11/06/2026
അല്ബിര്റ് പ്രീ സ്കൂളും മയ്യന്നൂര് മഹല്ലും കൈകോര്ത്തു;4 കുടുംബങ്ങക്ക് വീടായി
വെള്ളമുണ്ട: സമസ്തയുടെ തണലില് അല്ബിര്റിലെ കുരുന്നുകളും കോഴിക്കോട് മയ്യന്നൂര് മഹല്ല് കമ്മിറ്റിയും മുണ്ടക്കൈ-ചൂരല്മല ഉരുള്ദുരന്ത ബാധിതര്ക്കായി നിര്മ്മിച്ച സ്നേഹ ഭവനങ്ങള് സമസ്ത പ്രസിഡന്റ് സയ്യിദ് ജിഫ്രി മുത്തുക്കോയ തങ്ങള് കുടുംബങ്ങള്ക്ക് കൈമാറി. മാനുഷിക സ്നേഹത്തിന്റെ ഉത്തമ ഉദാഹരണങ്ങളാണ് കുഞ്ഞുങ്ങളുടെ കരങ്ങളിലൂടെ സാധ്യമാക്കപ്പെട്ട ഈ വീടുകളെന്ന് ജിഫ്രി തങ്ങള് പറഞ്ഞു. കുട്ടികളില് സാമൂഹിക ബോധം വളര്ത്തുന്ന ഇത്തരം പ്രവര്ത്തനങ്ങള്ക്ക് നേതൃത്വം നല്കിയ അല്ബിര്റിന്റെ അണിയറ പ്രവര്ത്തകരെയും തങ്ങള് അഭിനന്ദിച്ചു. 2024 നവംബര് ഒന്പതിന് തങ്ങള് തറക്കല്ലിട്ട വീടുകളാണ് ഇന്നലെ തങ്ങളുടെ കരങ്ങളാല് തന്നെ കൈമാറിയത്. ചടങ്ങിനെത്തിയ ആളുകളെ തരുവണ വികെയര് അല്ബിര്റ് പ്രീ സ്കൂളിലെ കുരുന്നുകള് പൂക്കള് നല്കിയാണ് സ്വീകരിച്ചത്.
സമൂഹത്തോടുള്ള ഉത്തരവാദിത്തവും സഹജീവി സ്നേഹവും കുട്ടികളുടെ മനസ്സില് വളര്ത്തിയെടുക്കുക എന്ന ലക്ഷ്യത്തില് അല്ബിര്റ് സ്റ്റേറ്റ് കൗണ്സിലെടുത്ത തീരുമാനം സ്കൂള് മാനേജ്മെന്റുകള് ഇരുകൈയും നീട്ടി സ്വീകരിച്ചതോടെയാണ് പദ്ധതിയുടെ വിജയത്തിന് നിതാനം. ചുരുങ്ങിയ ദിവസങ്ങള്ക്കുള്ളില് തന്നെ 39 ലക്ഷം രൂപയാണ് അല്ബിര്റിലെ കുരുന്നുകള് പദ്ധതിക്കായി സ്വരൂപിച്ചത്.
ചടങ്ങില് അല്ബിര്റ് സ്കൂള് കണ്വീനറും സമസ്ത സെക്രട്ടറിയുമായ ഉമര് ഫൈസി മുക്കം അധ്യക്ഷനായി. പാണക്കാട് സയ്യിദ് ശഹീറലി ശിഹാബ് തങ്ങള് പ്രാര്ഥന നടത്തിയ ചടങ്ങില് മുഹമ്മദ് മിന്ഹാജ് ഖിറാഅത്ത് നടത്തി. സമസ്ത വിദ്യാഭ്യാസ ബോര്ഡ് മാനേജര് മോയിന്കുട്ടി മാസ്റ്റര് മുഖ്യപ്രഭാഷണം നടത്തി. അല്ബിര്റ് അഡ്മിനിസ്ട്രേറ്റീവ് ഡയറക്ടര് ഡോ. കെ.പി മുഹമ്മദ് റിപ്പോര്ട്ട് അവതരിപ്പിച്ചു. വീടുകളൊന്നിന്റെ താക്കോലും പ്രമാണങ്ങളുടെ കൈമാറ്റവും സയ്യിദ് ജിഫ്രി മുത്തുക്കോയ തങ്ങള് നിര്വഹിച്ചു. സ്ഥലം നല്കിയ പാറക്ക ഉസ്മാനുള്ള ഉപഹാരവും തങ്ങള് നല്കി.
മറ്റ് താക്കോലുകള് ഉമര് ഫൈസി മുക്കം, സമസ്ത കേന്ദ്ര മുശാവറ അംഗം വി. മൂസക്കോയ മുസ് ലിയാര്, മയ്യന്നൂര് മഹല്ല് പ്രസിഡന്റ് ഉസ്മാന് ഹാജി എന്നിവര് കുടുംബങ്ങള്ക്ക് നല്കി. കുട്ടിഹസന് ദാരിമി, കാഞ്ഞായി മമ്മുട്ടി മുസ് ലിയാര്, എം. ഹസന് മുസ് ലിയാര്, ഇബ്രാഹിം ഫൈസി വാളാട്, എസ്. മുഹമ്മദ് ദാരിമി, ഇബ്രഹിം ഫൈസി പേരാല്, സി.പി ഹാരിസ് ബാഖവി, മുഹിയുദ്ദീന്കുട്ടി യമാനി, ഷൗക്കത്തലി മൗലവി വെള്ളമുണ്ട, ഫൈസല് ദാരിമി, മഹല്ല് പ്രസിഡന്റ് പാറക്ക സുലൈമാന്, സെക്രട്ടറി ആര്.വി നാസര്, മഹല്ല് ഖത്തീബ് മുഹമ്മദ് നുജൂമി തുടങ്ങിവര് സംബന്ധിച്ചു. കട്ടയാട് മഹല്ല് കമ്മിറ്റി ചെയര്മാന് ടി. നാസര് സ്വാഗതം പറഞ്ഞ ചടങ്ങില് പി.സി ഉമര് മൗലവി കുപ്പാടിത്തറ നന്ദി പറഞ്ഞു. ഉഷ വിജയന് എം.എല്.എ, വെള്ളമുണ്ട പഞ്ചായത്ത് പ്രസിഡന്റ് ഖമര് ലൈല തുടങ്ങിയ ജനപ്രതിനിധികള് രാവിലെ വീടുകളിലെത്തി കുടുംബങ്ങള്ക്ക് ആശംസയറിയിച്ചു. കിണറിന് സ്ഥലം നല്കിയ ആയിശ ഹജ്ജുമ്മയെ ഷാളണിയിച്ച് ആദരിച്ചാണ് ഉഷ വിജയന് എം.എല്.എ മടങ്ങിയത്.
June 11, 2026
വെള്ളമുണ്ട: സമസ്തയുടെ തണലില് അല്ബിര്റിലെ കുരുന്നുകളും കോഴിക്കോട് മയ്യന്നൂര് മഹല്ല് കമ്മിറ്റിയും മുണ്ടക.....
