10/08/2026
ਫੀਸਾਂ ਵਿਰੋਧੀ ਫ਼ਰੰਟ ਦਾ ਮੰਨਣਾ ਹੈ ਕਿ ਹਰ ਇੱਕ ਲਈ ਲਾਜ਼ਮੀ, ਮਿਆਰੀ ਅਤੇ ਮੁਫ਼ਤ ਸਿੱਖਿਆ ਹੋਣੀ ਚਾਹੀਦੀ ਹੈ। ਅਸੀਂ ਫੀਸਾਂ ਦੇ ਵਾਧੇ, ਸਹੂਲਤਾਂ ਦੀ ਘਾਟ ਅਤੇ ਸਿੱਖਿਆ ਦੇ ਨਿੱਜੀਕਰਨ-ਵਪਾਰੀਕਰਨ ਖਿਲਾਫ਼ ਸੰਘਰਸ਼ ਕਰਨ ਦੀ ਅਪੀਲ ਕਰਦੇ ਹਾਂ। ਆਪਣੇ ਹੱਕਾਂ ਦੀ ਰਾਖੀ ਸਿਰਫ਼ ਸੰਘਰਸ਼ ਨਾਲ ਹੀ ਸੰਭਵ ਹੈ। ਦਿੱਲੀ ਵਿੱਚ ਹੋਏ ਵਿਦਿਆਰਥੀਆਂ-ਨੌਜਵਾਨਾਂ ਦੇ ਸੰਘਰਸ਼ ਅਤੇ ਪੰਜਾਬੀ ਯੂਨੀਵਰਸਿਟੀ ਦੇ ਜੁਝਾਰੂ ਇਤਿਹਾਸ ਨੇ ਹਮੇਸ਼ਾ ਏਕੇ ਦੇ ਦਮ 'ਤੇ ਜਿੱਤਾਂ ਦਰਜ ਕੀਤੀਆਂ ਹਨ। ਪਹਿਲਾਂ ਵੀ ਗ੍ਰਾਂਟਾਂ ਵਧਾਉਣ, ਫੀਸਾਂ ਘਟਾਉਣ, ਲਾਇਬ੍ਰੇਰੀ ਤੇ ਹੋਸਟਲਾਂ ਦੀ ਟਾਈਮਿੰਗ ਵਧਾਉਣ ਵਰਗੇ ਮਸਲੇ ਸੰਘਰਸ਼ ਨਾਲ ਹੀ ਹੱਲ ਹੋਏ ਹਨ। ਸਾਨੂੰ ਉਸੇ ਇਤਿਹਾਸ ਤੋਂ ਪ੍ਰੇਰਨਾ ਲੈ ਕੇ ਫੀਸ ਵਾਧੇ ਨੂੰ ਰੱਦ ਕਰਵਾਉਣ ਅਤੇ ਬੁਨਿਆਦੀ ਸਹੂਲਤਾਂ ਦੀ ਪ੍ਰਾਪਤੀ ਲਈ ਇਕੱਠੇ ਹੋ ਕੇ ਮੈਦਾਨ ਵਿੱਚ ਨਿੱਤਰਨਾ ਪਵੇਗਾ। ਅਸੀਂ ਪਿਛਲੇ ਸਮੇਂ ਵਿੱਚ ਹੋਸਟਲਾਂ, ਕਲਾਸਾਂ ਵਿੱਚ ਪ੍ਰਚਾਰ ਕੀਤਾ, ਮੰਗ ਪੱਤਰ ਦਿੱਤੇ, ਡੀਨ ਅਕਾਦਮਿਕ ਮਾਮਲੇ ਦੇ ਦਫ਼ਤਰ ਅੱਗੇ ਮੁਜ਼ਾਹਰਾ ਕੀਤਾ ਅਤੇ ਵੀ.ਸੀ. ਦਫ਼ਤਰ ਅੱਗੇ ਮੁਜ਼ਾਹਰਾ ਕੀਤਾ। ਇਸ ਸੰਘਰਸ਼ ਨੂੰ ਹੋਰ ਤਿੱਖਾ ਕਰਦੇ ਹੋਏ ਆਪਾਂ 12 ਅਗਸਤ (ਬੁੱਧਵਾਰ) 2026 ਨੂੰ ਵੀ.ਸੀ. ਦਫ਼ਤਰ ਅੱਗੇ ਇਕੱਠ ਕਰਕੇ ਪੱਕਾ ਮੋਰਚਾ ਲਗਾਉਣ ਜਾ ਰਹੇ ਹਾਂ। ਤੁਸੀਂ ਸਭ ਇੱਕ ਜਾਗਰੂਕ ਵਿਦਿਆਰਥੀ ਹੋਣ ਦੇ ਨਾਤੇ ਆਪਣਾ ਫ਼ਰਜ਼ ਸਮਝਦੇ ਹੋਏ ਸਵੇਰੇ 10:30 ਵਜੇ ਵੀ.ਸੀ. ਦਫ਼ਤਰ ਪਹੁੰਚੋ।
ਪ੍ਰਸ਼ਾਸਨ ਤਿੱਖੇ ਅਤੇ ਵਿਸ਼ਾਲ ਸੰਘਰਸ਼ ਦਾ ਸਾਹਮਣਾ ਕਰਨ ਲਈ ਤਿਆਰ ਰਹੇ!
ਫ਼ਰੰਟ ਦੀਆਂ ਮੁੱਖ ਮੰਗਾਂ:
1. ਹੋਸਟਲ ਫੀਸਾਂ ਅਤੇ ਕੋਰਸ ਫੀਸਾਂ ਵਿੱਚ ਕੀਤਾ ਵਾਧਾ ਤੁਰੰਤ ਅਤੇ ਪੂਰਨ ਰੂਪ ਵਿੱਚ ਵਾਪਸ ਲਿਆ ਜਾਵੇ ਅਤੇ ਵਾਧੂ ਭਰੀਆਂ ਫੀਸਾਂ ਨੂੰ ਅਗਲੇ ਸਮੈਸਟਰ ਦੀਆਂ ਫੀਸਾਂ ਵਿੱਚ ਐਡਜਸਟ ਕੀਤਾ ਜਾਵੇ।
2. ਪੁਰਾਣੇ ਹੋਸਟਲਾਂ ਅਤੇ ਵਿਭਾਗਾਂ ਦੀ ਤੁਰੰਤ ਮੁਰੰਮਤ ਕੀਤੀ ਜਾਵੇ ਅਤੇ ਨਵੇਂ ਹੋਸਟਲਾਂ ਤੇ ਕਲਾਸ ਰੂਮਾਂ ਦੀ ਉਸਾਰੀ ਕੀਤੀ ਜਾਵੇ।
3. ਜੂਕੇ ਹੋਸਟਲਾਂ ਦੀਆਂ ਫੀਸਾਂ ਘਟਾ ਕੇ ਬਾਕੀ ਹੋਸਟਲਾਂ ਦੇ ਬਰਾਬਰ ਕੀਤੀਆਂ ਜਾਣ।
4. ਨਵੇਂ ਪੱਕੇ ਅਧਿਆਪਕਾਂ ਦੀ ਤੁਰੰਤ ਭਰਤੀ ਕੀਤੀ ਜਾਵੇ।
5. ਯੂਨੀਵਰਸਿਟੀ ਨਾਲ ਸਬੰਧਤ ਕਾਲਜਾਂ ਦੀ ਰਜਿਸਟ੍ਰੇਸ਼ਨ ਫੀਸ ਦਾ ਵਾਧਾ ਵਾਪਸ ਲਿਆ ਜਾਵੇ।
6. ਪੰਜਾਬ ਸਰਕਾਰ ਤੋਂ ਮੰਗ: ਸਰਕਾਰ ਆਪਣੇ ਵਾਅਦੇ ਅਨੁਸਾਰ 6% ਦੇ ਸਾਲਾਨਾ ਵਾਧੇ (ਯੂਨੀਵਰਸਿਟੀ ਦਾ ਕੁੱਲ ਖਰਚਾ ਸਰਕਾਰ ਚੁੱਕੇ) ਨਾਲ ਗ੍ਰਾਂਟ ਜਾਰੀ ਕਰੇ ਅਤੇ ਯੂਨੀਵਰਸਿਟੀ ਦਾ 150 ਕਰੋੜ ਰੁਪਏ ਦਾ ਕਰਜ਼ਾ ਤੁਰੰਤ ਮੁਆਫ਼ ਕਰੇ।
ਮਿਤੀ:- 12 ਅਗਸਤ (ਬੁੱਧਵਾਰ)
ਸਮਾਂ:- ਸਵੇਰੇ 10:30 ਵਜੇ
ਸਥਾਨ:- ਵੀ.ਸੀ. ਦਫ਼ਤਰ ਸਾਹਮਣੇ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ
ਫ਼ੀਸ ਵਾਧੇ ਵਿਰੋਧੀ ਫ਼ਰੰਟ
PSU (L), PSU, SFI, AISF, PSF, DSO, ACNS, PRSU
