Fiakfairok

11/09/2025

Breaking News: Malaysia Ah Chin Mi Telh In Minung 125 An Tlaih Than Hna
===================================================
Tuzing September 11, 2025 zingka ah Malaysia Police nih Chin mi tampi telh in ramdang mi tampi an tlaih hna tiah a si.

Chin mi tampi kan umnak Malaysia ram, Kuala Lumpur ah Chin mi telh in minung 125 an tlaih hna tiah theih a si.

Kawlram mi le Chin ralzam an umnak hmun ah Malaysia Immigration Department le Police nih September 11 zinglei sang ah mi tlaih dingin mi an kawl cuahmah tiah theih a si.

“Tutan Malaysia police nih an tlaihmi hna ramdang mi tampi lakah Chin ralzam zong an itel i, a bik in tuzing September 11 ah an tlaihmi hna lakah Chin ralzam tampi an tel. An tlaihmi hna lakah Card ngei lo an tam khun” tiah theih a si.

An tlaihmi hna hi Chin ralzam telh in Myanmar rammi 69, India rammi 25, Pakistan rammi 14 an si. An tlaihmi hna ahhin Indonesia rammi 12 le Bangladesh rammi 5 hna an si. Hi chung ah pa 81 le nu 44 an si. An tlaihmi hna hi k*m 16 in k*m 70 karlak an si.

An tlaihmi hna hi Immigration Control Act pohmah 6 (1)(c) hmang in khual tlawnnak catlap le identity a dikmi an ngei maw ngei lo tiah hlathlainak an tuah lio hna a si.

11/09/2025

SAC Ralhrang Nih Chinram, Kanpetlet Peng, Khapan Khuate Ah Bomb A Thlak Caah Minung 1 Hliam A Tuar
======================================================================
Chin ramkulh, Kanpetlet peng, Khapan khua ah SAC ralhrang nih vanlong in bomb an thlak caah sualnak ngei lo mi sawsawh minung pakhat hliam a tuar tiah theih a si.

Nizan September 10, zinglei sml 12:00 am hrawng ah SAC ralhrang nih Kanpetlet peng, Khapan khua cu a ruang zeihmanh um loin voi 3 khengte, Vanlong in bomb a thlak tiah theih a si.

“Mintat peng le Kanpetlet peng ramri ah a ummi khuate ah bomb pathum an thlak, mi sawhsawh pakhat cu fak ngai in hliamhma a tuar, a dang cu ai hliam mi an um lo” tiah Kanpetlet Township khuami pakhat nih a chim.

August 17 zong ahkhan Kanpetlet peng ah SAC ralhrang nih Vanlong in bomb an rak thlak hoi i mipi umnak Inn 5 a rak rawk bal.

Kanpetlet peng cu a liamcia December 2024 ahkhan Chin hriamtlai phu nih an rak laak i atu ahcun CDF-Kanpalet nih ukhruainak an kalpi cuahmah lio a si.

11/09/2025

11/09/2025

R.I.P: Malaysia Ah Arcirh Khuami Tv. Bawi Uk Thawng A Ruak In A Phawh
===============================================
A poi hringhran ko e. Malaysia ah Chin miphun kan temtuarnak hi a tam hringhran ko. Tutan zong ah Chinram Thantlang peng Arcirh khuami Tv. Bawi Uk Thawng (k*m 22) cu tuzing September 11, 2025 ah a ihnak in a ruak in an phawh tiah theih a si.

Tv. Bawi Uk Thawng (k*m 22) hi Malaysia, Kuala Lumpur khua leng ah rian a ttuanmi a si. Cu a rianttuannak hmun ah atu bantuk in a ruak in an phawh hi a si.

Tv. Bawi Uk Thawng (k*m 22) hi Pu Than Hnin le Pi Far Hnem (tleicia) hna hi an fapa hniang bik a si. A ruang hi Laitlang a chuahsemnak ah tlunpi dingin timhlamh a si tiah Global Tlangte Youth Association (GTYA) an langhter.

Ngaihchiatnak a tongmi chungkhar, nan ngaihchiatnak nan Chin miphun hawi nih kan in hrawmpi hna. Pathian tu nih in hnem ko hna seh. A ruak zong tluangte in a phak khawhnak hnga, thlacamnak in bawm cio hna usih!

11/09/2025

UN Human Rights Council A Voi 60nak Session Ah GKO President Zong A Kai Ve
===================================================
Switzerland ram, Geneva khua ah tuahmi UN Human Rights Council avoi 60nak Session ah Chin miphun buu pakhat a simi International Khumi Organisation (GKO) President cu a kai ve tiah theih a si.

September 8 zinglei sml 10 am ah Geneva khuapi ah tonnak an ngei i cu tonnak ahcun Chin mibu chungin GKO le Chin Human Rights Organization (CHRO) pawl an itel.

Hi tonnak ahhin Rohingya bu pin ah, Thiseas Poullos, European Union Delegation to United Nations le a dang ramkip bu pawl, First Secretary (Human Rights) le a dang ramkip bu pawl zong an itel.

January 14, 2024 thok in AA nih Paletwa Township cu an uk i a luancia mi k*m chung ah sualnak ngei lo mi sawsawh sin ah ningcang loin thahnawnnak voi 6 an tuah, cu pin ah tlaihhremnak voi 5 an tuah cang tiah GKO nih August 12 ah thawng a thanh. Cu chung ah ULA/AA ralkap nih tlaihhrem mi zong aa tel.

CHRO zong nih August 9 ah ULA/AA nih khuachung Khumi (Chin) mibu cung ah nuhrin covo buarnak an tuahmi a karh chin lengmangmi kongah lungretheihnak an langhter caah ramkip bawmhnak halnak an tuah.

11/09/2025

Nepal Prime Minister Cu A Rian In Ai Din, Ralkap Sin Ah Uknak A Pek! Ne Win Bantuk In Ralkap Nih Uknak An Tlai Thai Sual Hnga Maw?
============================================================================================
Nepal ram cu zeidah an lawh lai? Generation Z pawl nih biatak tein sandah an piah i, an cozah cu a tlu. An Prime Minister cu a rian in aa hngol cang i, cozah lutlai minister pawl tampi cu a himnak ah an ithup dih. An President nih Ralkap sinah, buainak control dingin nawl a chanh i, ralkap nih caan karlak nawlngeihnak an von lak chung ti khawh a si.

Tulio, Nepal ram ah sandahpiahtu, Generation Z hi k*m 18 in k*m 27 karlak mino tete an si. Sandah an piah hnawhchan cu, corruption/zikhnawh, ei-ruk ruang ah a si. An cozah hi zik-hnawh le eirup ah an min a thang tuk. An ram an sersiam lo. An mino hna caah rian a um lo. Cozah a tlaitu le nawlngeitu lawng an rum. Bawi a ttuanmi lawng an inuam. Cuticun, zik-hnawh, ei-ruk an tuahnak cu social media ah mipi nih an doh hna. Fakpi in an thangchiat hna. Cucaah, Cozah nih social media cu an phih. Cuticun, mipi thinhunnak cu, mei bang a alh i, sandah an piahnak hi a si.

An cozah a tluk cang caah a rannak in sandahpiahtu lei aiawh nih ralkap lei lutlai, Army chief cu an ton i, caan karlak Cozah tlaitu ah former chief justice, Sushila Karki cu thimpiak dingin an nam tiah news ahcun a lang. Cuticun, ralkap lei nih an lung a tling ahcun, Nepal cu, raam cu caankarlak Cozah an ngei tthan colh lai tinak a si. Burma hrawktu, Newin bantuk in, Ralkap lutlai hna nih uknak lak thai hna aa duh ve sual hnga maw, timi zong a von ka ruatter ngai ngai. Zasang Cinzah

11/09/2025

Ka Nu A Dam Ko Nan Timi Cu Cohlan Awk A Ttha Lo: Kim Aris
========================================
Daw Aung San Suu Kyi fapa Kim Aris nih ka nu a damlonak thawngpang a lengmi kong ah SAC Spokerperson Zaw Min Tun nih thawng diklo a si a timi hi cohlan awk a ttha lo”. Asi ahcun ka nu ngandamlonak kong theih fiannak dingah direct in ka nu he pehtlaihnak nawl kan hal.

Hi nawl kan halmi hi na ka pek duh lo ahcun “thawng diklo a si” na timi hi cohlan awk a ttha lo. Ka nu cu amahte lawng nan chiah riangmang i, a chungkhar hna, upadi thiam hna le a leng siibawi hna he tonnak nawl pek ttung loin a dam ko nan timi cu cohlan khawh a si lo” tiah Kim Aris nih Zaw Min Thun cu a leh.

Tuak ko ulaw k*m 80 leng a si cang mi ka nu nan chiahnak Thonginn dirhmun nih ka nu ngandamnak a hnursuan hrimhrim lai timi a fiang ko. Ka nu cu a nuhrin covo vialte nan hrawh dih cikcek. Nan thil tuahmi hi cohlan awk a ttha lo.

Myanmar mipi, ka nu chungkhar hna, vawlei pumpi in ka nu kong theih a duhmi hna nih tu lio ka nu dirhmun theihnak nawl kan ngei ve. Ka nu zong nih dik tein, zalong tein le limhang ngei tein umnak nawl a ngei ve. Cu vialte a covo hrampi a simi nan khammi cu cohlan khawh a si lomi sualnak a si.

Ka pu (Bochoh Aung San) nih zalennak hmuh khawhnak ding ah a nunnak a pek. Ram le miphun caah daihnak, ṭthanchonak, tlukruannak le Democracy ram kan ngah khawh nakhnga aa zuammi ka nu, phungning loin tlaih in Thonginn chung ah a thih ding cu ka siang lo.

Kim Aris

11/09/2025

CDF-Tonzang le Zo Ralkap Ralkap Riantuantti Ding In Hnatlaknak An Ngei
================================================
Chin ramkulh le Sagaing ramtthen ah hmunhma a ngeimi Chin hriamtlai phu CDF-Tonzang le Zo Army nih nihin September 10 ah ralkap lei i bawm in kan i bawm lai tiah thawngthanhnak an tuah.

CDF - Tonzang cu Chin ramkulh, Tonzang pengkulh ah a ummi Chin ralvennak ralkap an si i, Zo Army cu Sagaing ramtthen Tamu peng le Khampat peng ah a ummi Chin hriamtlai phu an si.

“A hramthawk ahcun CDF-Tonzang le Zo Ralkap hna cu buainak tete an rak ngei nain a tu cu an i kah ti lo dengmang cang,” tiah CDF-Tonzang nih cathanh an chuah. CDF-Tonzang le Zo Ralkap hi CNF/CNA he aa pehtlaimi Chin venhimnak ralkap an si.

Hi phu hnih hna hi Zo phun khat chungtel an si caah harnak um loin raldohnak ah i bawmh le bawmhchanh ding a si tiah a ti.

11/09/2025

LCMC K*m 24 Tlin Camtuak Ah Man Lo In Damlo Zoh A Si Lai
===============================================
Lairam Christian Medical Centre , Lawngtlai ah a ra laimi Zing 19 ah man lo in i zohter khawh a si lai.

" 2025 Zing 19 hi Lairam Christian Medical Centre , Lawngtlai dirh camtuak k*m 24 tlin camtuak a si. Hi ni ah hin Medical Board nih mizapi cu manlo in an zoh hna lai. Hi manlo in i zoh caan hi zing suimilaam 10 in zaanlei suimilaam 4 tiang sii-inn ah a si lai''.

" Zing suimilaam 9:30 - 10 kar Devotion , lunglawnh chim thlacamnak neih a si lai. Sii-ai zong a tam khawhchung in man lo in pek an si lai, a hernak zawnte ah cun sii hi siidawr ah c**k ding''.

" Casualty in damlo tawlrel hau zong manlo a si lai. Seeh hmang in i zohnak le Thi test, CT Scan , X - Ray , ECG, Ultrasound , Laboratory etc hi 50% Discount ding a si. Haa phawi le haa zohter hi man lo a si lai '' tiah Dr B Zonunsang , Medical Superintendent, LCMC nih cun Zing 10 ah nawl a chuah. The Lairam Times

10/09/2025