24/06/2025
مشاورتی اجلاس کا مقصد ملی مسائل کو حل کرنا ہے: مولانا محمود مدنی
جمعیۃ علماء بہار کا دوسرا صوبائی ششماہی مشاورتی اجلاس چار نشستوں میں منعقد
ضلعی صدور و نظماء سمیت مدعوین خصوصی کی شرکت، مختلف اہم امور پر تبادلہ خیال
پٹنہ 24/ جون
ہندوستانی مسلمانوں کی سب سے متحرک اور فعال تنظیم جمعیۃ علماء ہند کی صوبائی شاخ جمعیۃ علماء بہار کا دوسرا صوبائی ششماہی مشاورتی اجلاس گذشتہ دنوں پٹنہ کے ہوٹل K.L.7 میں چار نشستوں میں منعقد ہوا، مجموعی طور پر اجلاس کی صدارت صدر جمعیۃ علماء بہار حضرت مولانا مفتی جاوید اقبال صاحب قاسمی دامت برکاتہم نے فرمائی، جس میں انھوں نے افتتاحی کلمات پیش کرتے ہوئے کہا: کہ ہم اپنے تمام ضلعی صدور و نظماء اور مدعوین خصوصی کا شکریہ ادا کرتے ہیں کہ جنھوں نے اپنے تمام تر مصروفیات کو ترک کے یہاں حاضر ہوئے اور اجلاس کو کامیابی سے ہمکنار کیا،آپ نے کہا کہ جمعیۃ علماء خیر الناس من ینفع الناس کے تقاضے پر عمل کرتی ہےاور یہ جماعت بزرگوں کی قائم کردہ جماعت ہے جو روز اول سے ہی اپنے مشن اور مقصد پر قائم ہے_
اجلاس کی نظامت جمعیۃ علماء بہار کے جنرل سکریٹری اور جامعہ قاسم العلوم تریپولیہ عالم گنج پٹنہ کے بانی و مہتمم حضرت مولانا محمد ناظم صاحب قاسمی دامت برکاتہم نے انجام دیا_
مہمان خصوصی کی حیثیت سے قائد جمعیۃ،صدر جمعیۃ علماء ہند حضرت مولانا سید محمود اسعد مدنی صاحب دامت برکاتہم شریک ہوئےاور کلیدی خطاب فرمایا،انھوں نےکہا: کہ اس طرح کے مشاورتی اجلاس کا مقصد ہے کہ ہم اپنی پریشانیوں اور مسائل کو سمجھیں اور اس کو حل کرنے کی کوشش کریں، آج ملک میں تبدیلیاں بڑی تیزی کے ساتھ آرہی ہیں اسلئےایسے موقع پر تنظیم سے جڑے لوگوں کی ذمہ داریاں بڑھ جاتی ہیں کہ ملی مسائل کو کیسے حل کیا جائے؟ قوم و ملت کے مسائل اور پریشانیوں کو قوم کے رہنما اور تنظیم سے جڑے افراد ہی حل کر سکتے ہیں،کیونکہ ان کے پاس مضبوط لائحہ عمل ہوتا ہے اور جمعیۃ علماء ہند ایسے کاموں کو بخوبی انجام دیتی ہے_
مزید صدر محترم نے ضلعی صدور و نظماء سے خطاب کرتے ہوئےکہا: کہ جمعیۃ کے کاموں کو زمینی سطح پر مضبوطی کے ساتھ کریں،جب ہم زمین پر مضبوط رہیں گے تو ہماری تنظیم بھی مضبوط رہےگی،آپ نے مختلف شعبہ جات کا ذکر کرتے ہوئے کام کرنے کا طریقہ کار بھی بتایا_
واضح ہو کہ یہ اجلاس چار نشستوں پر مشتمل تھا،بالترتیب پہلی،دوسری اور تیسری نشست کی صدارت حضرت مولانا غیاث الدین صاحب قاسمی صدر جمعیۃ علماء کشن گنج، قاری شہرت قاسمی نائب صدر جمعیۃ علماء بہار، مفتی اطہر القاسمی نائب صدر جمعیتہ علماء بہار نے کیں،جبکہ چوتھی اور آخری نشست کی صدارت ناظم عمومی جمعیتہ علماء ہند حضرت مولانا حکیم الدین صاحب قاسمی دامت برکاتہم نے فامائی_
جمعیۃ علما بہار کے جنرل سکریٹری حضرت مولانا محمد ناظم صاحب قاسمی نے جمعیۃ علماء کے مختلف شعبہ جات کا تعارف کراتے ہوئے کہا کہ جمعیۃعلماء ہر میدان میں فلاح و بہبود کے لیے سرگرم عمل ہے،اور صوبہ بہار کے تمام یونٹوں کے ذمہ داران جمعیۃ کے کاموں کو مزید مضبوط اور منظم طریقے سے کام کرنے کیلئے پر عزم ہے_
اس کے بعد صوبہ بہار کے ضلعی صدور و نظماء نے اپنے اضلاع کی کارکردگی رپورٹ پیش کی-
دینی تعلیمی بورڈ کے تعلق سے جناب مولانا خالد قاسمی گیاوی ناظم دینی تعلیمی بورڈ جمعیۃ علماء ہند نے پریزنٹیشن کے ذریعہ معلومات فراہم کیں،تحفظ مدارس کا پرزینٹیشن مولانا آصف انور ندوی نے پیش کیا،جبکہ جن وکاس سیوا اور جمعیۃ اسٹڈی سینٹر پر پریزنٹیشن پیش کرتے ہوئے مولانا محمد سلمان قاسمی آرگنائزر جمعیتہ علماء بہار نے قیمتی معلومات فراہم کیں- جمعیۃ علماء کے شعبۃ جات کا تعارف اور سالانہ کیلنڈر کے تعلق سے پریزنٹیشن پیش کرتے ہوئے حضرت مولانا محمد ناظم صاحب قاسمی جنرل سکریٹری جمعیۃ علماء بہار نے بتایا کہ جمعیتہ کے صدور و نظماء ودیگر ذمہ داران سالانہ کیلنڈر کے حساب سے ہی اپنی میٹنگوں کا انعقاد کریں اور اسکی رپورٹ صوبائی دفتر کو ارسال کرں_
اسی طرح ممبر سازی و طریقہ کار اور جیم سے متعلق پریزنٹیشن مولانا خالد قاسمی گیاوی ناظم دینی تعلیمی بورڈ جمعیتہ علماء ہند، تحفظ اوقاف کا پریزنٹیشن مولانا محمد رضوان صاحب قاسمی صدر دینی تعلیمی بورڈ جمعیتہ علماء بہار،جمعیۃ یوتھ کلب پر پریزنٹیشن مولانا شمس تبریز رحمانی اور ملت فنڈ سے متعلق پریزنٹیشن مفتی اطہر القاسمی نائب صدر جمعیتہ علماء بہار نے پیش کیے_
صوبائی ششماہی مشاورتی اجلاس میں تحفظ مدارس اور تحفظ اوقاف پر غور و خوض کیا گیا اور یہ باتیں سامنے آئیں کہ جب جب مسلم پرسنل لا بورڈ تحفظ اوقاف کیلئے آواز دےگی ہم لوگ شانہ بشانہ کھڑے رہیں گے_
تحریک اصلاح معاشرہ جمعیتہ علماء ہند کا ایک اہم شعبہ ہے، جس کے تحت ملک کے طول وعرض میں اصلاحی کمیٹیاں قایم ہیں، جس کا اہم مقصد ہے کہ سماج و معاشرہ میں پھیلی برائیوں اور خرافات کے سد باب کیلئے لائحہ عمل تیار کیا جائے اور ایک صالح پاکیزہ معاشرہ کی کی تشکیل کیلئے ہم سب کوشش کریں_
صوبائی ششماہی اجلاس میں مولانا ذاکر حسین قاسمی خازن جمعیۃ علماء بہار، مولانا معظم علی بیگوسرائے،مولانا پرویز صاحب مظاہری، الحاج خالد نجمی، قاری محمد سرفراز عالم کھگڑیا، مولانا غیاث الدین صاحب، مولانا خالد انور کشن گنج، مفتی ابوذر قاسمی،مولانا نور اللہ صاحب مدھوبنی، مولانا ابوصالح پورنیہ، مولانا مرشد عالم قاسمی پورنیہ،مولانا زبیر عاصم، مولانا ولی اللہ، مفتی محفوظ الرحمن سیوان، مولانا شہرت، مولانا مظفر آفاق جہان آباد، مفتی نظر الباری دربھنگہ، مولانا اظہار عالم قاسمی پٹنہ، مولانا سیف الاسلام قاسمی سپول،مولانا اظہارالحق صاحب، مولانا آصف جمیل، حافظ فردوس مدنی ویشالی، مولانا زین الحق قاسمی،مولانا فیضان احمد ندوی،مولانا ممتاز رحمانی، مولانا امتیاز عالم قاسمی پورنیہ، مولانا شمس تبریز رحمانی، مولانا ریحان سمستی پور، مفتی فیاض قاسمی سیتا مڑھی،مولانا نہال احمد چمپارن، مولانا عظمت اللہ گیا، مولانا قصر الاسلام، حافط رضوان گوپال گنج، مولانا عبد اللہ بخاری مونگیر، مولانا ظفر عالم، قاری آفتاب چھپرہ، مولانا آصف انور ندوی بھاگلپور سمیت صوبہ بہار کے ضلعی صدور و نظماء اور مدعوین خصوصی شریک ہوئے،اخیر میں ناظم عمومی جمعیتہ علماء ہند حضرت مولانا حکیم الدین صاحب قاسمی دامت برکاتہم کا اصلاح قلب کے تعلق سے اہم اور پرمغز خطاب ہوا اور مولانا غیاث الدین قاسمی صدر جمعیۃ علماء کشن گنج کی دعا پر اجلاس کا اختتام ہوا ۔
