SaharaNews

19/09/2026

15/09/2026

पीएफ खात्याशी संबंधित छोट्या-छोट्या माहितीसाठी EPFOची वेबसाइट किंवा ॲप वारंवार उघडण्याची गरज भासते. मात्र, आता ही प्रक्रिया आणखी सोपी होण्याची शक्यता आहे. कर्मचारी भविष्य निर्वाह निधी संघटना म्हणजेच EPFO आपल्या सदस्यांसाठी WhatsApp आधारित सेवा सुरू करण्याच्या तयारीत आहे. सध्या ही सुविधा चाचणीच्या टप्प्यात आहे.

WhatsApp वर मिळणार PF खात्याची माहिती

नवीन सेवा सुरू झाल्यानंतर सदस्यांना EPFOच्या सत्यापित WhatsApp क्रमांकावर ‘Hello’ असा मेसेज पाठवून सेवा सुरू करता येईल. त्यानंतर PF शिल्लक, अलीकडील व्यवहार, पासबुक आणि क्लेमची स्थिती यांसारखी माहिती थेट मोबाइलवर मिळण्याची शक्यता आहे.

याशिवाय आधार प्रमाणीकरण आणि DBTशी संबंधित अपडेट्ससाठीही या माध्यमातून मदत मिळू शकते. अधिकाधिक सदस्यांना ही सेवा सहज वापरता यावी यासाठी प्रादेशिक भाषांमध्येही सुविधा उपलब्ध करून देण्याची तयारी असल्याचे सांगितले जात आहे. मात्र, देशभरात सेवा नेमकी कधी सुरू होईल, याबाबत अधिकृत तारीख अद्याप जाहीर झालेली नाही.

PFशी संबंधित आणखी सुविधा होणार डिजिटल

EPFOकडून PF सेवा अधिक सोप्या आणि वेगवान करण्यासाठी इतरही बदल केले जात आहेत. यामध्ये UPIद्वारे PFमधून पैसे काढण्याची सुविधा, नोकरी बदलल्यानंतर PF खात्याचे स्वयंचलित हस्तांतरण आणि छोट्या दाव्यांसाठी ऑटो-सेटलमेंटची मर्यादा वाढवण्याचा समावेश आहे.

नवीन नियमांनुसार आजारपणासाठी PF advance काढण्याची सुविधा उपलब्ध आहे. शिक्षणासाठी 10 वेळा, तर विवाहासाठी 5 वेळा advance घेता येऊ शकतो. घर खरेदी, बांधकाम, गृहकर्ज फेडणे किंवा नूतनीकरणासाठीही ठराविक अटींनुसार advance घेण्याची तरतूद आहे. काही परिस्थितीत सदस्यांना PF शिल्लकीच्या 75 टक्क्यांपर्यंत रक्कम काढता येऊ शकते.

07/09/2026

लहान मुलांमध्ये वाढतोय हार्ट अटॅकचा धोका; ‘या’ ६ महत्त्वाच्या कारणांकडे अजिबात दुर्लक्ष करू नका!
सध्याच्या बदलत्या जीवनशैलीत आणि धावपळीच्या युगात आरोग्याशी संबंधित अनेक गंभीर समस्या समोर येत आहेत. यातही तरुणांसोबतच आता लहान मुलांमध्ये आणि किशोरवयीन मुलांमध्ये हृदयविकाराच्या झटक्यांचे (Heart Attack) प्रमाण चिंताजनक रीतीने वाढताना दिसत आहे. पूर्वी हृदयविकाराचा त्रास हा केवळ वयोवृद्धांमध्ये किंवा वृद्धापकाळात पाहायला मिळायचा, परंतु आजची लहान मुलेही याच्या विळख्यात अडकत आहेत.
लहान वयात हार्ट अटॅकचा धोका वाढण्यामागे जीवनशैलीतील बदल आणि आरोग्याकडे होणारे दुर्लक्ष ही मुख्य कारणे आहेत. पालकांनी याकडे वेळीच लक्ष देणे गरजेचे आहे.
लहान मुलांमध्ये हार्ट अटॅकचा धोका वाढवणारी ६ प्रमुख कारणे:
१. चुकीची खानपान सवयी आणि जंक फूड: आजच्या काळात मुलांना घरातील पौष्टिक जेवणाऐवजी प्रक्रिया केलेले अन्न (Processed Food), फास्ट फूड, पिझ्झा, बर्गर, चिप्स आणि कोल्ड ड्रिंक्सचे व्यसन जडले आहे. या पदार्थांमध्ये सॅच्युरेटेड फॅट्स, साखरेचे प्रमाण आणि सोडियम खूप जास्त असते, ज्यामुळे लहान वयातच कोलेस्ट्रॉल आणि लठ्ठपणाची समस्या वाढते.
२. शारीरिक हालचालींचा अभाव: मैदानी खेळांचे प्रमाण कमी होऊन मुले आता तासनतास मोबाईल, कॉम्प्युटर आणि टीव्ही स्क्रीनसमोर बसून असतात. शरीराला पुर0शी हालचाल किंवा व्यायाम न मिळाल्यामुळे शरीरातील चरबी वाढते आणि रक्ताभिसरणावर विपरीत परिणाम होतो.
३. अतिरीक्त ताणतणाव आणि मानसिक दाब: सध्याच्या स्पर्धात्मक युगात अभ्यासाचा ताण, पालकांच्या अपेक्षा, परीक्षांचे टेन्शन आणि सोशल मीडियावरील आभासी जगाचा प्रभाव यांमुळे लहान मुले आणि किशोरवयीन वयातील मुले मोठ्या प्रमाणावर नैराश्य (Depression) आणि तणावाचा शिकार होत आहेत. मानसिक तणाव हृदयाच्या आरोग्यासाठी अत्यंत घातक असतो.
४. पुरेशी झोप न मिळणे: मुलांच्या वाढत्या वयात शरीराला आणि मनाला विश्रांतीसाठी पुरेशी झोप मिळणे आवश्यक असते. उशिरापर्यंत जागी राहणे आणि अपुरी झोप घेतल्यामुळे शरीरातील हॉर्मोन्सचे संतुलन बिघडते, ज्याचा थेट परिणाम हृदयाच्या कार्यावर होतो.
५. लठ्ठपणा (Obesity): खाण्यापिण्याच्या चुकीच्या सवयी आणि व्यायामाचा अभाव यांमुळे बालपणीच लठ्ठपणाची समस्या वेगाने वाढत आहे. लठ्ठपणामुळे मधुमेह (Diabetes), उच्च रक्तदाब (High Blood Pressure) आणि हृदयविकाराचा धोका कैक पटीने वाढतो.
६. अनुवंशिकता आणि कौटुंबिक इतिहास: जर कुटुंबात आई-वडील किंवा जवळच्या नातेवाईकांना तरुण वयात हृदयविकाराचा त्रास किंवा उच्च रक्तदाबाचा इतिहास असेल, तर मुलांमध्येही अनुवंशिकतेमुळे (Genetics) हा धोका वाढण्याची दाट शक्यता असते.
पालकांनो, काय काळजी घ्याल?
मुलांच्या आरोग्याबाबत कोणतीही तडजोड करू नका. त्यांच्या आहारात हिरव्या पालेभाज्या, फळे, सुका मेवा आणि घरच्या ताज्या अन्नाचा समावेश करा. त्यांना मैदानी खेळांसाठी प्रोत्साहित करा आणि त्यांच्यासोबत वेळ घालवून त्यांचा मानसिक ताण कमी करण्याचा प्रयत्न करा. लहान मुलांच्या आरोग्याची कोणतीही तक्रार आल्यास डॉक्टरांच्या सल्ल्याने नियमित आरोग्य तपासणी (Health Checkup) करणे केव्हाही हिरावह ठरते.

07/09/2026

पिंपरी-चिंचवडमधील बिजलीनगर उपकेंद्रात भीषण शॉर्टसर्किट: स्फोटाच्या मोठ्या आवाजाने नागरिक हादरले

या दुर्घटनेत उपकेंद्रातील कंट्रोल पॅनेलच्या महत्त्वाच्या केबल्स जळून खाक झाल्या असून, 110 व्होल्ट डीसी वीजपुरवठा पुरवणारे कंट्रोल रिले पॅनेल पूर्णपणे फेल झाले आहे

उपकेंद्रातील 30 पैकी 7 ते 8 महत्त्वाचे फिडर बंद पडल्यामुळे शहरातील विविध भागांचा वीजपुरवठा खंडित झाला असून, नागरिकांना नाहक त्रासाचा सामना करावा लागत आहे

07/09/2026

सेल (SAIL) कर्मचाऱ्यांना खूशखबर: महागाई भत्त्यात २.९ टक्क्यांची मोठी वाढ, सणासुदीच्या तोंडावर हजारो कर्मचाऱ्यांना दिलासा!
सणासुदीच्या तोंडावर देशातील आघाडीची महारत्न कंपनी असलेल्या स्टील अथॉरिटी ऑफ इंडिया लिमिटेडने (SAIL) आपल्या ५४ हजारहून अधिक अधिकारी आणि कर्मचाऱ्यांसाठी मोठा दिलासादायक निर्णय घेतला आहे. केंद्र सरकारच्या पोलाद मंत्रालयांतर्गत येणाऱ्या 'सेल'ने कर्मचाऱ्यांच्या महागाई भत्त्यात (DA) थेट २.९ टक्क्यांची वाढ जाहीर केली आहे.
या निर्णयामुळे कर्मचाऱ्यांचा महागाई भत्ता आता ५५.७ टक्क्यांवरून थेट ५८.६ टक्क्यांवर पोहोचला आहे. विशेष म्हणजे, ही वाढ १ ऑक्टोबर २०२६ पासून लागू होणार असून, कर्मचाऱ्यांना ऑक्टोबर महिन्याच्या सॅलरी स्लिपमध्ये या वाढीव डीएचा लाभ पाहायला मिळेल.
कुणाला मिळणार या वाढीचा फायदा?
कंपनीच्या बोकारो स्टील प्लांटसह देशातील सर्व युनिट्स, प्लांट्स, खाणी (Mines) आणि प्रशासकीय कार्यालयांत कार्यरत असणाऱ्या सर्व अधिकारी आणि कर्मचाऱ्यांना ही पगारवाढ थेट मिळणार आहे.
वाढत्या महागाईचा विचार करून निर्णय:
सध्या वाढती महागाई, अन्नधान्य आणि जीवनावश्यक वस्तूंच्या वाढलेल्या किमती लक्षात घेऊन कामगार विभागाच्या निर्देशानुसार चालू आर्थिक वर्षातील या तिमाहीसाठी डीए वाढवण्यात आला आहे. यापूर्वीच्या तिमाहीत महागाई भत्त्यात १.६ टक्क्यांची वाढ झाली होती, जी आता वाढवून २.९ टक्के करण्यात आली आहे.
पुढील वेतन सुधारणा जानेवारी २०२७ मध्ये:
'सेल' ही देशातील सर्वात मोठी पोलाद उत्पादक कंपनी असून, यात भारत सरकारची थेट ६५ टक्के हिस्सेदारी आहे. कंपनीच्या नियमानुसार, दर १० वर्षांनी अधिकारी आणि कर्मचारी या दोन्ही संवर्गांसाठी वेतन सुधारणा (Wage Revision) लागू केली जाते. त्यानुसार, पुढील मोठी वेतन सुधारणा १ जानेवारी २०२७ रोजी होणार आहे. मात्र, त्यापूर्वीच डीए मध्ये झालेल्या या २.९ टक्क्यांच्या वाढीमुळे ऐन सणासुदीच्या काळात कर्मचाऱ्यांमध्ये आनंदाचे वातावरण पाहायला मिळत आहे.

07/09/2026

मुंबई उच्च न्यायालयाचा मोठा निर्णय: पेन्शनधारक पालक मुलांना घरातून बेदखल करू शकत नाहीत!
आर्थिकदृष्ट्या सक्षम असणारे आणि नियमित पेन्शन मिळत असलेले पालक आपल्या मुलांना घरातून बेदखल करू शकत नाहीत, असा अत्यंत महत्त्वपूर्ण आणि मोठा निकाल मुंबई उच्च न्यायालयाच्या नागपूर खंडपीठाने दिला आहे. न्यायमूर्ती नंदेश देशपांडे यांनी स्पष्ट केले की, अशा प्रकरणांमध्ये संबंधित पालकांना 'पालक व ज्येष्ठ नागरिकांची देखभाल आणि कल्याण कायद्या'चा आधार घेऊन मुलांना घराबाहेर काढण्याचा लाभ घेता येणार नाही.
नेमके प्रकरण काय?
नागपूरजवळील दत्तवाडी येथे राहणाऱ्या एका ६५ वर्षीय वडिलांचे आपल्या मुलगा आणि सुनेसोबत सतत कौटुंबिक वाद सुरू होते. या वादाला कंटाळून वडिलांनी उपविभागीय अधिकाऱ्यांच्या न्यायाधिकरणाकडे ज्येष्ठ नागरिक कायद्यांतर्गत अर्ज दाखल केला आणि मुलाला स्वतःच्या घरातून बेदखल करण्याची मागणी केली.
दोन स्तरांवर अर्ज फेटाळला:
उपविभागीय न्यायाधिकरणाने वडिलांचा हा अर्ज फेटाळून लावला होता. या निर्णयाविरोधात वडिलांनी जिल्हाधिकाऱ्यांकडे दाद मागितली, मात्र जिल्हाधिकाऱ्यांनीही खालच्या न्यायालयाचा निर्णय कायम ठेवला. अखेर वडिलांनी या प्रकरणी मुंबई उच्च न्यायालयाच्या नागपूर खंडपीठात याचिका दाखल केली.
उच्च न्यायालयाचा महत्त्वाचा युक्तिवाद:
उच्च न्यायालयाने सुनावणीदरम्यान स्पष्ट केले की, याचिकाकर्त्या वडिलांना स्वतःचे नियमित निवृत्तीवेतन (Pension) मिळते आणि याशिवाय त्यांच्या दिवंगत पत्नीचे कुटुंब निवृत्तीवेतन (Family Pension) सुद्धा मिळते. त्यामुळे ते स्वतःचा सांभाळ करण्यासाठी आर्थिकदृष्ट्या पूर्णपणे सक्षम आहेत.
ज्या पालकांकडे स्वतःचा उदरनिर्वाह चालवण्यासाठी आणि स्वतःची काळजी घेण्यासाठी स्वतःचे उत्पन्न किंवा पेन्शन उपलब्ध आहे, त्यांना या कायद्याचा गैरवापर करून मुलांना घराबाहेर काढण्याचा अधिकार नाही, असे निरीक्षण नोंदवत न्यायालयाने वडिलांची याचिका फेटाळून लावली आणि त्यांना दिलासा देण्यास नकार दिला.