23/09/2025
اسمي حسن خنجر ، طالب ماستر في جامعة China University of Petroleum في الصين
قبل فترة اجتي شركة Anton Oil للجامعة الي ادرس بيها في الصين تطلب مهندسين للعمل في العراق
رحنا كلنا كطلاب دوليين من مختلف دول العالم ، لان بهاي الجامعة يدرسون طلاب من مختلف الدول ، واني ايضا رحت كشاب عراقي ، حالي حال الاخرين لغرض المقابلة.
من وصل دوري سألني من اي بلد انت؟ فكتله اني من العراق، فكالي اسف ما اكدر ادخلك للمقابلة!!! بينما الباقين دخلوا بشكل طبيعي
اني استغربت من كمية الظلم هذا من سمع عراقي منعني من الدخول ، يعني انت جاي تطلب تاخذ هنود وصينين وباكستانيين وغير جنسيات وتوديهم يشتغلون في بلدي العراق ، واني العراقي ممنوع عليه اشتغل في بلدي؟!!! العراق انترس عمالة اجنبية و احنا ابناء البلد مالنا اي فرصة للعمل و الي يتحكم بينا هم الصينيين
طبعا الشباب تم اختيارهم من كثير من الجنسيات وراح يجون للعراق يوم 10 بشهر 10 من هذه السنة. راتب الواحد بيهم 800 دولار اساسي، بالاضافة الى 80 الى 120 دولار عن كل يوم عمل.
يعني يطلع راتب الواحد بيهم اقل شي 3000 دولار
واحنا بداخل بلدنا حتى العقد ما نحصله وهو يمتل نفسه بـ 300 الف شهريا وهاي ماتسد مصرف الشاب الواحد وتخلص كراوي
شوفوا كمية الظلم، اني كنت سابقا اشتغل بشركة صينية بالعراق وكان ما عندي راتب اساسي اصلا ، وانما اخذ راتب يومي فقط مقداره 63 دولار مو 80!!! بالمناسبة واني هذا اختصاصي هندسة نفط، في حين الشباب اللي جايين بيهم مو اختصاص هندسة نفط اصلا، وبيهم اعرفهم ما الهم اي علاقة بالنفط ولا بالهندسة، ومع ذلك هو حاي يشتغل في بلدك براتب 3000 دولار انت تحلم تاخذه
الى متى هذا الظلم؟!! الى متى هذا السكوت؟!!! الى متى هذا الاستخفاف والاستهتار بينا كمهندسين نفط؟ والى متى هذه الشركات الصينية والحكومة تتلاعب بمستقبلنا بهذه الطريقة؟
مهندس النفط حسن خنجر
