02/09/2026
# माजी सभापती रवींद्र नटे यांची राष्ट्रवादी काँग्रेसच्या तळा तालुका अध्यक्षपदी नियुक्ती
# तळा तालुक्याचे माजी सभापती मा. श्री. रविंद्रजी नटे साहेब यांची तळा तालुका राष्ट्रवादी काँग्रेस पक्षाच्या अध्यक्षपदी निवड झाल्याबद्दल मनःपूर्वक हार्दिक अभिनंदन!
रायगड मत/प्रतिनिधी
राष्ट्रवादी काँग्रेस (अजित पवार गट)च्या तळा तालुका अध्यक्षपदी तळा पंचायत समितीचे माजी सभापती रवींद्र गोविंद नटे यांची नियुक्ती करण्यात आली आहे. या नियुक्तीमुळे तळा तालुक्यात राष्ट्रवादी काँग्रेसच्या संघटनात्मक राजकारणाला नवी दिशा मिळण्याची शक्यता असून, नटे यांच्या नेतृत्वाची खरी कसोटी आगामी काळात लागणार आहे.
तळा तालुक्यात राष्ट्रवादी काँग्रेसची राजकीय ताकद लक्षणीय आहे. २५ ग्रामपंचायतींसह नगरपंचायतीवर राष्ट्रवादी काँग्रेसची सत्ता असल्याने तालुक्याच्या राजकारणात पक्षाचा प्रभाव कायम राहिला आहे. त्यामुळे केवळ तालुका अध्यक्षपदाची जबाबदारी स्वीकारणे एवढेच नटे यांच्यासमोर आव्हान नसून, राष्ट्रवादीचा हा राजकीय गड कायम राखण्याची मोठी जबाबदारी त्यांच्या खांद्यावर आली आहे.
मात्र, यावेळी राजकीय परिस्थिती राष्ट्रवादीसाठी तितकीशी सोपी राहिलेली नाही. रायगड जिल्ह्याचे पालकमंत्रीपद शिवसेनेकडे गेल्याने तळा तालुक्यातही शिवसेनेचे राजकीय आव्हान अधिक तीव्र होण्याची शक्यता आहे.
पालकमंत्रीपदाच्या माध्यमातून शिवसेनेला जिल्ह्यातील संघटन मजबूत करण्याची आणि स्थानिक पातळीवर राजकीय समीकरणे बदलण्याची संधी मिळणार आहे. या पार्श्वभूमीवर राष्ट्रवादी काँग्रेससमोर आपली पारंपरिक ताकद टिकवून ठेवण्याबरोबरच कार्यकर्त्यांना एकसंघ ठेवण्याचे आव्हान आहे. पक्षशिस्त, संघटनात्मक बांधणी, कार्यकर्त्यांमधील समन्वय आणि तळागाळातील जनसंपर्क यावर नटे यांच्या नेतृत्वाची पुढील वाटचाल अवलंबून राहणार आहे.
सत्तेत असतानाही अंतर्गत मतभेद, स्थानिक राजकीय समीकरणे आणि बदलते सत्ताकेंद्र यांचा सामना करणे आवश्यक असते. त्यामुळे नटे यांना पक्षातील सर्व गटांना सोबत घेऊन संघटन मजबूत करण्याचे आव्हान पेलावे लागणार आहे. जुन्या कार्यकर्त्यांसोबतच नव्या पिढीतील कार्यकर्त्यांना जोडणे आणि आगामी राजकीय आव्हानांसाठी पक्षाची यंत्रणा सज्ज करणे ही त्यांच्यासाठी महत्त्वाची जबाबदारी ठरणार आहे.राष्ट्रवादी काँग्रेसकडे असलेली सत्ता आणि राजकीय प्रभाव टिकणार की पालकमंत्रीपदाच्या माध्यमातून शिवसेना तळा तालुक्यात नवे राजकीय समीकरण उभे करणार? याची उत्सुकता आता निर्माण झाली आहे.त्यामुळे नवनिर्वाचित तालुका अध्यक्ष रवींद्र नटे या आव्हानाला कोणत्या रणनीतीने सामोरे जातात, राष्ट्रवादीचा गड कसा मजबूत करतात आणि कार्यकर्त्यांना किती प्रभावीपणे एकत्र आणतात, याकडे संपूर्ण तळा तालुक्याचे लक्ष लागले आहे.
दरम्यान, तालुका अध्यक्षपदी नियुक्ती झाल्यानंतर रवींद्र नटे यांनी राष्ट्रवादी काँग्रेसचे प्रदेश अध्यक्ष खा.सुनिल तटकरे,महिला बालकल्याण मंत्री ना.अदिती तटकरे, आ.अनिकेत तटकरे, जिल्हाध्यक्ष सुधाकर घारे यांचे आभार मानले आहेत पक्षाने आपल्यावर सोपविलेली जबाबदारी ही विश्वासाने दिलेली असून, ही जबाबदारी योग्य पद्धतीने आणि प्रामाणिकपणे पार पाडू, असा विश्वास त्यांनी व्यक्त केला.पक्षातील सर्व पदाधिकारी व कार्यकर्त्यांना सोबत घेऊन संघटन मजबूत करण्यावर भर देणार असल्याचेही नटे यांनी स्पष्ट केले.
प्रदीर्घ राजकीय अनुभवाचा, नेतृत्वगुणांचा व संघटन कौशल्याचा पक्षाला निश्चितच मोठा फायदा होईल. आपल्या सक्षम नेतृत्वाखाली राष्ट्रवादी काँग्रेस पक्षाची तळा तालुक्यात संघटनात्मक ताकद अधिक बळकट होवो आणि पक्षाला नवी उंची मिळो, ही मनःपूर्वक शुभेच्छा!
आपल्या पुढील यशस्वी वाटचालीस हार्दिक शुभेच्छा!
