21/06/2026
രാജാക്കാടിന്റെ #ശശിചേട്ടൻ ബാക്കി വെച്ചത്
...തെരുവിലെ സദാരണക്കാരൻ ആയിരുന്ന അസാധാരണ മനുഷ്യൻ.....
തെരുവിൽ അന്തിയുറങ്ങിയിരുന്ന ഒരു മനുഷ്യൻ വിടപറയുമ്പോൾ തന്റെ പഴയ തുണിസഞ്ചിയിൽ ബാക്കിവെച്ചത് ഒരു ലക്ഷത്തിലധികം രൂപ
രാജാക്കാട് ടൗണിലെ തിരക്കുകൾക്കിടയിലൂടെ, ആരോടും പരിഭവമില്ലാതെ, ഒരക്ഷരം പോലും മിണ്ടാതെ നടന്നുനീങ്ങിയിരുന്ന പുതുശേരിയിൽ ശശി എന്ന അറുപത്തിനാലുകാരന്റെ ഓർമ്മകളിലാണ് നാടിപ്പോൾ. വൃക്കസംബന്ധമായ അസുഖങ്ങളെ തുടർന്ന് തൊടുപുഴ ജില്ലാ ആശുപത്രിയിൽ ആയിരുന്നു ശശിയുടെ അന്ത്യം.
എന്നാൽ, അദ്ദേഹത്തിന്റെ മരണശേഷം രാജാക്കാട് പഞ്ചായത്ത് അധികൃതർ നടത്തിയ തിരച്ചിലിലാണ് കണ്ടുനിന്നവരുടെ കണ്ണ് നിറയിച്ച ആ കാഴ്ച കണ്ടത്. ടൗണിലെ ജൂവലറിയോട് ചേർന്നുള്ള ഒരു ചെറിയ മുറിയിലായിരുന്നു ശശി തന്റെ തുണിസഞ്ചി സൂക്ഷിച്ചിരുന്നത്.ആ പഴയ സഞ്ചി തുറന്ന അധികൃതർ ഞെട്ടിപ്പോയി. കഠിനാധ്വാനം ചെയ്തും പലരും സഹായമായി നൽകിയും കിട്ടിയ തുക ഒന്നിനും ചിലവാക്കാതെ ആ പാവം മനുഷ്യൻ കൂട്ടിവെച്ചിട്ടുണ്ടായിരുന്നു. 500-ന്റെയും 200-ന്റെയും 100-ന്റെയുമെല്ലാം നോട്ടുകളായി 1,15,751 (ഒരു ലക്ഷത്തി പതിനയ്യായിരത്തി എഴുന്നൂറ്റി അമ്പത്തൊന്ന്) രൂപയാണ് ആ സഞ്ചിയിൽ അവശേഷിച്ചിരുന്നത്.
#രാജാക്കാട്ടുകാർക്ക് അത്ഭുതമായിരുന്ന ശശി
നാട്ടിൽ എവിടെയൊരു മരണം നടന്നാലും, എത്ര ദൂരത്താണെങ്കിലും ശശി അവിടെ കൃത്യമായെത്തും. കയ്യിലൊരു മൊബൈൽ ഫോണില്ല, ആരോടും സംസാരിക്കാറുമില്ല; എന്നിട്ടും ഈ മരണവാർത്തകൾ ശശി എങ്ങനെ അറിഞ്ഞിരുന്നു എന്നത് ഇന്നും നിഗൂഢതയാണ്.
മരണവീടുകളിൽ എത്തിയാൽ ചടങ്ങുകൾ പൂർത്തിയാകുന്നതുവരെ ഒരു നിശബ്ദ സാക്ഷിയായി അദ്ദേഹം ഉണ്ടാകും. സംസ്കാരം കഴിഞ്ഞ് എല്ലാവരും പിരിഞ്ഞുപോയ ശേഷമേ അവിടെനിന്ന് മടങ്ങാറുള്ളൂ.
മറ്റുള്ളവരുടെ വേർപാടിൽ കണ്ണീരാകാൻ ഓടിയെത്തിയിരുന്ന ശശിക്ക് വിട നൽകുമ്പോൾ രാജാക്കാട് ടൗണിന്റെ നെഞ്ച് ഇടറി . ഇനി ഒരു മരണവീടുകളിലും ആരും തിരക്കാതെ വന്നിരിക്കാൻ ആ നിശബ്ദ സാന്നിധ്യം ഉണ്ടാകില്ല.
