31/08/2025
कायद्याचे राज्य उरलेय का?
फेसबुक अकाऊंट प्रकरणी पोलिसांनी ताब्यात घेतलेला तरुण निर्दोष..
माजी नगरसेवक अमित सरय्या यांची पोलिसांवर नाराजी.
*दिवंगत नगरसेवक करतोय फेसबुकवर सत्ताधाऱ्यांना लक्ष्य*
फेक फेसबुक आयडीप्रकरणी संशयिताला ताब्यात घेतल्यानंतरही होताहेत पोस्ट
# महाविकास आघाडीच्या कार्यकर्त्यांना केले जातेय जाणीवपूर्वक लक्ष्य - अमीत सरैय्या
ठाणे - ठाणे शहरात सध्या एक विचित्र प्रकार उघडकीस आला आहे. मयत नगरसेवकाच्या नावाने एक फेसबुक अकाउंट सुरू असून त्यावर चक्क सत्ताधाऱ्यांना लक्ष्य केले जात आहे. दरम्यान, "या प्रकरणी काही जणांच्या तक्रारीवरून एका संशयिताला पोलिसांनी ताब्यात घेतले आहे. मात्र, संशयिताला ताब्यात घेतल्यानंतरही सदर फेसबुक अकाउंटवर पोस्ट होत असल्याचे दिसून आले आहे. त्यामुळे सत्ताधाऱ्यांच्या दबावाला बळी पडून पोलिसांनी एका निरपराध तरूणाला ताब्यात घेतले असल्याचे स्पष्ट झाले आहे. या तरूणाला पोलिसांनी तत्काळ सोडावे; अन्यथा, या दडपशाहीधिरोधात जनआंदोलन उभे केले जाईल, असा इशारा राष्ट्रवादी काँग्रेस-शरदचंद्र पवार पक्षाचे मा. नगरसेवक अमीत सरैय्या यांनी दिला आहे.
गेल्या काही दिवसांपासून दिवंगत भाजप नगरसेवक विलास कांबळे यांच्या नावाने फेसबुकवर एक अकाउंट चालविले जात आहे. या अकाऊंटंवरून शिवसेनेशी संबधित असलेल्या माजी नगरसेवकांवर टीकाटीप्पणी करणाऱ्या पोस्ट टाकण्यात येत आहेत. या प्रकरणी शिवसैनिकांच्या तक्रारीवरून शिवसेना (उबाठा) च्या चंद्रेश यादव याला श्रीनगर पोलिसांनी ताब्यात घेतले. यावेळी वस्तुस्थिती जाणून घेण्यासाठी राष्ट्रवादी काँग्रेस-शरदचंद्र पवार पक्षाचे माजी नगरसेवक अमीत सरैय्या गेले असता त्यांना धक्काबुक्की करण्याचा प्रयत्न केला. तर, त्यानंतर भाजपचे माजी नगरसेवक आणि दिवंगत विलास कांबळे यांचे बंधू सुरेश कांबळे हे श्रीनगर पोलीस ठाण्यात गेले असता, पोलीस स्टेशनच्या आवारातच त्यांना शिवसैनिकांनी मारहाण केल्याचा आरोप कांबळे यांनी केला.
दरम्यान, या संदर्भात अमीत सरैय्या यांनी पत्रकार परिषद घेऊन, श्रीनगर पोलीस ठाणे हे शिवसेनेची शाखा झाली आहे. या ठिकाणी शिवसेनेच्या स्थानिक नेत्यांना जसे वाटते तसेच केले जात आहे. चंद्रेश यादव हा गोरगरीब घरातील तरूण मुलगा असून त्याला पोलिसांनी नाहक ताब्यात घेऊन मारझोड केली आहे. जर चंद्रेश यादव हे फेक अकाउंट चालवत असता तर त्याला ताब्यात घेतल्यानंतर काही तासांनंतर "टायगर अभी जिंदा है" अशी पोस्ट आलीच असती कशी? चंद्रेशच्या आईवडिलांनी आपणाला फोन केल्याने आपण पोलीस ठाण्यात जाऊन बाजू मांडण्याचा प्रयत्न केला. पण, ब्रिटीशांप्रमाणे वागणाऱ्या पोलिसांनी आपले म्हणणे ऐकून घेतले नाही, असा आरोप केला.
