29/03/2023
قصة الصبية " 2 "
وبمجرد ما دخلت لجوا لعندها شفت هداك المشهد يلي ما بنسى بحياتي ..
كانت واقفة لابسة فستان وردي قصير وتسريحة شعرها يلي بتاخد القلب وحركاتها يلي بتسحر العيون وهي عم تعمل المكياج تبعا .. هل مشهد حسيتو جاي من فيلم هوليودي .. وهون التفت علي وقالتلي مع ابتسامة : وصلت بسرعة
فانا بقيت واقف وصافن فين لهيك ما رديت عليها
تطلعت فيني وصارت تأشرلي بايديها يلي ماسكة فيها قلم الحمرة الوردي .. وعم تقلي يا أخ شبك وين صفنت
بسرعة صحيت عحالي وقلتلا اي اي انسة اسف حقك علي بس ولله اليوم مشلوش .. تفضلي أمريني شو بتريدي مني
قالتلي : اليوم عيد ميلاد رفيقتي وعاملتو عندي بالبيت وجاي كل رفقاتنا الصبايا وقالب الكيك وصيت عليه من محل قريب من هون مو بعيد كتير، ولكن من عادة هل محل انو يتأخرو بالتوصيل وانا بدي ياك تجيبلي ياه هلق لحتى لحق جهز الطاولة وكل الامور قبل ما يصلوا
رديت عليها بتكرمي ورحت مشيت .. فقالتلي : انت انت شبك وين رايح تعال خود مصرات
قلتلا ولو انسة خلص مو بينا هلق .. ردت : طيب بس ترجع منتحاسب لكن
ورحت مشيت وانا سارد معها وعم فكر بجمالها وانو فوق ما هي صبية بتطير العقل اليوم بهل لوك يلي عاملتو بتاخد القلب والعقل سوا ..
رحت بسرعة جبت قالب الكيك ورجعت لعندها ولما دخلت لقيت انو في اربع صبايا والصبية الحلوة معن .. فقالتلي : جيت .. لو سمحت الطاولة جوا بالغرفة فيك تحطوا عليها
وفعلا عملت متل ما قالت وطلعت من الغرفة ..
فهون مابعرف ليش خجلت فقلتلا يلا انسة بتريدي شي تاني مني
فقالتلي اي بس ستنى شوي شبك مستعجل
فوحدة من الصبايا يلي اجو سألتا مين الشب
ردت عليها : ولله هل شب يا صبايا شيخ شباب تعرفت عليه عن طريق الشركة يلي بطلب من عندها بالعادة ..
فوحدة منن كمان قالت : اي كتير حلو اساسا بدنا حدا يصورنا ويبقى معنا مشان ناخد كلنا صور حلوة فياريت يبقى معنا بما انو قلتي عنو شيخ شباب .. فهون الصبية الحلوة خجلت شوي بس مع ذلك طلعت وقالتلي : شو رأيك تحضر الحفلة معنا منو مننبسط سوا ومنو بتصورنا بس تجي رفيقتنا ..
فانا ما عرفت شو رد وتلبكت .. فقالتلي دي خلص خلص اكيد ما بكون عندك شي وفاضي ..
فأنا سكوتي كانت علامة رضا ..
ولهيك بسرعة نادتلي وقالتلي تعال بدي منك تساعدني بشغلة وفعلا فتت لجوا معها وبلشنا نجهز الطاولة لبين ما تجي صاحبة العيد الميلاد ..
فنحن عم نشتغل سألتني : بالمناسبة لهلق ما عرفت اسمك
قلتلا : ملهم وانت ؟
فقالتلي : واو اسمك حلو وانا اسمي فرح
رديت عليها تسلمي كلك زوق وانت اسمك حلو
طلعت فيني وقالتلي : بلاها مجاملة ملهم رجاءا قال اسمي حلو وعملت حركات غريب بوجها مع لاب لاب لاب ( عم تتمسخر : استهزاء )
فهون وقفنا بعد ما خلصنا تجهيز وصرنا نتفرج عالطاولة فقالتلي يسلااام .. شو رأيك حكيلي ؟
قلتلا بصراحة ولله عنجد شي مرتب كتير صدقا ست بيت ما بطلع معها هيك ..
قالتلي : دي حاجتك مو كل هل قد بعدين شو حكينا بلا مجااااملة مع عصبية صغيرة .. فضحكنا نحن التنين
وهون ونحن عم نضحك فجاة عملت معي حركة رجفتلي قلبي فيها مسكتني من ايدي وسحبتني وقالتلي اي تعال تعال لعرفك عالصبايا ..
طلعنا لعند البنات وقالت فرح : يجماعة بحب عرفكن اسمو ملهم والتفت علي وقالتلي ملهم بحب عرفك ^ نادين، ريما، رنا، عبير ^
وكملت كلامها بالمناسبة يجماعة انا متلي متلكن هلق لعرفت اسمو وهون صرنا نضحك كلنا عالموقف الغريب يلي صار ..
بتقول عبير : يجماعة هل ملهم بتصدقوا اسم على مسمى من وقت ما شفتو حسيت اجاني الهام عنجد اسمك كتير حلو
رنا بتقلها : ولله معك حق وانا حسيت نفس الشي
هون انا رغم انو بعرف شخصيتي قوية كتير الا انو تلبكت وخجلت وانو كتير موقف هيك غريب انا بين خمس صبايا وعم يحكولوا كلام حلو ومالي عرفان شو ارد .. توترت لدرجة وجهي صار احمر ف ريما كانت شخصيتا كتير جريئة ومرحة فطلعت فيني وقالتلي : يييي خشششلت يا حلو اي يؤبشني هل عيون اي روقنا وعبرنا يا مدمرنا .. وصرنا نضحك كلناوبقينا عم نحكي ونضحك .. وانا شوي شوي بلشت آخد وجه وفرح كل شوي تقلنا دي بقى سكتوا بجوز اي لحظة تجي ندى ( صاحبة العيد ميلاد )
وهيك لحتى فعلا اجت ندى وكنا مجهزين كلشي بالمفاجأة وطبعا انا عطوني الموبايل مسكتو وبلشت صور كلشي عم يصير فيديو وصور بنفس الوقت .. وبوقتا قضيت الحفلة معن وكنت كتير مبسوط لدرجة مافيني اوصفها ( اكتر شي كان مفرحني هو اني كنت طول الوقت صافن بفرح بدون ما حدا يحس على اساس عم صور وكذا ) حركات فرح وضحكتها وتفاصيل ملامحها وهي عم تتغالظ على رفيقتها ندى كان بتغرف القلب لدرجة كبيرة ...
بوقتها ضحكوا ولعبوا وتصورا كتير وانا كنت اضحك على ضحكن وحركاتن .. وبنفس الوقت مستغرب من " الفري" ( الانفتاح ) يلي هنن فيه انو شب اول مرة بشوفوا بحياتن ومع ذلك حضروني الحفلة معن وكأنوا منعرف بعض من زمان ..
وهيك لحتى تعبوا وخلصت الحفلة وقتا الساعة صارت 8 بالليل وبيومها اجاني اتصالات كتير بس ما رديت وما اهتميت بشغلي ابدا ما كان بدي ضيع هيك لحظات ..
وبعد مرور هل وقت الكل تعب الا فرح ولهيك شوي شوي بلشوا ينسحبوا ويودعوا بعض .. وفعلا بالاخير مابقي غيري انا وفرح
وقفت هيك وطلعت عالبيت وقالت : ياااااا انا ايمت بدي زبط هل كركبة يلي صارت يخرب بيتن خربوا الدنيا وراحوا .. ولا حدا فين رضيت تبقى تساعدني ..
فهون طلعت فيني فرح ودبلت عيونها وقالتلي : ملهااااام
فأنا رديت عليها بطريقة غريبة ولا ارادية وبصوت حنون : نعم يا فرح .. ( وقت دبلت عيونها حسيت لو بتطلبي مني كل حياتي لاعطي ياها ) جمالها كان غيري طبيعي
قالتلي حباب شو عندك !؟
قلتلا بصراحة كان عندي وهلق مابقي شي
فبدون ما تسألني شو كان عندك فقالتلي : اوووه كتير ممتاز خليك ابقى معي لحتى نلملم البيت حباب والاجرة يلي بدك هي خدها .
فانا لما فرح تذكر المصاري كتير انزعج
لهيك قلتلا : شوفي فرح خلينا متفقين على شي انو موضوع المصاري ما نفتحو ابدا ماشي خلص الشي يلي بدك توصيني عليه بجبلك ياه باخد حقو وبس واي مساعدة تانية تكرمي بس سيرة المصاري لبقى تذكريا اتفقنا بعدين نحن صرنا رفقة مو هيك !؟
فقالتلي : اسفة اسفة خلص وصح معك حق نحن اصدقاء صرنا ولهيك استاذ ملهم تفضل خلينا نشتغل وبدك تساعدني غصب عنك لانو بين الرفقة مافي رسميات
رديت عليها : اي هيك ها هلق انت عيني وتكرمي تفضلي خلينا نشتغل .. وبلشنا نرتب بهل بيت وبقينا تقريبا ساعتين وكنا عم نشتغل على اقل من مهلنا لانو كل الوقت كنا عم نحكي وندردش
وكنا عم ندخل بقصة ونطلع بقصة
بس كل كلامنا كان عبارة عن تعارف .. وعرفنا عن بعض شغلاااات كتير ( رح بحكي عن هل شغلات بعدين ) وخصوصا انا لانو كنت صاحب الفضول الاكبر
وهيك لحتى خلصنا .. ولما خلصنا تشكرتني كتير وحكتلي انو اديش شب اكابر ومحترم وتشكرتني وانو كان يوم حلو كتير وانو الجو يلي عملنا كتير نايس
خجلت كعادتي قدامها وما عرفت شو رد غير بكلمة ولو والعفو
ولما جيت بدي امشي ندهتلي قالتلي تع تع وين رايح
في حساب بيناتنا، عصبت وقلتلا شو حكينا !؟
قالتلي لك يا اهبل مو مشان مساعدتك مشان حق قالب الكيك واجرة توصيلو !
قلتلا معلش هلق مو بيناتنا هل مرة علي وعتبري رعبون صداقة معك ومع الصبايا ..
هي عصبت وبقيت مصرة اني اخد لحد ما وافقت ... فقالتلي يلا تكة فايتة جيب مصاري وارجعلك .. وبمجرد ما راحت عالغرفة وانا عم استناها فجأة بسمع فرح بتصرخ بأعلى صوتها ولما بلحقها لشوف شو السب وإذ .. يُتًّبَع
#اقتباسات
