08/06/2026
तुळजाभवानी मंदिर परिसरात थुंकणारे आणि कचरा टाकणाऱ्यांवर ५०० रुपयांचा दंड
तुळजापूर – श्री तुळजाभवानी मंदिर परिसरात स्वच्छता राखण्यासाठी मंदिर प्रशासनाने कठोर पाऊल उचलले असून, परिसरात थुंकणे किंवा कचरा टाकणाऱ्या व्यक्तींवर आता दंडात्मक कारवाई करण्यात येणार आहे. यासाठी मंदिर संस्थानच्या वतीने दोन विशेष पथकांची स्थापना करण्यात आली आहे.
मंदिर प्रशासनाकडून वारंवार सूचना देऊनही काही व्यक्तींकडून मंदिर परिसरात थुंकणे तसेच कचरा टाकण्याचे प्रकार सुरू असल्याचे निदर्शनास आले आहे. त्यामुळे मंदिर परिसर स्वच्छ आणि पवित्र राखण्याच्या उद्देशाने ही कारवाई हाती घेण्यात आली आहे.
मंदिर संस्थानच्या सहायक स्वच्छता निरीक्षकांच्या नेतृत्वाखाली दोन स्वतंत्र पथके कार्यरत राहणार आहेत. ही पथके सकाळी ६ ते दुपारी २ आणि दुपारी २ ते रात्री १० अशा दोन शिफ्टमध्ये मंदिर परिसरात गस्त घालून नियमांचे उल्लंघन करणाऱ्यांवर कारवाई करतील.
या पथकांमध्ये मंदिर संस्थानचे चार शिपाई तसेच सुरक्षा सेवा पुरवठादार कंपनीच्या दोन सुरक्षा रक्षकांचा समावेश करण्यात आला आहे. मंदिर परिसरात थुंकणे, घाण करणे किंवा कचरा टाकताना आढळणाऱ्या व्यक्तींवर ५०० रुपयांचा दंड आकारण्यात येणार असल्याचे प्रशासनाने स्पष्ट केले आहे.
दरम्यान, श्री तुळजाभवानी मंदिर परिसराची स्वच्छता आणि पावित्र्य कायम राखण्यासाठी सर्व भाविकांनी नियमांचे पालन करून मंदिर प्रशासनाला सहकार्य करावे, असे आवाहन मंदिर संस्थानच्या वतीने करण्यात आले आहे.
