26/08/2025
हरितालिका तीजको पावन अवसरमा हार्दिक मंगलकामना 🙏
भाद्र शुक्ल तृतीयाको दिन मनाइने हरितालिका तीज हाम्रो संस्कृति, आस्था र परम्पराको उज्यालो प्रतीक हो। तीज विशेषतः दिदीबहिनीहरूको श्रद्धा, भक्ति र समर्पणसँग जोडिएको पर्व भए पनि यसले परिवार, समाज र संस्कृतिलाई एकताबद्ध बनाउने गहिरो सन्देश बोकेको छ।
विवाहित महिलाहरूले पतिका दीर्घायु र सुखमय जीवनको कामना गर्दै व्रत बस्ने गर्छन् भने अविवाहित युवतीहरूले योग्य वर प्राप्त होस् भनी भगवान महादेव र पार्वती माताको आराधना गर्छन्। यसरी तीज आस्था मात्र नभई श्रद्धा, विश्वास र आत्मसमर्पणको प्रतीक बनेको छ।
इतिहासमा पार्वती माताले भगवान शिवलाई पति स्वरूप पाउन कठोर तपस्या गर्नुभएको कथा तीजको आत्मा हो। यही कारणले महिलाहरूले यस दिन व्रत बस्ने, पूजा गर्ने, गीत–नृत्यमार्फत आनन्द व्यक्त गर्ने चलन आजसम्म रहदै आएको छ।
आधुनिक समाजमा तीज नारीको मात्र पर्व नभई समानता, अधिकार र अस्तित्व को आवाज पनि हो। यो पर्वले दिदीबहिनीहरूलाई आफ्ना दु:ख–सुख बाँड्ने, आपसी माया र स्नेह प्रगाढ बनाउन अवसर दिन्छ। परदेशमा रहेकाहरूका लागि तीज आफ्ना जरा र संस्कृतिसँग पुनः जोडिने माध्यम बनेको छ।
यस अवसरमा मेरो हार्दिक कामना छ—सम्पूर्ण दिदीबहिनीहरूको जीवनमा खुशी, स्वास्थ्य र समृद्धि रहोस्। हाम्रो समाजमा आपसी प्रेम, भाईचारा र सद्भाव सधैं कायम रहोस्। संस्कृति र परम्परा भावी पुस्ताले पनि गर्वका साथ आत्मसात् गरून्।
हरितालिका तीज २०२५ को मंगलमय शुभकामना! 🙏
-पुरण कुमार गुरूङ
माननीय मन्त्री
सिक्किम सरकार
