19/02/2026
ನಾನು ತೋಟಕ್ಕೆ ಹೋದಾಗಲೆಲ್ಲ ಅಲ್ಲಿರುವ ಹಣ್ಣಿನ ಗಿಡಗಳಲ್ಲಿ ಆಗಾಗ ಹಕ್ಕಿಗಳ ಗೂಡುಗಳು ಕಾಣಸಿಗುತ್ತವೆ. ಕೆಲವೊಂದು ಗೂಡುಗಳಲ್ಲಿ ಪುಟಾಣಿ ಮೊಟ್ಟೆಗಳಿದ್ದರೆ, ಇನ್ನೂ ಕೆಲವು ಗೂಡುಗಳು ಖಾಲಿಯಾಗಿರುತ್ತವೆ. ಆದರೆ ಅದು ಹಕ್ಕಿ ಮರಿಗಳು ರೆಕ್ಕೆ ಬಲಿತು ಹಾರಿಹೋದ ಬಳಿಕ ಖಾಲಿಯಾದ ಗೂಡುಗಳಾ?.. ಅಥವಾ ಇನ್ನಷ್ಟೇ ನಿರ್ಮಾಣ ಹಂತದಲ್ಲಿರುವವುಗಳ ಎಂಬುದು ಗೊತ್ತಾಗದ ಕಾರಣ ನಾನು ಅವುಗಳನ್ನು ಮುಟ್ಟಲು ಹೋಗುವುದಿಲ್ಲ.
ಆದರೆ ಕಳೆದ ವಾರ ಹೋದಾಗ, ಗೂಡೊಂದು ಕೆಳಗೆ ಬಿದ್ದು ಸಿಕ್ಕಿತು. ಹಾಗಾಗಿ ಅದನ್ನು ಮನೆಗೆ ತೆಗೆದುಕೊಂಡು ಬಂದೆ. ಹಕ್ಕಿಗಳ ಗೂಡುಗಳನ್ನು ಹತ್ತಿರದಿಂದ ಸೂಕ್ಷ್ಮವಾಗಿ ಗಮನಿಸಿದಾಗ ಅವುಗಳಿಗೆ ಹುಟ್ಟಿನಿಂದಲೇ ಒಲಿದಿರುವ ಈ ಕಲೆಯ ಬಗ್ಗೆ ನಿಜವಾಗಿಯೂ ಆಶ್ಚರ್ಯ ಎನಿಸುತ್ತದೆ. ಅದೆಷ್ಟು ಸುಂದರವಾಗಿ ಕಸಕಡ್ಡಿಗಳನ್ನಷ್ಟೇ ಬಳಸಿ ಮಾಡಿರುವ ಮನೆಯದು.. ಮಾನವರಾದ ನಮಗೆ ಕೆಲವರಿಗೆ ಮಾತ್ರವೇ, ಕೆಲವೊಂದು By birth talent ಎನ್ನುವಂತವುಗಳು ಒಲಿದಿರುತ್ತವೆಯಷ್ಟೇ ಹೊರತು ಎಲ್ಲರಿಗೂ ಇರುವುದಿಲ್ಲ. ನಾವು ನಮ್ಮ ಅನೇಕ ಕೆಲಸಗಳಿಗೆ ಪರಾವಲಂಬಿಗಳೇ.. ಅಥವಾ ತರಗತಿಗಳಿಗೆ ಹೋಗಿ ಕಲಿತು ಕರಗತ ಮಾಡಿಕೊಂಡಿರುತ್ತೇವೆ. ಆದರೆ ಈ ಜೀವಿಗಳು ಹಾಗಲ್ಲ. ತಮ್ಮ ಪ್ರತಿಯೊಂದು ಕೆಲಸಗಳಲ್ಲೂ ಸ್ವಾವಲಂಬಿಗಳೇ.. ತಮ್ಮ ಮನೆ ನಿರ್ಮಿಸಿಕೊಳ್ಳುವುದು, ಮಕ್ಕಳನ್ನು ಆರೈಕೆ ಮಾಡುವುದು, ಆಹಾರ ಹುಡುಕಿ ತರುವುದು, ತಮ್ಮ ಮರಿಗಳಿಗೆ ಜೀವನ ಪಾಠ ಕಲಿಸುವುದು, ಈ ಎಲ್ಲಾ ವಿಷಯಗಳಲ್ಲೂ ಯಾರ ಸಹಾಯವೂ ಪಡೆಯದೆ ತಮ್ಮ ಜೀವನ ನಡೆಸುವ ಈ ಕಲೆಯನ್ನು ಇವುಗಳಿಗೆ ದೇವರು ನೀಡಿರುವ ವರವಲ್ಲದೆ ಇನ್ನೇನು ಅಲ್ಲವೇ?
🪺🦜🪺🐦⬛🪺🐦🪺🕊️🪺🦆🪺🐣🪺🦅
