03/10/2026
..
#సూర్యాపేట_జిల్లాలో_చీటీలు_వడ్డీ_డబ్బులతో_ఉడాయించిన_ప్రభుత్వ_టీచర్_దంపతుల_అరెస్ట్..
సూర్యాపేట జిల్లాలో.. చీటీలు, వడ్డీ డబ్బులతో ఉడాయించిన ప్రభుత్వ టీచర్ బాగోతాన్ని టీవీ5 బట్ట బయలు చేసింది. బాధితులకు అండగా నిలిచి.. విషయాన్ని జిల్లా ఎస్పీ నరసింహ దృష్టికి తీసుకెళ్లింది. దీంతో స్పందించిన ఎస్పీ.. నిందితుడిని పట్టుకునేందుకు మూడు బృందాలను ఏర్పాటు చేశారు. ఆఖరికి ప్రభుత్వ టీచర్ బానోతు రాజుని అరెస్టు చేసి కటకటాలోకి నెట్టారు. చివ్వెంల పోలీస్ స్టేషన్ పరిధిలో.. చిట్టీలు, డెయిలీ కలెక్షన్లు, అధిక రాబడుల పేరుతో కోట్ల రూపాయల మోసానికి పాల్పడిన కేసులో భార్యాభర్తలను పోలీసులు అరెస్ట్ చేశారు. యెనగండి తండాకు చెందిన ప్రభుత్వ ఉపాధ్యాయుడు "బానోత్ రాజు", ఆయన భార్య "అనూష".. 2015 నుంచి చిట్టీలు, డెయిలీ కలెక్షన్లు నిర్వహించినట్లు పోలీసులు తెలిపారు. అధిక రాబడులు, నెలవారీ చెల్లింపులు ఇస్తామని నమ్మించి ప్రజలు, తోటి ఉద్యోగులు, పరిచయస్తుల నుంచి భారీగా నగదు వసూలు చేసినట్లు దర్యాప్తులో వెల్లడైంది. చిట్టీలు గడువు ముగిసినా డబ్బులు తిరిగి చెల్లించకుండా మోసం చేసినట్లు పోలీసులు పేర్కొన్నారు. ఇప్పటివరకు 6 కోట్ల, 24 లక్షల, 50 వేల రూపాయలు సేకరించినట్లు గుర్తించారు. ఇందులో 3 కోట్ల, 18 లక్షల, 54 వేల రూపాయలు తిరిగి చెల్లించగా.. మరో 3 కోట్ల, 5 లక్షల 96 వేల రూపాయలు బకాయిగా ఉన్నట్లు తెలిపారు. సుమారు 500 నుంచి 600 మందికి అధిక వడ్డీకి నగదు ఇచ్చినట్లు గుర్తించారు. నిందితులను అరెస్ట్ చేసి కోర్టులో హాజరుపరుస్తున్నారు. బాధితులు ఆధారాలతో చివ్వెంల పోలీసులను సంప్రదించాలని డీఎస్పీ "ప్రసన్న కుమార్" సూచించారు.
