17/06/2020
आरोग्य सेवकांना धन्यवाद देणा-या ``थँक्यू कोविड योद्धा’’चे
महापौर किशोरी पेडणेकर यांच्याकडून अनावरण!
कोविड संकटाच्या काळात आपल्या जिवाची पर्वा न करता वैद्यकीय कर्मचा-यांनी १२.४४ कोटी महाराष्ट्रवासियांसाठी लढा दिला. या लढ्यात त्यांच्या कार्याला सलाम करण्यासाठी तसेच कृतज्ञता व्यक्त करण्यासाठी २३ वर्षीय कनिष्ठ डॉक्टर डॉ. ऐश्वर्या नायर हिने पुढाकार घेतला आहे. कोविड संकटाच्या काळात डॉक्टर्स, परिचारिका, वॉर्डबॉय, आरोग्यसेवक तसेच ज्यांनी या युद्धात प्राण गमावले आहे, त्यांच्या कुटुंबियांना आर्थिक सहाय्य करण्याच्या हेतूने निधी संकलन केले जाणार आहे. या अभियानाचे नाव `थँक यू कोविड योद्धा’ (टीवायकेवाय) असे आहे. त्याचे अनावरण महापौर किशोरी पेडणेकर यांच्या हस्ते त्यांच्या मुंबईतील येथील महापौर निवासस्थानी करण्यात आले. याप्रसंगी खासदार राहुल शेवाळे, अभिनेते सुशांत शेलार, सुप्रसिद्ध जनसंपर्क अधिकारी राम कोंडिलकर, माध्यम सल्लागार रवि नायर, रामचंद्र प्रतिष्ठानचे अध्यक्ष अशोक शिंदे व सदस्य आदित्य शिंदे उपस्थित होते.
