15/10/2021
মহাপুৰুষ শংকৰদেৱে যি ধৰ্মীয় অভ্যুত্থানৰ সূচনা কৰিলে সেই অভ্যুত্থানত তেওঁ নিজে এজন কবি, গীতিকাৰ, নাট্যকাৰ, চিত্ৰকৰ, ভাস্কৰ, স্থপিত,
আৱিষ্কাৰক, অভিযন্তা, বিজ্ঞানী, বাস্তুশাস্ত্ৰৰো প্ৰৱক্তা হৈ অসমৰ মৃতপ্ৰায় সমাজ-সংস্কৃতিক এটা নতুন জীৱন দান দিলে ৷
'চিহ্নযাত্ৰা 'কৰিবলৈ গৈ হেঙুল হাইতাল ৰঙেৰে বোলাই সাত বৈকুণ্ঠৰ চিত্ৰ আঁকোতা, মুখা প্ৰয়োগ কৰোতা, গুণমালা পুথি ভৰাই পঠোৱা ভুৰুকাত অঁকা চিত্ৰত ৰঙৰ বোল দিওঁতা শংকৰদেৱ প্ৰকৃতাৰ্থত এজন ৰঙৰ আৱিষ্কাৰক, বিজ্ঞানী, ৰসায়নবিদতকৈ কম আছিলনে?
নামঘৰ প্ৰতিষ্ঠা বেলিকা দিশ নিৰ্ণয়কে আদিকৰি খুটা চঁচা, কামি তৈয়াৰ কৰি নামঘৰ নিৰ্মাণ কৰালৈকে, টেম্বুৱনীৰ পানী বান্ধ মাৰি নিয়ন্ত্ৰণ কৰালৈকে যি অভিযান্ত্ৰিক আৰু কাৰিকৰী দক্ষতা, তাক আমি শিক্ষিত সমাজে কেৱল ঐশ্বৰিকত্বৰ পাঠ পঢ়ি এক বিশ্বজনীন দক্ষতাক ধৰ্মীয় সংকীৰ্ণতাৰ মেৰপাকত টানা আজোৰা কৰি থাকিলে হ'ব নে?
আমি তেখেতৰ কৃতিত্ব বিশ্লেষণ কৰিবলৈ গৈ তুলনা কৰো লিউনাৰ্দো দা ভিঞ্চিৰ লগত, মাৰ্তিন লুথাৰৰ লগত, মাইকেল এঞ্জেল'ৰ লগত৷ কিন্তু আমাৰ শংকৰদেৱ অতুলনীয়৷ এই বিশ্ব বিখ্যাত মনীষী সকলতকৈ সৰ্ব গুণে শ্ৰেষ্ঠ৷ আমাৰ মহাপুৰুষ জনাৰ কৃতিত্বক পুনৰীক্ষণ, বিশ্লষণ কৰিবলৈ হলে বেজবৰুৱা, জ্যোতিপ্ৰসাদ, বাণীকান্ত, বিষ্ণুপ্ৰসাদে আগবঢ়োৱা তাত্ত্বিক, শৈল্পীক, দাৰ্শনিক দিশবোৰৰ যথাৰ্থতা আৰু সাৰ্থকতাৰ সমূহীয়া উপলব্ধি আৰু বাস্তৱায়নৰ প্ৰয়োজন৷
▼ মহাপুৰুষ-মহামানৱ শ্ৰীমন্তশংকৰদেৱৰ আবিৰ্ভাৱ মহোৎসৱত গুৰুজনালৈ সশ্ৰদ্ধ প্ৰণিপাত জনাইছোঁ...!
সেৱাৰে
গীতালি কেওট বৰা।
