07/03/2026
दुबईत भीषण स्फोट; ड्रोन हल्ल्यामुळे विमानतळ
मध्य पूर्वेत सुरू असलेल्या अमेरिका-इस्रायल आणि इराण संघर्षाच्या पार्श्वभूमीवर संयुक्त अरब अमिरातीतील दुबई शहरात मोठा स्फोट झाल्याने खळबळ उडाली आहे. दुबई आंतरराष्ट्रीय विमानतळाजवळ संशयित इराणी ड्रोन हल्ला झाल्याने काही काळ विमान वाहतूक थांबवण्यात आली.
मिळालेल्या माहितीनुसार हा ड्रोन विमानतळाच्या धावपट्टीजवळ कोसळल्याने मोठा स्फोट झाला आणि परिसरात धूर पसरला. सुरक्षेच्या कारणास्तव विमानतळातील काही भाग रिकामा करण्यात आला आणि सर्व उड्डाणे तात्पुरती स्थगित करण्यात आली.
या घटनेत मोठे नुकसान झाले नसल्याचे स्थानिक प्रशासनाने सांगितले असून काही कर्मचारी किरकोळ जखमी झाल्याची माहिती आहे. काही ठिकाणी हवाई संरक्षण यंत्रणांनी मिसाइल आणि ड्रोन अडवले, मात्र त्यांचे अवशेष खाली पडल्याने स्फोट आणि आग लागल्याच्या घटना घडल्या.
दरम्यान, दुबई सरकारने परिस्थिती नियंत्रणात असल्याचे सांगितले असून काही तासांनंतर विमानतळावरील कामकाज हळूहळू पुन्हा सुरू करण्यात आले. या घटनेमुळे जगातील सर्वात व्यस्त विमानतळांपैकी एक असलेल्या दुबई विमानतळावर मोठी धावपळ उडाली.
तज्ज्ञांच्या मते इराण-अमेरिका-इस्रायल युद्धाचा परिणाम आता संपूर्ण मध्य पूर्वेत दिसू लागला आहे. कतार, सौदी अरेबिया, बहारीन आणि संयुक्त अरब अमिरातीमध्येही मिसाइल आणि ड्रोन हल्ल्यांचे धोके वाढले आहेत.
या घटनेमुळे गल्फ प्रदेशातील सुरक्षेबाबत चिंता वाढली असून जागतिक हवाई वाहतूक आणि तेल बाजारावरही त्याचा परिणाम होण्याची शक्यता व्यक्त केली जात आहे.
