انت تقبلها ؟

14/11/2022

عن مطار بغداد كتب بلال محسن: بشكل صريح :
مرات نريد ننتقد موضوع أو حالة سلبية نتردد ونلغي الفكرة خجلًا من وجود بعض الأصدقاء العرب في صفحاتنا الشخصية ( نبلعها ونسكت ) حفاظا على صورة العراق الخارجية ..

اتكلم عن قضية تهم كل عراقي يحب وطنه ومن دوافع صادقة .. وصلنا إلى مرحلة مع ( مطار بغداد ) نخجل نگول ( دولي ) مستحيل هذا يكون مطار لدولة أُسِّست شركة طيرانها قبل 78 سنة ..

#معقولة : مسافر يمر على ( چلب تفتيش )
قبل المغادرة وعلى طريقة الجيش الأمريكي
( ارمِ الحقائب على الأرض واخضع للتفتيش ) ؟! ..

#معقولة : خمس نقاط تفتيش يمر عليها المسافر وفي كل نقطة من هذه النقاط يطلبون منك ( تنزع ) ؟! ..

#معقولة : بعد كل هذا التفتيش وأجهزة السونار يسألك شخص في صالة المغادرة ( شگد شايل فلوس وياك ) ؟! ..

#معقولة : ضباط التدقيق أصحاب البدلات الرسمية.. عايشين أزمة نفسية مع المسافر.. ( لا يرد عليك السلام - لا يبتسم - لا يعلي صوته من يسأل - يتعامل وياك كمجرم يريد ينهزم ) ؟! ..

#معقولة: ماكو غير هذا التخم القنفات الرَث الازرگ بصالة المغادرة ؟!..

#معقولة : الي جاي يصير بعد بوابة القدوم !! تحول الشارع الرئيسي إلى گراج ( طوبه يلعبون بيك السواق كلها تريد تاخذك كروة ) ؟!..

#معقولة : هاي حمامات مطار دولي!!
مساحة الحمام لا تتسع الى أربعة أشخاص..
لا باب بي خير يستر عليك.. لا شطافة ..لا ساحبة والمنظف آسيوي ملتهي يبدل عملات بالخفاء مع المسافرين ؟!..

#معقولة : شارع المطار الرئيسي أجمل وأنظف من المطار نفسه ؟!..

السيد رئيس الوزراء
السيد وزير النقل
السيد مدير الخطوط الجوية العراقية

الموضوع مو صعب ولا مستحيل وغير مكلف ماديًّا.. كل ما في الآمر إصدار أوامر إدارية وتوجيهات ..

يا أخوان المطار واجهة بلد، وهو من يعطي الانطباع الأول عند الزّائر لاحترام هيبة الدولة .

منقول من صفحة خان جغان