30/04/2026
🔷*జనగణన 2027 కార్యక్రమాన్ని కలిసికట్టుగా విజయవంతం చేయాలి*
🔷*మే 1వతేదీ నుంచి 30వతేదీ వరకు జనగణన..*
🔷*ప్రజలు ఇచ్చే వ్యక్తిగత సమాచారం చాలా సురక్షితంగా ఉంటుంది.. అపోహలు వద్దు.*
🔷*ప్రజలందరూ ధైర్యంగా, ఖచ్చితమైన సమాచారాన్ని ఎన్యుమరేటర్లకు అందించాలి*
*జిల్లా కలెక్టర్ విజయ క్రిష్ణన్*
అనకాపల్లి, ఏప్రిల్ 30 : జనగణన 2027 కార్యక్రమాన్ని విజయవంతం చేయాలని జిల్లా కలెక్టర్ విజయ క్రిష్ణన్ పేర్కొన్నారు. మే నెల 1 నుండి 30 రోజుల పాటు జరగనున్న ఇంటింటి జనగణన తప్పులు లేకుండా కచ్చితత్వంతో కూడిన జనగణన చేయడం ముఖ్యమని స్పష్టం చేసారు. ఇంటింటి జనగణన పై గురువారం సాయంత్రం జిల్లా కలెక్టర్ కార్యాలయ సమావేశ మందిరం నుండి మండల స్థాయి అధికారులతో కలెక్టర్ వీడియో కాన్ఫరెన్స్ నిర్వహించారు.
ఈ సందర్భంగా కలెక్టర్ మాట్లాడుతూ జిల్లాలో జనాభా గణన ప్రక్రియ విజయవంతంగా నిర్వహించాలన్నారు. జనగణనలో సేకరించిన వ్యక్తిగత సమాచారం గోప్యంగా ఉంచాలని, ఎన్యుమరేటర్లకు అప్పాయింట్మెంట్ ఆర్డర్ ఇవ్వాలని, వారు కిట్, ఐ.డి. కార్డు, ధరించి ఎన్యుమరేషన్ కు వెళ్ళాలని , ఉదయం, సాయంత్రం వెళ్ళాలని, ఏ ఒక్కరూ లెక్కింపు పూర్తయ్యేవరకు సెలవులు పెట్టరాదని తెలిపారు. అధికారులు ప్రతి ఒక్కరూ క్షేత్ర స్థాయి పర్యటనలకు వెళ్లి పర్యవేక్షించాలని, లెక్కింపు కార్యక్రమాన్ని వీడియో తీయాలని తెలిపారు.
జిల్లాలో సుమారు 5,57,334 కుటుంబాలు ఉన్నాయని, జనగణన నిర్వహించడానికి 26 చార్జ్ ఆఫీసర్స్ ను నియమించడం జరిగిందని, అదే విధంగా 490 మంది సూపర్వైజర్ లను, 2804 మంది ఎన్యుమరేటర్లను నియమించడం జరిగిందని కలెక్టర్ తెలిపారు. జిల్లాలో ఇప్పటివరకు 27,807 మంది స్వీయ గణనలు నమోదు చేసుకున్నారని అన్నారు. జనగణన లో ఎటువంటి సందేహాలు ఉన్న జాతీయ టోల్ ఫ్రీ నెంబర్ 1855 నకు కాల్ చేయాలన్నారు. జనగణన పై విస్తృత ప్రచారం చేయాలనీ సూచించారు. సిగ్నల్ లేని చోట ఆఫ్ లైన్ లో చేసి సిగ్నల్ ఉన్న చోటకు వచ్చి ఆన్లైన్ చేయాలనీ తెలిపారు. జనాభా లెక్కల కార్యక్రమం ఎన్నికల నిర్వహణ లాంటిదేనని, తప్పులు చేసే వారిపై జనగణన చట్టం ప్రకారం క్రమ శిక్షణ చర్యలు తీసుకోవడం జరుగుతుందన్నారు. ప్రతి ఇంటిని సందర్శించి, మ్యాప్ ఆధారంగా సరిహద్దులను గుర్తించి వారి మొబైల్ యాప్‌లో వివరాలను నమోదు చేస్తారన్నారు. జనాభా గణన ప్రారంభించే ముందు ఎన్యుమరేటర్లు తమకు కేటాయించిన ప్రాంతం యొక్క లేఅవుట్‌ను సిద్ధం చేసి అప్‌లోడ్ చేయాల్సి ఉంటుందన్నారు. జిల్లా యంత్రాంగం మరియు ప్రజా ప్రతినిధుల సహకారంతో ఈ జాతీయ కార్యక్రమాన్ని విజయవంతం చేయాలని, ఇందుకు ప్రతి ఒక్కరూ సహకారం అందించాలని కోరారు. సరైన సమాచారం ఇవ్వడం వల్ల భవిష్యత్తులో ప్రభుత్వ పథకాలు, అంగన్‌వాడీ కేంద్రాలు, నిరుద్యోగ యువతకు ఉపాధి కల్పన తదితరమైనటువంటి ప్రణాళికలు రూపొందించడానికి వీలవుతుందన్నారు. జనాభా గణనలో వివరాలు ఇవ్వడం వల్ల ప్రభుత్వ పథకాలు లేదా బెనిఫిట్స్ కోల్పోతారనేది కేవలం అపోహ మాత్రమేనని, ప్రజలందరూ ధైర్యంగా, ఖచ్చితమైన సమాచారాన్ని ఎన్యుమరేటర్లకు అందించాలని కోరారు. ఖచ్చితమైన జనగణన వల్ల భవిష్యత్తులో అంగన్‌వాడీ కేంద్రాల ఏర్పాటు, నిరుద్యోగ యువతకు ఉపాధి కల్పన వంటి ప్రభుత్వ ప్రణాళికలకు ఎంతో ఉపయోగపడుతుందన్నారు.
ఈ వీడియో కాన్ఫరెన్స్ లో జిల్లా రెవెన్యూ అధికారి వై సత్యనారాయణ రావు, ఎలక్షన్ సెల్ సూపర్నెంట్ వాసు, జిల్లాలోగల మండల రెవెన్యూ అధికారులు, సూపర్వైజర్లు ఎన్యుమరేటర్లు పాల్గొన్నారు.
