11/08/2026
মিছামাৰীৰ দীঘলজুলিত ভয়ংকৰ পথ দুৰ্ঘটনা থিতাতে মৃত্যু নৱম শ্ৰেণীৰ ছাত্ৰীসহ এগৰাকী গৰ্ভৱতী মহিলাৰঃ গুৰুতৰভাৱে আহত বাইক আৰোহীঃ চিকিৎসালয়ৰ জৰুৰীকালীন সেৱাক লৈ প্ৰশ্ন
নিউজ ৱাইড অসম ডেক্স
ৰঙাপৰা, ১১ আগষ্টঃ শোণিতপুৰ জিলাৰ মিছামাৰীৰ দীঘলজুলিত দেওবাৰে নিশা সংঘটিত এক ভয়ংকৰ পথ দুৰ্ঘটনাত নৱম শ্ৰেণীৰ এগৰাকী ছাত্ৰীসহ এগৰাকী গৰ্ভৱতী মহিলাৰ কৰুণ মৃত্যু হোৱা ঘটনাই সমগ্ৰ অঞ্চলটোত তীব্ৰ চাঞ্চল্য আৰু গভীৰ শোকৰ ছাঁ পেলাইছে। ঘটনাৰ বিৱৰণী অনুসৰি, নিশা প্ৰায় ৯–৩০ বজাত পৱিত্ৰ শাওন মাহ উপলক্ষে অন্য শিৱভক্তসকলৰ সৈতে তেজপুৰৰ গণেশঘাটস্থিত শিৱ মন্দিৰলৈ যোৱাৰ উদ্দেশ্যে গেৰুৱা বসন পৰিধান কৰি কঠালগুৰি-দীঘলজুলি সংযোগী পথৰ দাঁতিত বাহনৰ বাবে অপেক্ষা কৰি আছিল মিছামাৰী আৰক্ষী থানাৰ অন্তৰ্গত জীয়াগাভৰু গাঁৱৰ গোবিন কুমাৰৰ তৃতীয় সন্তান তথা উত্তৰ মিছামাৰী হাইস্কুলৰ নৱম শ্ৰেণীৰ ছাত্ৰী নিকিতা কুমাৰ (১৭) আৰু ৰঙাপৰা আৰক্ষী থানাৰ অন্তৰ্গত চেঁচা চাহ বাগিচাৰ ১২ নম্বৰ লাইনৰ বাসিন্দা অভিষেক কৰ্মকাৰৰ পত্নী আশা কৰ্মকাৰ (১৯)। ঠিক সেই সময়তে গৰুবন্ধাৰ দিশে তীব্ৰবেগত গৈ থকা এ এছ ১২ এ পি ৯১৩২ নম্বৰৰ এখন পালছাৰ মটৰ চাইকেলে নিয়ন্ত্ৰণ হেৰুৱাই দুয়োগৰাকীকে প্ৰচণ্ড জোৰে খুন্দা মাৰে। ফলত দুয়োগৰাকী ভক্তই গুৰুতৰভাৱে আহত হৈ ঘটনাস্থলীতে মৃত্যুক সাৱটি লয়। ইফালে, দুৰ্ঘটনাৰ পিছত স্থানীয় ৰাইজে আহতসকলক চিকিৎসালয়লৈ নিয়াৰ বাবে মৃত্যুঞ্জয় ১০৮ সেৱাৰ সৈতে যোগাযোগৰ চেষ্টা কৰে যদিও সময়মতে সংযোগ স্থাপন কৰিব নোৱাৰাৰ অভিযোগ উত্থাপন হৈছে।অৱশেষত বলবম যাত্ৰাৰ বাবে অহা এখন টাটা মেজিক মালবাহী বাহনেৰে আহতসকলক গৰুবন্ধা ৰাজ্যিক চিকিৎসালয়লৈ লৈ যোৱা হয়। চিকিৎসালয়ত চিকিৎসকে দুয়োগৰাকীকে মৃত ঘোষণা কৰে। দুৰ্ঘটনাটো সংঘটিত কৰিয়েই মটৰ চাইকেলখন পথৰ কাষৰ খেতিপথাৰত বাগৰি পৰে। দুৰ্ঘটনাত মটৰ চাইকেলখনৰ আৰোহী গৰুবন্ধাৰ ৰমেন বড়ো গুৰুতৰভাৱে আহত হয়। সংকটজনক অৱস্থাত তেওঁক উন্নত চিকিৎসাৰ বাবে তেজপুৰ চিকিৎসা মহাবিদ্যালয়লৈ প্ৰেৰণ কৰা হয়। উল্লেখ্য যে, মৃত আশা কৰ্মকাৰ চেঁচা চাহ বাগিচালৈ বিয়া হৈ অহা আৰু প্ৰায় চাৰি মাহৰ গৰ্ভৱতী আছিল। শাওন মাহ উপলক্ষে তেওঁ মাতৃগৃহত থাকি ধৰ্মীয় নিয়ম পালন কৰি আছিল বুলি জানিব পৰা গৈছে। পথ দুৰ্ঘটনাটিৰ সন্দৰ্ভত মিছামাৰী আৰক্ষীয়ে তদন্ত অব্যাহত ৰাখিছে। আজি দুয়োটা মৃতদেহ মৰণোত্তৰ পৰীক্ষা সম্পন্ন হোৱাৰ পিছত দুয়োটা পৰিয়ালক গতাই দিয়ে। গাঁৱৰ ৰাইজে এক শোকাকুল পৰিৱেশৰ মাজত ৰাজহুৱা শ্মশানত সৎকাৰ কাৰ্য সম্পন্ন কৰে।
চিকিৎসালয়ৰ জৰুৰীকালীন সেৱাক লৈ অভিযোগঃ এই শোকাৱহ দুৰ্ঘটনাৰ পিছতে গৰুবন্ধা ৰাজ্যিক চিকিৎসালয়ৰ চিকিৎসা সেৱাক লৈও গুৰুতৰ অভিযোগ উত্থাপন কৰিছে স্থানীয় ৰাইজে। অভিযোগ অনুসৰি, দুৰ্ঘটনাত আহত নিকিতা কুমাৰক গৰুবন্ধা ৰাজ্যিক চিকিৎসালয়লৈ নিয়া হৈছিল যদিও পৰ্যাপ্ত চিকিৎসক, জৰুৰীকালীন চিকিৎসা ব্যৱস্থা আৰু এম্বুলেঞ্চ সেৱাৰ অভাৱত সময়মতে উন্নত চিকিৎসা লাভ নকৰাৰ ফলত তেওঁৰ মৃত্যু হোৱা বুলি অভিযোগ তোলে ৰাইজে। স্থানীয় ৰাইজৰ অভিযোগ, গৰুবন্ধাৰ চিকিৎসালয়খন ‘মডেল হস্পিতাল’ হিচাপে পৰিচিত হ’লেও বাস্তৱ ক্ষেত্ৰত ইয়াত নিশাৰ ভাগত পৰ্যাপ্ত চিকিৎসক, জৰুৰীকালীন চিকিৎসা সেৱা আৰু এম্বুলেঞ্চৰ ব্যৱস্থা পৰ্যাপ্ত নহয়। বিশেষকৈ দুৰ্ঘটনাত গুৰুতৰভাৱে আহত ৰোগীক তাৎক্ষণিক চিকিৎসা প্ৰদান কৰি উন্নত চিকিৎসালয়লৈ স্থানান্তৰ কৰাৰ ক্ষেত্ৰত এনে অভাৱ গুৰুতৰ সমস্যাৰ সৃষ্টি কৰিছে বুলি ৰাইজে মত প্ৰকাশ কৰে। ৰাইজে প্ৰশ্ন উত্থাপন কৰিছে— এখন চিকিৎসালয়ত যদি জৰুৰীকালীন অৱস্থাত আহত ৰোগীক সময়মতে চিকিৎসা প্ৰদান আৰু প্ৰয়োজন অনুসৰি উন্নত চিকিৎসালয়লৈ স্থানান্তৰৰ বাবে পৰ্যাপ্ত এম্বুলেঞ্চ তথা চিকিৎসা ব্যৱস্থা নাথাকে, তেন্তে ‘মডেল হস্পিতাল’ৰ মৰ্যাদা কিমান যুক্তিসংগত? স্বাস্থ্যমন্ত্ৰী অশোক সিংঘালৰ গৃহ জিলাতে চৰকাৰী চিকিৎসালয়ৰ জৰুৰীকালীন চিকিৎসা সেৱাক লৈ এনে অভিযোগ উত্থাপন হোৱাত বিষয়টোৱে বিশেষ তাৎপৰ্য লাভ কৰিছে। স্থানীয় ৰাইজে গৰুবন্ধা ৰাজ্যিক চিকিৎসালয়ত পৰ্যাপ্ত চিকিৎসক নিযুক্তি, ২৪ ঘণ্টীয়া জৰুৰীকালীন চিকিৎসা সেৱা আৰু পৰ্যাপ্ত এম্বুলেঞ্চৰ ব্যৱস্থা কৰাৰ বাবে চৰকাৰৰ ওচৰত দাবী জনাইছে।
পংকজ নাথ, ৰঙাপৰা।
