22/09/2026
અરવલ્લીના ધનસુરા તાલુકાના શિનોલ ગામ પાસે SOG પોલીસે પોષ ડોડા ભરેલી એક સ્કોર્પિયો કારને ઝડપી પાડી છે. જોકે, આ કાર્યવાહી દરમિયાન પોલીસ અને આરોપી સામસામે આવી ગયા હતા. આરોપીઓએ પોલીસ પર રિવોલ્વર જેવી બંદૂક તાકતા સ્વબચાવમાં પોલીસે બે રાઉન્ડ ફાયરિંગ કર્યું હતું. આ ગાડી અથડાવાની અને ધમાસાણની ઘટનામાં બે પોલીસ જવાનો ઘાયલ થયા હતા, જ્યારે અંધારાનો લાભ લઈને આરોપીઓ ફરાર થવામાં સફળ રહ્યા હતા.
SOGના પીઆઈ પી.બી ચૌધરીના જણાવાયા અનુસાર જે આરોપીઓ હતા, તે બિશ્નોઇ ગેંગના હોવાની પ્રાથમિક માહિતી આવેલી છે, હાલ બંને આરોપીઓ ફરાર છે.
પોલીસવાન ડ્રાઈવર અને પીઆઈને ઈજા
SOG બાતમીના આધારે કાળા રંગની શંકાસ્પદ સ્કોર્પિયો કારનો પીછો કરી રહી હતી. ગાડીને રોકવાનો સઘન પ્રયાસ કરવામાં આવતા તે પોલીસ વાહન સાથે અથડાઈ હતી. આ દરમિયાન મામલો વધુ ઉગ્ર બન્યો હતો. આરોપીઓએ પોલીસ પર હુમલો કરવાના ઈરાદે રિવોલ્વર જેવી બંદૂક બતાવી હતી, જેના જવાબમાં PI પી.બી. ચૌધરીએ બે રાઉન્ડ ફાયરિંગ કર્યું હતું. આ અથડામણ અને વાહન ભટકાવાના કારણે પોલીસ વાહનના ડ્રાઈવર પ્રકાશસિંહ અને પીઆઈ પી.બી. ચૌધરીને ગંભીર ઈજાઓ પહોંચી હતી.
ઉચ્ચ અધિકારી દોડી ગયા, બોર્ડર એલર્ટ
ઘટનાની ગંભીરતાને ધ્યાનમાં રાખીને જિલ્લા પોલીસ વડા મનોહરસિંહ જાડેજા તાત્કાલિક ઘટનાસ્થળે દોડી ગયા હતા.ગુનેગારો અન્ય રાજ્યમાં ભાગી ન છૂટે તે માટે ગુજરાત-રાજસ્થાન બોર્ડરના ચેકપોસ્ટો પર સઘન તપાસ અને એલર્ટ જાહેર કરવામાં આવ્યું છે. બિશ્નોઈ ગેંગના ફરાર આરોપીઓને ઝડપી લેવા માટે પોલીસ દ્વારા સઘન તપાસ અને વિશેષ કવાયત ચલાવવામાં આવી રહી છે.
