14/09/2026
ਦਾਨੀ ਦਾਨ ਕਰੇ, ਭੰਡਾਰੀ ਦਾ ਪੇਟ ਫਟੇ।
ਇਹ ਗੱਲ ਸੌ ਪਰਸੈਂਟ ਢੁੱਕਦੀ ਹੈ ਪੰਜਾਬ ਰੋਡਵੇਜ਼ ਦੀਆਂ ਬੱਸਾਂ ਉੱਤੇ।
ਪਿਛਲੀ ਸਰਕਾਰ ਵੱਲੋਂ ਦਿੱਤੀ ਅਧਾਰ ਕਾਰਡ ਦੀ ਸਹੂਲਤ ਨੂੰ ਇਸ ਸਰਕਾਰ ਨੇ ਇੰਨ- ਬਿੰਨ ਜਾਰੀ ਰੱਖਿਆ।
ਪਰ ਡਰਾਈਵਰਾਂ ਕੰਡਕਟਰਾਂ ਵੱਲੋਂ ਜ਼ਲੀਲ ਹੁੰਦੀਆਂ ਔਰਤਾਂ ਅੱਡਾ ਇੰਚਾਰਜਾਂ ਅਤੇ ਸੁਪਰਡੈਂਟਾਂ ਵੱਲੋਂ ਵੀ ਬੇਧਿਆਨੀ ਦਾ ਸ਼ਿਕਾਰ ਕਿਉਂ ਹਨ?
ਬਿਨਾਂ ਸ਼ੱਕ ਹਰ ਸਿੱਕੇ ਦੋ ਪਹਿਲੂ ਹੁੰਦੇ ਹਨ।
ਹਰ ਸਹੂਲਤ ਦਾ ਲਾਹਾ ਕਿੰਨਾ ਕੁ ਲੈਣਾ ਚਾਹੀਦਾ ਹੈ?
ਕੀ ਇਹ ਸਹੂਲਤ ਸੱਚਮੁੱਚ ਲਾਹੇਵੰਦ ਹੈ?
ਕੀ ਇਸਦਾ ਨਜਾਇਜ਼ ਫਾਇਦਾ ਉਠਾਇਆ ਜਾ ਰਿਹਾ ਹੈ?
ਬਿਨਾਂ ਸ਼ੱਕ ਇਹ ਸਹੂਲਤ ਵਿਦਿਆਰਥੀਆਂ ਲਈ ਬੇਹੱਦ ਸ਼ਲਾਘਾਯੋਗ ਹੈ, ਸਗੋਂ ਇਹ ਸਹੂਲਤ ਵਿਦਿਆਰਥੀ ਲੜਕਿਆਂ ਨੂੰ ਵੀ ਮਿਲਣੀ ਚਾਹੀਦੀ ਹੈ, ਵਿਦਿਆਰਥੀਆਂ ਦੇ ਪਾਸ ਬਣਾਏ ਜਾਣੇ ਚਾਹੀਦੇ ਹਨ।
ਕੱਚੇ ਕਾਮਿਆਂ ( ਔਰਤਾਂ) ਤੇ ਹੋਰ ਔਰਤਾਂ ਜੋ ਫੈਕਟਰੀਆਂ ਵਗੈਰਾ ਵਿੱਚ ਕੰਮ ਕਰਦੀਆਂ ਉਹਨਾਂ ਲਈ ਬੇਹੱਦ ਲਾਭਦਾਇਕ ਹੈ।
ਕੋਈ ਖੁਦ ਮਰੀਜ਼ ਹੈ ਦਵਾਈ ਲੈਣ ਜਾਣਾ,ਟੈਸਟ ਕਰਾਉਣ ਜਾਣਾ ,
ਕਿਸੇ ਦਾ ਮਰੀਜ਼ ਦਾਖਲ ਹੈ ਰੋਜ਼ ਆਉਣਾ- ਜਾਣਾ ਹੈ, ਚਾਹ ਪਾਣੀ ਲੈ ਕੇ ਉਹਨਾਂ ਲਈ ਰੱਬੀ ਸੌਗਾਤ ਵਰਗੀ ਹੈ ।
ਕਿਸੇ ਲਾਚਾਰ ਮਾਂ ਦਾ ਧੀ ਨੂੰ ਮਿਲਣ ਦਾ ਦਿਲ ਹੈ,ਉਸ ਲਈ ਚੰਗੀ ਗੱਲ ਹੈ।
ਇਹ ਪਾਸਾ ਵੀ ਲੁਕਿਆ ਨਹੀਂ ਜੋ ਮੈਂ ਵੀ ਦੇਖਿਆ, ਮੇਰੇ ਆਪਣੇ ਸ਼ਹਿਰ ਤੋਂ ਹੀ ਕੁਝ ਲੁਟੇਰੀਆਂ ਔਰਤਾਂ ਚੜ੍ਹਦੀਆਂ, ਇੱਕ ਦੋ ਪਰਸ ਕੱਟ ਕੇ ਜਿੱਥੇ ਮਰਜ਼ੀ ਉੱਤਰੋ, ਫਿਰ ਚੜ੍ਹੋ। ਇਹਨਾਂ ਦੀ ਪਛਾਣ ਬੱਸ ਚਾਲਕਾਂ ਨੂੰ ਵੀ ਹੁੰਦੀ ਹੈ ਉਹ ਚਾਹੁਣ ਤਾਂ ਉਹਨਾਂ ਦੀ ਇਤਲਾਹ ਪੁਲਿਸ ਨੂੰ ਦੇਣ ਹਰ ਅੱਡੇ ਹਰ ਬੱਸ ਸਟੈਂਡ ਉੱਤੇ ਉਹਨਾਂ ਦੀ ਫੋਟੋ ਲੱਗੇ, ਲੁਟੇਰਾ ਗਰੋਹ ਆਪੇ ਕਾਬੂ ਆ ਜਾਊ।
ਖੈਰ ਗੱਲ ਕਰਦੇ ਹਾਂ ਇਸ ਸਕੀਮ ਦਾ ਲਾਹਾ ਲੈਂਦੀਆਂ ਔਰਤਾਂ ਨੂੰ ਜ਼ਲੀਲ ਕਰਦੇ ਬੱਸਾਂ ਵਾਲੇ, ਤਰ੍ਹਾਂ ਤਰ੍ਹਾਂ ਦੇ ਕੁਮੈਂਟ ਕਰਦੇ ਹਨ ਔਰਤਾਂ ਉੱਤੇ।
ਜਾਂ ਬੱਸਾਂ ਭਜਾ ਲੈਂਦੇ ਹਨ ਜਾਂ ਅੱਗੇ ਪਿੱਛੇ ਕਰਕੇ ਰੋਕਦੇ ਹਨ।
ਔਰਤਾਂ ਸ਼ਰਮ ਮਹਿਸੂਸ ਕਰਦੀਆਂ ਬੋਲਦੀਆਂ ਨਹੀਂ, ਇਹਨਾਂ ਦੀ ਵੀਡੀਓ ਨਹੀਂ ਬਣਾਉਂਦੀਆਂ। ਮੈਂ ਔਰਤਾਂ ਨੂੰ ਕਹਿਣਾ ਚਾਹੁੰਦੀ ਹਾਂ ਬੋਲੋ, ਇਹਨਾਂ ਦੀਆਂ ਵੀਡੀਓਜ਼ ਬਣਾਓ, ਇਹਨਾਂ ਨੂੰ ਅਕਲ ਆਵੇ,
ਇਹਨਾਂ ਨੂੰ ਇਹ ਹੱਕ ਕਿਸਨੇ ਦਿੱਤਾ ਕਿ ਆਪਣੀ ਮਰਜ਼ੀ ਨਾਲ ਬੱਸ ਲਈ ਅੱਡਾ ਬਣਾਉਣ,ਜੇ ਬਣੇ ਅੱਡੇ ਤੋਂ ਇਹਨਾਂ ਨੂੰ ਕੋਈ ਪ੍ਰੌਬਲਮ ਐ ਤਾਂ ਇਹਨਾਂ ਨੂੰ ਸਸਪੈਂਡ ਹੋਣਾ ਹੀ ਚਾਹੀਦਾ ਹੈ।
ਇਹ ਆਪਣੀਆਂ ਮਾਵਾਂ ਭੈਣਾਂ ਨੂੰ ਏਦਾਂ ਕਰਦੇ ਜਾਂ ਫਿਰ ਇਹ ਸਰਕਾਰ ਨੂੰ ਲਿਖ ਕੇ ਦੇਣ ਕੇ ਸਾਡੀਆਂ ਧੀਆਂ ਭੈਣਾਂ ਮਾਵਾਂ ਇਹ ਸਹੂਲਤ ਨਹੀਂ ਲੈਣਗੀਆਂ।
ਅਖੇ ਥੋਡਾ ਕੁੱਤਾ, ਕੁੱਤਾ ਤੇ ਸਾਡਾ ਕੁੱਤਾ ਟੌਮੀ
ਆਵਦੀ ਮਾਂ ਭੈਣ ਨੇ ਜਾਣਾ ਹੋਵੇ ਉਹਨਾਂ ਨੂੰ ਸਤਿਕਾਰ ਨਾਲ ਬਿਠਾਉਣ ਗੇ ।
ਤੇ ਦੂਸਰਿਆਂ ਦੀਆਂ ਮਾਵਾਂ ਧੀਆਂ ਨੂੰ ਬੱਸਾਂ ਦੇ ਪਿੱਛੇ ਭਜਾਉਣਗੇ।
ਇੱਕ ਔਰਤ ਦੋ ਨਿਆਣਿਆਂ ਨਾਲ ਪੇਕੇ, ਸਹੁਰੇ ਜਾਂ ਦਵਾਈ ਬੂਟੀ ਲੈਣ ਗਈ, ਸੌ ਬਚ ਗਿਆ ਉਸਦਾ ਉਸਨੇ ਨਿਆਣਿਆਂ ਨੂੰ ਕੁਝ ਲੈ ਦਿੱਤਾ, ਇਸ ਨਾਲ ਉਹਨੇ ਕੀ ਵਿਚਾਰੀ ਨੇ ਸੌ ਦਾ ਮਹਿਲ ਪਾ ਲਿਆ?
ਸੋ ਔਰਤਾਂ ਨੂੰ ਹੀ ਨਹੀਂ ਸਾਡੇ ਮਰਦ ਸਮਾਜ ਨੂੰ ਵੀ ਸੋਚਣਾ ਚਾਹੀਦਾ ਹੈ ਕਿ ਇਹਨਾਂ ਨੂੰ ਇਹ ਅਧਿਕਾਰ ਕਿਸਨੇ ਦਿੱਤਾ?
ਮੈਂ ਰਾਜ ਲਾਲੀ ਗਿੱਲ ਮੈਡਮ ਨੂੰ ਬੇਨਤੀ ਕਰਦੀ ਹਾਂ ਕਿ ਸੋ ਮੋਟੋ ਲੈਂਦਿਆਂ ਅਜਿਹੇ ਕਰਮਚਾਰੀਆਂ ਉੱਤੇ ਤੁਰੰਤ ਕਾਰਵਾਈ ਕਰਦਿਆਂ ਉਨ੍ਹਾਂ ਨੂੰ ਸਸਪੈਂਡ ਕੀਤਾ ਜਾਵੇ ਤੇ ਬਣਦੀਆਂ ਸਜ਼ਾਵਾਂ ਦਿੱਤੀਆਂ ਜਾਣ।
ਇਹ ਗੱਲ ਤੋਂ ਵੀ ਮੁਨਕਰ ਨਹੀਂ ਹੋਇਆ ਜਾ ਸਕਦਾ ਕਿ ਪੰਜ ਕੁ ਪਰਸੈਂਟ ਰੋਡਵੇਜ਼ ਦੇ ਮੁਲਾਜ਼ਮ ਆਪਣੀ ਨੌਕਰੀ ਲਈ ਵਫ਼ਾਦਾਰ ਵੀ ਹਨ ਤੇ ਔਰਤਾਂ ਦੀ ਇੱਜ਼ਤ ਵੀ ਕਰਦੇ ਹਨ।
ਜੇ ਮੋਗੇ ਦੀ ਗੱਲ ਕਰੀਏ ਚਾਰ ਐਮਐਲਏ ਹਨ, ਧਰਮਕੋਟ ਵਿੱਚ ਨਵਾਂ ਅੱਡਾ ਬਣਿਆ ਹਰ ਬੱਸ ਰੁਕਦੀ ਜੋ ਸ਼ਲਾਘਾਯੋਗ ਹੈ, ਦੂਸਰੇ ਹਲਕਿਆਂ ਦਾ ਵੀ ਸ਼ਾਇਦ।
ਪਰ ਮੋਗੇ ਸ਼ਹਿਰ ਦੇ ਅੱਡੇ ਵਿੱਚ ਸਭ ਤੋਂ ਵੱਧ ਹਫੜਾ ਦਫੜੀ ਹੁੰਦੀ ਜਦੋਂ ਕਿ ਏਥੇ ਦੀ ਨੇਤਾ ਵੀ ਔਰਤ ਹੈ, ਜਿੱਥੋਂ ਉੱਤਰ ਕੇ ਲੋਕਾਂ ਨੇ ਅੱਡੇ ਤੋਂ ਬਾਹਰ ਆਉਣਾ ਹੁੰਦਾ ਓਥੇ ਪੌੜੀਆਂ ਟੁੱਟੀਆਂ ਕਿਤੇ ਰੱਸੀਆਂ ਬੰਨ੍ਹੀਆਂ, ਕਮਾਲ ਹੈ ਲੀਡਰ ਵੀ ਗਰਕ ਗਏ ਜਵਾਂ ਕੋਈ ਖ਼ਿਆਲ ਨਹੀਂ ਲੋਕਾਂ ਦਾ।
ਸੋ ਰਾਜ ਲਾਲੀ ਗਿੱਲ ਮੈਡਮ ਇਸ ਵੱਲ ਗੌਰ ਕਰਨ।
ਬੇਅੰਤ ਕੌਰ ਗਿੱਲ ਮੋਗਾ
