District News, Barshi Road, Latur (2026)

02/09/2026

७०:३० निधीवाटपाचा निर्णय जिल्हा परिषदेच्या अधिकारांवर गदा आणणारा : आशाताई भिसे #जिल्हापरिषद #आशाताईभिसे #काँग्रेस #निधीवाटप

02/09/2026

उदगीरमध्ये अवैध सावकारीविरोधात सहकार विभागाची कारवाई #लातूर #उदगीर #अवैधसावकारी #सहकारविभाग #कारवाई #उदगीरपोलिस

पाच ठिकाणी झडती; कर्ज व्यवहारांची कागदपत्रे, कोरे धनादेश, स्टॅम्पसह महत्त्वाचे दस्तऐवज जप्त

लातूर, दि. २ : उदगीर शहर व तालुक्यात सुरू असलेल्या कथित अवैध सावकारी व्यवसायाविरोधात सहकार विभागाने बुधवारी धडक कारवाई केली. जिल्हा उपनिबंधक, सहकारी संस्था, लातूर यांच्या मार्गदर्शनाखाली महाराष्ट्र सावकारी (नियमन) अधिनियम २०१४ मधील कलम १६ अंतर्गत पाच ठिकाणी झडती घेण्यात आली. या कारवाईत आर्थिक व्यवहारांशी संबंधित विविध कागदपत्रे, रोकड, खाती, कोरे धनादेश, कोरे स्टॅम्प, स्थावर मालमत्तेचे खरेदीखत आणि इसारचिठ्ठ्या आढळून आल्या असून, संबंधित कागदपत्रे जप्त करण्यात आली आहेत.

उदगीर शहर व तालुक्यातील अवैध सावकारी व्यवसायाबाबत सहकार विभागाकडे तक्रारी प्राप्त झाल्या होत्या. या तक्रारींच्या अनुषंगाने २ सप्टेंबर रोजी पाच ठिकाणी झडतीची कार्यवाही करण्यात आली. या कारवाईमध्ये साधू रामचंद्र कांबळे, पप्पू ऊर्फ सतीश पांढरे व राजीव बिरादार, फिरोजखान नामुरखान पठाण, अमोल अशोक कोल्हेकर आणि विक्रम माने यांच्या ठिकाणांचा समावेश आहे.

झडतीदरम्यान कर्ज व्यवहार आणि आर्थिक देवाणघेवाणीशी संबंधित दस्तऐवज तसेच इतर महत्त्वाचे साहित्य आढळून आले. या सर्व बाबींची तपासणी करून पुढील चौकशीची कार्यवाही सुरू करण्यात आली आहे.

कारवाईसाठी सहकार विभागातील अधिकारी व कर्मचाऱ्यांचे पथक नियुक्त करण्यात आले होते. झडती पथकांना संरक्षण देण्यासाठी उदगीर शहर आणि ग्रामीण पोलिस ठाण्यांतील अधिकारी व कर्मचाऱ्यांची मदत घेण्यात आली.

ही कार्यवाही जिल्हाधिकारी डॉ. भारत बास्टेवाड, जिल्हा पोलिस अधीक्षक अमोल तांबे, लातूर विभागीय सहनिबंधक नानासाहेब चव्हाण, जिल्हा निबंधक (सावकारी) व्ही. एल. पोतंगले आणि उदगीर तहसीलदार राम बोरगावकर यांच्या मार्गदर्शनाखाली करण्यात आली. सहकारी संस्थेचे उदगीर सहायक निबंधक महेश कच्छवे यांनी ही माहिती दिली.

अवैध सावकारीबाबत तक्रार करण्याचे आवाहन

जिल्ह्यात कुठेही अवैध सावकारीचा व्यवसाय सुरू असल्यास नागरिकांनी संबंधित तालुका सहायक निबंधक, सहकारी संस्था किंवा जिल्हा उपनिबंधक, सहकारी संस्था, लातूर यांच्या कार्यालयाकडे तक्रारी दाखल कराव्यात, असे आवाहन महेश कच्छवे यांनी केले आहे.

02/09/2026

लातूरमध्ये सामाजिक न्याय भवनांवर चढून मराठा तरुणांची जोरदार घोषणाबाजी

02/09/2026

रानभाज्यांचा नियमित आहारातील समावेश आवश्यक — जिल्हा परिषद अध्यक्षा उषाताई पाटील #लातूर #रानभाजीमहोत्सव #रानभाज्या #कृषी #शेतकरी #महिलासक्षमीकरण #महिलाबचतगट #लातूरजिल्हापरिषद #कृषीविभाग

लातूर, दि. २ सप्टेंबर : बदलत्या जीवनशैलीमुळे आणि आधुनिक आहारपद्धतीमुळे पारंपरिक रानभाज्या आहारातून हद्दपार होत आहेत. या भाज्यांमधील औषधी व आरोग्यदायी गुणधर्म लक्षात घेता त्यांचे संवर्धन करून नियमित आहारात त्यांचा समावेश करणे आवश्यक आहे, असे जिल्हा परिषद अध्यक्षा उषाताई पाटील यांनी सांगितले.

लातूर कृषि तंत्रज्ञान व्यवस्थापन यंत्रणा (आत्मा) आणि कृषि विभागाच्या संयुक्त विद्यमाने कल्पतरू मंगल कार्यालयात आयोजित जिल्हास्तरीय रानभाजी महोत्सवाच्या उद्घाटनप्रसंगी त्या बोलत होत्या. यावेळी जिल्हा परिषदेच्या कृषि सभापती कविता गोरे, कृषि सहसंचालक महेश तीर्थकर, जिल्हा अधीक्षक कृषि अधिकारी दिलीप जाधव, आत्माच्या प्रकल्प संचालक मनिषा बांगर, कृषि विकास अधिकारी दीपक सुपेकर, मांजरा कृषी विज्ञान केंद्राचे संदीप देशमुख, आहारतज्ज्ञ डॉ. प्रियांका शेंडगे यांच्यासह कृषी क्षेत्रातील मान्यवर आणि पुरस्कारप्राप्त शेतकरी उपस्थित होते.

महिलांच्या आर्थिक सक्षमीकरणाला चालना

ग्रामीण भागातील महिलांना रानभाज्यांची थेट ग्राहकांना विक्री करता यावी, यासाठी रानभाजी महोत्सव महत्त्वाचे व्यासपीठ ठरत आहे. मात्र, केवळ एका दिवसापुरता महोत्सव न ठेवता रानभाज्यांना नियमित बाजारपेठ उपलब्ध करून देणे गरजेचे आहे. यामुळे ग्रामीण महिलांच्या आर्थिक सक्षमीकरणाला मोठी चालना मिळेल. पारंपरिक रानभाज्यांचे संवर्धन करणाऱ्या महिला बचत गटांना जिल्हा परिषदेच्या माध्यमातून सर्वतोपरी सहकार्य केले जाईल, असे उषाताई पाटील यांनी सांगितले.

रानभाज्यांचा आहारातील वापर वाढविण्याचे आवाहन

उत्तम आरोग्यासाठी रानभाज्या अत्यंत महत्त्वाच्या आहेत. नामशेष होण्याच्या मार्गावर असलेल्या या पारंपरिक भाज्यांचे संवर्धन आणि त्यांचा आहारातील वापर वाढविणे ही काळाची गरज आहे. महिलांनी पुढाकार घेऊन आपल्या कुटुंबाच्या आहारात रानभाज्यांचा वापर वाढवावा, असे आवाहन कृषि सभापती कविता गोरे यांनी केले.

माहिती पुस्तिकेचे प्रकाशन

महोत्सवाच्या निमित्ताने रानभाज्यांची सविस्तर आणि सचित्र माहिती देणाऱ्या ‘ओळख रानभाज्यांची...’ या विशेष माहिती पुस्तिकेचे मान्यवरांच्या हस्ते प्रकाशन करण्यात आले.

यावेळी कृषी क्षेत्रातील उल्लेखनीय योगदानाबद्दल कृषिभूषण पुरस्कारप्राप्त शेतकरी श्रीकृष्ण शिंदे आणि जिजामाता पुरस्कारप्राप्त महिला शेतकरी संजीवनी नागमोडे यांचा विशेष सन्मान करण्यात आला.

02/09/2026

महाराष्ट्र राज्य नाट्य स्पर्धेच्या प्रवेशिकेसाठी २५ सप्टेंबरपर्यंत मुदत #नाट्यस्पर्धा #लातूर #बालनाट्य #दिव्यांगबालनाट्य #हौशीनाट्य #सांस्कृतिककार्य

हौशी मराठी, हिंदी, संगीत, संस्कृत, बालनाट्य व दिव्यांग बालनाट्य स्पर्धांचा समावेश; लातूर जिल्ह्यातील नाट्य संस्थांना सहभागी होण्याचे आवाहन

लातूर, दि. २ सप्टेंबर : महाराष्ट्र शासनाच्या सांस्कृतिक कार्य संचालनालयाच्या वतीने आयोजित करण्यात येणाऱ्या महाराष्ट्र राज्य नाट्य स्पर्धेसाठी नाट्य संस्थांकडून २५ सप्टेंबर २०२६ पर्यंत ऑनलाइन प्रवेशिका मागविण्यात आल्या आहेत. लातूर जिल्ह्यातील जास्तीत जास्त नाट्य संस्थांनी या स्पर्धेत सहभागी व्हावे, असे आवाहन सांस्कृतिक कार्य संचालनालयाचे संचालक प्रशांत खेडेकर यांनी केले आहे.

शासनाच्या सांस्कृतिक कार्य संचालनालयामार्फत १६ नोव्हेंबर २०२६ पासून हौशी मराठी, हिंदी, संगीत व संस्कृत राज्य नाट्य स्पर्धा सुरू होणार आहेत. यासोबतच बालनाट्य आणि दिव्यांग बालनाट्य स्पर्धांचेही आयोजन करण्यात येणार आहे.

महाराष्ट्र राज्य बालनाट्य स्पर्धेची प्राथमिक फेरी डिसेंबर २०२६ पासून राज्यातील १० विविध केंद्रांवर होणार आहे. तसेच ६५ व्या हौशी हिंदी, संगीत व संस्कृत नाट्य स्पर्धेची अंतिम फेरी प्रत्येकी एका केंद्रावर डिसेंबर २०२६ पासून आयोजित करण्यात येणार आहे.

नोंदणीकृत हौशी नाट्य संस्था तसेच गतवर्षी राज्य नाट्य स्पर्धेत सहभागी झालेल्या नाट्य संस्थांसाठी प्रवेशिका व स्पर्धेचे नियम [mahanatyaspardha.com](https://mahanatyaspardha.com?utm_source=chatgpt.com) या संकेतस्थळावर उपलब्ध करून देण्यात येणार आहेत. आवश्यक कागदपत्रांसह प्रवेशिका २५ सप्टेंबर २०२६ पर्यंत ऑनलाइन सादर करणे बंधनकारक आहे.

विहित मुदतीनंतर कोणत्याही परिस्थितीत प्रवेशिका स्वीकारल्या जाणार नाहीत. प्रवेशिकेसोबत आवश्यक कागदपत्रे जोडलेली नसल्यास किंवा संपूर्ण तपशील भरलेला नसल्यास ऑनलाइन प्रवेशिका सादर करता येणार नाही.

स्पर्धेसाठी संस्थेची निवड झाल्यानंतर शासनाने निश्चित केलेल्या केंद्रावर आणि दिलेल्या तारखेला प्रयोग सादर न केल्यास प्रवेशिकेसोबत जमा केलेली अनामत रक्कम शासकीय कोषागारात जमा करण्यात येणार आहे. तसेच नाट्य स्पर्धेसाठी शासनाने निश्चित केलेले नियम संस्थांना बंधनकारक राहणार असून, नियमांचे उल्लंघन केल्यास संबंधित संस्थेला अपात्र ठरविण्यात येईल, असे सांस्कृतिक कार्य संचालनालयाने स्पष्ट केले आहे.

सांस्कृतिक कार्य मंत्री ॲड. आशिष शेलार आणि सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली यंदाची राज्य नाट्य स्पर्धा पार पडणार आहे.

02/09/2026

जळकोटमध्ये तिर्रट जुगारावर छापा; १ लाख ३ हजार ९७० रुपयांचा मुद्देमाल जप्त #लातूर #जळकोट #जुगारावरकारवाई #स्थानिकगुन्हेशाखा #पोलीसकारवाई

लातूर, दि. २ सप्टेंबर २०२६ : जळकोट शहरातील द्वारका माता मंगल कार्यालयाच्या पाठीमागील शेतात सुरू असलेल्या तिर्रट जुगार अड्ड्यावर स्थानिक गुन्हे शाखेच्या पथकाने छापा टाकून सात जणांवर कारवाई केली. या कारवाईत पाच मोबाईल फोन आणि रोख रक्कम असा एकूण १ लाख ३ हजार ९७० रुपयांचा मुद्देमाल जप्त करण्यात आला आहे.

पोलीस अधीक्षक अमोल तांबे यांच्या निर्देशानुसार जिल्ह्यातील अवैध धंद्यांविरुद्ध कारवाई सुरू आहे. त्याच अनुषंगाने १ सप्टेंबर रोजी स्थानिक गुन्हे शाखेचे पथक जळकोट पोलीस ठाण्याच्या हद्दीत गस्त घालत होते. यावेळी द्वारका माता मंगल कार्यालयाच्या पाठीमागे सिद्धेश्वर विश्वनाथ काळे यांच्या शेतात काही जण तिर्रट नावाचा जुगार खेळत असल्याची माहिती पथकाला मिळाली.

माहितीची खात्री करून पथकाने दुपारी सुमारे ३.४० वाजता संबंधित ठिकाणी छापा टाकला. यावेळी सात जण सतरंजीवर गोलाकार बसून तिर्रट जुगार खेळत असल्याचे आढळून आले.

कारवाईत चंद्रकांत संभाजी धुळशेट्टे (३५), उद्धव दशरथ शिकारे (४७), नयुम करीमसाब कोतवाल (३५), अनवर आशपाक सय्यद (२६), ग्यानोबा बंडू गायकवाड (४२), महेश मनोहर सरकाळे (२५) आणि शिवाजी संतोबा येरपुरवाड (३९) यांच्यावर कारवाई करण्यात आली.

आरोपींकडून अंदाजे ५९ हजार रुपये किमतीचे पाच मोबाईल फोन आणि ४४ हजार ९७० रुपये रोख, असा एकूण १ लाख ३ हजार ९७० रुपयांचा मुद्देमाल पंचांसमक्ष जप्त करण्यात आला. सातही आरोपींविरुद्ध महाराष्ट्र जुगार प्रतिबंधक अधिनियमातील कलम १२(अ) अन्वये जळकोट पोलीस ठाण्यात गुन्हा दाखल करण्यात आला आहे.

ही कारवाई स्थानिक गुन्हे शाखेचे पोलीस निरीक्षक सुधाकर बावकर यांच्या नेतृत्वाखाली पोलीस अमलदार साहेबराव हाके, अर्जुन राजपूत, रियाज सौदागर, मनोज खोसे आणि प्रविण कोळसुरे यांच्या पथकाने केली.

02/09/2026

“हेल्मेट घाला, जीव वाचवा!” अधिष्ठाता डॉ. उदय मोहितेंचा दुचाकीस्वारांना संदेश

लातूर, दि. २ सप्टेंबर २०२६ : विलासराव देशमुख शासकीय वैद्यकीय महाविद्यालय, लातूर येथील अधिष्ठाता डॉ. उदय मोहिते यांनी दुचाकीस्वारांना हेल्मेटचे महत्त्व समजावून सांगत सुरक्षित वाहनचालना आणि रस्ते सुरक्षेबाबत जनजागृती केली.

अपघाताच्या वेळी डोक्याला होणाऱ्या गंभीर दुखापतीपासून बचाव करण्यासाठी हेल्मेट अत्यंत महत्त्वाचे असल्याचे त्यांनी सांगितले. दुचाकी चालवताना हेल्मेटचा वापर केवळ पोलिस कारवाई टाळण्यासाठी नव्हे, तर स्वतःचा जीव सुरक्षित ठेवण्यासाठी करावा, असे आवाहन त्यांनी केले.

02/09/2026

तहसील कार्यालयातील महिला शिपाई लाच घेताना रंगेहात पकडली

अध्याय प्रकरण बंद करून देण्यासाठी लाचेची मागणी; अहमदपूर पोलिस ठाण्यात गुन्हा दाखल

लातूर, दि. १ सप्टेंबर २०२६ : तहसील कार्यालयात सुरू असलेले अध्याय प्रकरण बंद करून देण्यासाठी तसेच पुढील तारीख न देण्यासाठी एक हजार रुपयांची लाच स्वीकारणाऱ्या अहमदपूर तहसील कार्यालयातील शिपायाला लाचलुचपत प्रतिबंधक विभागाच्या पथकाने रंगेहात पकडले.

लाचलुचपत प्रतिबंधक विभागाने दिलेल्या माहितीनुसार, तक्रारदार हे ४३ वर्षीय शेतकरी असून ते हडोळती, ता. अहमदपूर येथील रहिवासी आहेत. त्यांच्या भावाने दिलेल्या तक्रारीवरून अहमदपूर पोलिस ठाण्यात त्यांच्याविरुद्ध तक्रार दाखल झाली होती. त्याआधारे तहसील कार्यालय, अहमदपूर येथे अध्याय प्रकरण सुरू होते.

तक्रारदार हे १४ ऑगस्ट रोजी पुढील तारीख विचारण्यासाठी तहसील कार्यालयात गेले असता तेथील शिपाई मीराताई रामदास काळगे (माहेरचे नाव मीराताई मारूती तीलसरवाड) यांनी, तक्रारदार तारखेला गैरहजर राहत असल्याने त्यांना नोटीस निघेल व गैरहजेरीमुळे तीन महिने कारागृहात जावे लागू शकते, असे सांगितले. तसेच, ‘मी तुमची केस बंद करून टाकते,’ असे सांगून त्यासाठी दोन हजार रुपयांची मागणी केल्याची तक्रार करण्यात आली.

या तक्रारीची १८ ऑगस्ट रोजी लाचलुचपत प्रतिबंधक विभागाने पडताळणी केली. त्यावेळी संबंधित लोकसेविकेने तक्रारदाराकडे एक हजार रुपयांची लाच मागितल्याचे आणि ती रक्कम स्वतः स्वीकारण्याची तयारी दर्शविल्याचे निष्पन्न झाले.

त्यानंतर १ सप्टेंबर रोजी अहमदपूर तहसील कार्यालयात सापळा रचण्यात आला. अध्याय प्रकरणात पुढील तारीख न देण्यासाठी आणि प्रकरण बंद करून देण्यासाठी तक्रारदाराकडून मागितलेली एक हजार रुपयांची लाच मीराताई तीलसरवाड यांनी दुपारी १२.३६ वाजता स्वतः स्वीकारली. त्याचवेळी लाचलुचपत प्रतिबंधक विभागाच्या पथकाने त्यांना रंगेहात पकडले.

या प्रकरणी अहमदपूर पोलिस ठाण्यात गुन्हा रजिस्टर क्रमांक ५७५/२०२६, भ्रष्टाचार प्रतिबंधक अधिनियम १९८८ मधील कलम ७ अन्वये १ सप्टेंबर रोजी रात्री ११.४३ वाजता गुन्हा दाखल करण्यात आला आहे. आरोपी लोकसेविका मीराताई रामदास काळगे, पद शिपाई, यांना भारतीय नागरिक सुरक्षा संहितेच्या कलम ३५ (३) अन्वये नोटीस देण्यात आली आहे.

ही कारवाई पोलीस निरीक्षक हनुमंत वारे यांच्या नेतृत्वाखाली करण्यात आली. पर्यवेक्षक अधिकारी म्हणून पोलीस उपअधीक्षक चंद्रकांत माळी यांनी काम पाहिले. सापळा पथकात पोलीस निरीक्षक संजय केसरे, पोलीस शिपाई मंगेश कोंडरे, गजानन जाधव, शाहाजान पठाण आणि चालक पोलीस हवालदार संतोष क्षिरसागर यांचा समावेश होता.

पोलीस अधीक्षक श्रीकृष्ण कोकाटे आणि अपर पोलीस अधीक्षक डॉ. अश्विनी जगताप यांच्या मार्गदर्शनाखाली ही कारवाई करण्यात आली.

लाचलुचपत प्रतिबंधक विभागाने नागरिकांना आवाहन केले आहे की, कोणताही लोकसेवक शासकीय कामासाठी लाचेची मागणी करत असल्यास अथवा भ्रष्टाचारासंबंधी माहिती असल्यास नागरिकांनी लाचलुचपत प्रतिबंधक विभागाशी संपर्क साधावा असे आवाहन करण्यात आले आहे.

01/09/2026

बीपीएमएस प्रशिक्षण कार्यशाळेचा उत्साहात समारोप

लातूर, दि. १ सप्टेंबर २०२६ : राष्ट्रीय वास्तुविशारद दिनानिमित्त दयानंद कॉलेज ऑफ आर्किटेक्चर, लातूर येथे अंतिम वर्षातील अभियांत्रिकी व वास्तुकला विद्यार्थ्यांसाठी आयोजित करण्यात आलेल्या ‘बिल्डिंग प्रोजेक्ट मॅनेजमेंट सिस्टम’ (बीपीएमएस) या दोन दिवसीय प्रशिक्षण कार्यशाळेचा उत्साहात समारोप झाला.

या कार्यशाळेत नियोजन, प्रकल्प व्यवस्थापन, बांधकामस्थळावरील अंमलबजावणी, प्रकल्प निरीक्षण, उत्पादकता वाढविणे तसेच प्रकल्पाची प्रभावी अंमलबजावणी करण्यासाठी आवश्यक साधने, तंत्रे आणि उत्तम कार्यपद्धती याबाबत विद्यार्थ्यांना मार्गदर्शन करण्यात आले.

कार्यशाळेस वास्तुविशारद व प्रकल्प व्यवस्थापन तज्ज्ञ विजयकुमार सुतार तसेच स्थापत्य अभियंता, बांधकाम क्षेत्रातील व्यावसायिक व प्रकल्प व्यवस्थापन तज्ज्ञ मेघा सरवाडे हे मार्गदर्शक म्हणून उपस्थित होते. त्यांनी विद्यार्थ्यांना प्रकल्प व्यवस्थापनातील विविध व्यावहारिक बाबींसह बांधकाम व वास्तु क्षेत्रातील प्रत्यक्ष अनुभवाची माहिती दिली.

कार्यक्रमाची सुरुवात रबिया शेख यांच्या स्वागतपर भाषणाने झाली. त्यानंतर आयुषी बिदादा यांनी प्रमुख पाहुण्यांचा परिचय करून दिला. आर्किटेक्चरच्या चतुर्थ वर्षातील विद्यार्थ्यांनी कार्यक्रमाचे सूत्रसंचालन प्रभावीपणे केले. काझी मुख्तदिर यांनी आभार प्रदर्शन केले.

या कार्यशाळेस व्हीडीएफ आणि एम. एस. बिडवे अभियांत्रिकी महाविद्यालयातील विद्यार्थ्यांसह विविध क्षेत्रांत कार्यरत वास्तुविशारद आणि अभियंत्यांनी उत्स्फूर्त सहभाग नोंदविला. त्यामुळे विद्यार्थ्यांना शैक्षणिक ज्ञानासोबतच व्यावसायिक क्षेत्रातील प्रत्यक्ष अनुभव घेण्याची संधी मिळाली.

कार्यक्रमाच्या अध्यक्षस्थानी महाविद्यालयाचे प्राचार्य रवींद्र चव्हाण होते. विभागप्रमुख प्रिती पटवारी यांचीही प्रमुख उपस्थिती होती. त्यांच्या मार्गदर्शनाखाली आयोजित या कार्यशाळेमुळे विद्यार्थ्यांमध्ये प्रकल्प व्यवस्थापन, नेतृत्व, नियोजन आणि निर्णयक्षमता विकसित होण्यास मदत होणार असल्याचे यावेळी नमूद करण्यात आले.

कार्यशाळेच्या यशस्वी आयोजनाबद्दल महाविद्यालयातील शिक्षक, विद्यार्थी आणि आयोजकांचे उपस्थितांनी कौतुक केले. ‘शिका – व्यवस्थापन करा – सुधारणा करा – प्रगती करा’ या उद्देशाने आयोजित करण्यात आलेली ही कार्यशाळा विद्यार्थ्यांच्या भावी व्यावसायिक वाटचालीसाठी उपयुक्त ठरली.

01/09/2026

हेल्मेट सक्तीच्या पहिल्याच दिवशी ७८७ विना हेल्मेट चालकांवर ७ लाख ८७ हजारांचा दंड #हेल्मेट #लातूर #हेल्मेटसक्ती #लातूरपोलीस

दंडवसुली नव्हे, जीवितहानी रोखणे हा उद्देश

लातूर, दि. १ : वाढत्या रस्ते अपघातांना आणि त्यामधील जीवितहानीला आळा घालण्यासाठी लातूर पोलिसांकडून राबविण्यात येत असलेल्या हेल्मेट सक्तीच्या मोहिमेची आज, १ सप्टेंबरपासून प्रत्यक्ष अंमलबजावणी सुरू करण्यात आली. मोहिमेच्या पहिल्याच दिवशी जिल्ह्यातील राष्ट्रीय व राज्य महामार्गांवर विना हेल्मेट दुचाकी चालविणाऱ्या ७८७ वाहनचालकांवर दंडात्मक कारवाई करण्यात आली. या कारवाईत तब्बल ७ लाख ८७ हजार रुपयांचा दंड आकारण्यात आला.

लातूर जिल्ह्यात अपघातांचे वाढते प्रमाण आणि त्यामध्ये होणारी जीवितहानी कमी करण्यासाठी लातूर पोलीस विभागाकडून गेल्या मार्च महिन्यापासून हेल्मेट वापराबाबत सातत्याने जनजागृती करण्यात येत आहे. विविध माध्यमांतून हेल्मेटचे महत्त्व नागरिकांना पटवून देण्यात आले. वारंवार आवाहन करूनही अपेक्षित प्रमाणात हेल्मेटचा वापर होत नसल्याचे निदर्शनास आल्यानंतर हेल्मेट सक्तीची अंमलबजावणी करण्याचा निर्णय घेण्यात आला.

त्यानुसार १ सप्टेंबरपासून पहिल्या टप्प्यात राष्ट्रीय महामार्ग आणि राज्य महामार्गांवर कारवाई सुरू करण्यात आली आहे. जिल्ह्यातील संबंधित पोलीस ठाण्यांच्या माध्यमातून विना हेल्मेट दुचाकीस्वारांची तपासणी करण्यात येत असून, प्रचलित कायद्यानुसार दंडात्मक कारवाई केली जात आहे.

दंडासोबत जनजागृतीवरही भर

या मोहिमेदरम्यान पोलिसांनी केवळ दंडात्मक कारवाई न करता वाहनचालकांशी संवाद साधून हेल्मेटच्या वापराचे महत्त्व समजावून सांगितले. स्वतःच्या सुरक्षिततेसोबतच कुटुंबाच्या सुरक्षित भविष्यासाठी प्रत्येक दुचाकीस्वाराने प्रत्येक वेळी हेल्मेट वापरावे, असे आवाहन करण्यात आले.

वरिष्ठ अधिकाऱ्यांचा प्रत्यक्ष सहभाग
पोलीस अधीक्षक अमोल तांबे यांच्या सूचनांनुसार अपर पोलीस अधीक्षक मंगेश चव्हाण, शहर उपविभागाचे उपविभागीय पोलीस अधिकारी समीरसिंह साळवे, चाकूर उपविभागाचे उपविभागीय पोलीस अधिकारी मायने तसेच निलंगा उपविभागाचे उपविभागीय पोलीस अधिकारी विशाल डुमे यांच्यासह वरिष्ठ पोलीस अधिकाऱ्यांनीही या मोहिमेत प्रत्यक्ष सहभाग घेतला.

विविध ठिकाणी वाहनचालकांशी संवाद साधून वरिष्ठ अधिकाऱ्यांनी हेल्मेटचे महत्त्व पटवून दिले. वाहतुकीचे नियम पाळावेत आणि दुचाकी चालविताना हेल्मेटचा नियमित वापर करावा, यासाठी पोलिसांकडून जनजागृती करण्यात आली.

दंडवसुली नव्हे, जीवितहानी रोखणे हा उद्देश
हेल्मेट सक्तीमागे केवळ दंड वसूल करणे हा पोलिसांचा उद्देश नसून, रस्ते अपघातांमध्ये होणारी जीवितहानी कमी करणे आणि नागरिकांचे प्राण सुरक्षित ठेवणे हा मुख्य उद्देश असल्याचे पोलीस विभागाने स्पष्ट केले आहे.

दुचाकी अपघातांमध्ये डोक्याला गंभीर दुखापत होण्याचा धोका अधिक असतो. त्यामुळे प्रत्येक दुचाकीस्वाराने हेल्मेटचा वापर करणे अत्यंत आवश्यक आहे. पोलिसांच्या कारवाईची वाट न पाहता नागरिकांनी स्वतःहून हेल्मेटचा वापर करावा, असे आवाहन करण्यात आले आहे.

टप्प्याटप्प्याने होणार अंमलबजावणी
हेल्मेट सक्तीची अंमलबजावणी टप्प्याटप्प्याने करण्यात येणार असून, पहिल्या टप्प्यात राष्ट्रीय आणि राज्य महामार्गांवर कारवाई सुरू करण्यात आली आहे. जिल्ह्यातील नागरिकांमध्ये शंभर टक्के हेल्मेट वापराची सवय निर्माण होईपर्यंत ही मोहीम सातत्याने सुरू ठेवण्यात येणार असल्याचे पोलिसांनी सांगितले.

“हेल्मेट हे ओझे नसून कुटुंबाचे सुरक्षा कवच आहे,” असा संदेश देत लातूर पोलिसांनी नागरिकांना या उपक्रमात सहकार्य करण्याचे आवाहन केले आहे.

District News

02/09/2026

02/09/2026

02/09/2026

02/09/2026

02/09/2026

02/09/2026

02/09/2026

02/09/2026

01/09/2026

01/09/2026

Address

Telephone

Website

Alerts

Contact The Business

Shortcuts

Share

Listing takedown request