09/09/2026
आदित्य ठाकरेंनी ठाण्यात उभारण्यात येणाऱ्या एआय डेटा सेंटर परिसराला भेट दिली. तसंच, ह्या सेंटरला विरोध करणाऱ्या स्थानिक नागरिकांची देखील भेट घेतली ! ठाणे रिंग मेट्रो आणि संजय गांधी नॅशनल पार्कच्या मास्टर प्लॅनला विरोध करणाऱ्या नागरिकांशीही आदित्य ठाकरेंनी संवाद साधला.
शहराच्या मध्यभागी सक्तीने लादल्या जाणाऱ्या ह्या एआय डेटा सेंटरच्या विरोधात ठाणेकर एकत्र आले आहेत.
ठाणेकरांना सहन कराव्या लागणाऱ्या ९५ डेसिबलपेक्षा अधिक आवाजाच्या सततच्या त्रासाव्यतिरिक्त, ह्या प्रकल्पामुळे होणारा प्रचंड वीज आणि पाण्याचा वापर, बॅकअपसाठी लागणारे १९३ डिझेल जनरेटर, ५ लाख टन डिझेलचा साठा, कुलिंग प्लांटमधून बाहेर पडणारी उष्णता, ह्यामुळे ठाणे शहर राहण्यायोग्य राहणार नाही, असं आदित्य यांनी म्हटलं आहे.
आदित्य ठाकरेंनी म्हटलंय की ह्या एआय डेटा सेंटरला 'रेड इंडस्ट्री'चा दर्जा असलेल्या औद्योगिक क्षेत्रातच स्थलांतरित करायला हवं. इथल्या स्थानिक नागरिकांनी याआधी रासायनिक कारखान्याविरुद्ध लढा दिला होता आणि आता त्यांच्यावर ह्या अक्राळविक्राळ प्रकल्पाची सक्ती केली जात आहे.
विशेष म्हणजे, ह्या प्रकल्पामुळे पहिल्या टप्प्यात ७५ आणि दुसऱ्या टप्प्यातही केवळ ७५ च नोकऱ्या निर्माण होणार आहेत.
राजकारण्यांना यातून प्रचंड मलिदा मिळत असेल, पण त्यासाठी ठाणेकरांचे जीवनमान का उद्धवस्त करायचे?
त्याचप्रमाणे, आधीच हजारो झाडांची बेसुमार आणि विचारशून्य कत्तल उघड्या डोळ्यांनी पाहणाऱ्या ठाणेकरांना, आता ह्या चुकीच्या नियोजनाच्या पॉड ट्रान्सपोर्ट आणि ठाणे रिंग मेट्रोमुळे आणखी ५००० झाडे आणि हजारो खारफुटीची कत्तल पाहावी लागणार आहे. हा प्रकल्प केवळ पैशांचा अपव्यय नसून नियोजनाच्या दृष्टीने अत्यंत मूर्खपणाचा आहे.
कोणत्याही 'लास्ट माईल कनेक्टिव्हिटी'साठी पादचारी मार्ग योग्य असणे आवश्यक आहे. पण लास्ट माईल कनेक्टच्या नावाखाली पॉड ट्रान्सपोर्ट किंवा रिंग मेट्रो घुसवण्याची ही फॅशन राजकीय नेतृत्त्वाचा मूर्खपणा दर्शवते.
राजकीय खिसे भरण्यासाठी आणि लाडक्या कंत्राटदारांना पोसण्यासाठी, जनतेच्या कराच्या पैशांची होणारी ही अतार्किक, अनावश्यक, उधळपट्टी आणि लूटमार, याला आमचा ठाम विरोध आहे.
