08/04/2026
ਮੇਰੇ ਦੋਸਤ ਮਿੱਤਰ ਜੋ ਬਿਗਾਨੇ ਸ਼ਹਿਰ ਨੌਕਰੀ ਕਰਨ ਜਾਂਦੇ ਹਨ, ਆਪਣੇ ਸ਼ਹਿਰ ਨੂੰ ਵੀ ਪਿਆਰਦੇ ਹਨ ਤੇ ਨੌਕਰੀ ਵਾਲੇ ਸ਼ਹਿਰ ਨੂੰ ਵੀ ਅਪਣਾਉਂਦੇ ਹਨ, ਉਨ੍ਹਾਂ ਦੀ ਮੰਗ ਤੇ ਇੱਕ ਛੋਟੀ ਜਿਹੀ ਨਜ਼ਮ ਪੇਸ਼ ਹੈ।
ਨੌਕਰੀ ਸ਼ਹਿਰ ਬਿਗਾਨੇ
ਦਰਜਾ - ਏ- ਅਵੱਲ ਦਿੱਤਾ ਏ ਸ਼ਹਿਰ ਬਿਗਾਨੇ ਨੂੰ,
ਨੌਕਰੀ ਨੇ ਘੱਲ ਦਿੱਤਾ ਏ ਸ਼ਹਿਰ ਬਿਗਾਨੇ ਨੂੰ।
ਆਪਣੇ ਸ਼ਹਿਰ ਦੇ ਸਾਰੇ ਫੁੱਲ ਮੈਂ ਕੱਠੇ ਕਰ ਲਏ ਨੇ,
ਮਹਿਕਣ ਦਾ ਵੱਲ ਦਿੱਤਾ ਏ ਸ਼ਹਿਰ ਬਿਗਾਨੇ ਨੂੰ।
ਮੈਂ ਤਾਂ ਬੱਸ ਦੋ ਕੁ ਛੁੱਟੀਆਂ ਕੱਟਣ ਆਇਆ ਸਾਂ,
ਮੁੜ ਕੇ ਰਾਹੀ ਚੱਲ ਦਿੱਤਾ ਏ ਸ਼ਹਿਰ ਬਿਗਾਨੇ ਨੂੰ।
ਆਬੋ - ਹਵਾ ਤਾਂ ਮੇਰੇ ਸ਼ਹਿਰ ਦੇ ਵਾਂਗਰ ਹੈ ਤਾਂਹੀਓ,
ਨਾਂਅ ਨਵਾਂ ਅੱਜ-ਕੱਲ੍ਹ ਦਿੱਤਾ ਏ ਸ਼ਹਿਰ ਬਿਗਾਨੇ ਨੂੰ।
ਆਪਣੇ ਸ਼ਹਿਰੋਂ ਰੰਗ ਚੁਰਾ ਕੇ ਲਿਆਇਆ ਵਾਂ,
ਰੰਗ ਗੁਲਾਬੀ ਮਲ ਦਿੱਤਾ ਏ ਸ਼ਹਿਰ ਬਿਗਾਨੇ ਨੂੰ।
✍🏻ਅੰਜੂ ਬਾਲਾ ਤਬੱਸੁਮ
