - मान्छेहरूले असम्भव भन्छन्, तर हाम्रा कार्यकर्तामा असम्भवलाई सम्भव बनाउने हिम्मत छ। यो पार्टीको जन्म नै केवल गोर्खाल्याण्डको लागि भएको हो, चाहे थोरै कार्यकर्ता किन नहोस्, संघर्ष जारी रहनेछ।
केन्द्रीय गृहमन्त्री अमित शाहले गोर्खा जातिलाई दिएको ६ महिनाको आश्वासनको समय नोभेम्बरमा सकिँदैछ। त्यस समयसम्म पनि ठोस पहल नभए पार्टीले लोकतान्त्रिक तरिकाले सडक आन्दोलनमा उत्रने चेतावनी पनि उनले दिए।
#गोर्खा
