23/09/2025
عەلی خامنەیی، ڕابەری باڵای کۆماری ئیسلامیی ئێران، لە نوێترین لێدوانیدا هەڵوێستی وڵاتەکەی سەبارەت بە بەرنامەی ئەتۆمی و دانوستان لەگەڵ ویلایەتە یەکگرتووەکانی ئەمەریکا خستەڕوو.
ڕابەری باڵای ئێران جەختی لەوە کردەوە کە دانوستاندن لەگەڵ ئەمەریکا خزمەت بە بەرژەوەندییەکانی ئێران ناکات و بە "ڕێگایەکی داخراو" وەسفی کرد. هۆکارەکەشی بۆ ئەوە گەڕاندەوە کە "واشنتۆن دەیەوێت بۆچوونەکانی خۆی بسەپێنێت و ئێمەش خواستەکانی ئەوان بەدیبهێنین."
سەبارەت بە بەرنامە ئەتۆمییەکەیان، خامنەیی ئاماژەی بەوەشدا کە وڵاتەکەی بەهۆی ئەم بەرنامەیەوە ڕووبەڕووی گوشارێکی زۆر بووەتەوە، بەڵام جەختی کردەوە کە "خۆیان بەدەستەوە نەداوە."
ناوبراو دووپاتیکردەوە کە ئێران پێویستی بە چەکی ئەتۆمی نییە و نیازی بەرهەمهێنانیشی نییە، بەڵام ڕوونیکردەوە کە ڕێژەی پیتاندنی یۆرانیۆمیان بۆ ٦٠٪ بەرزکردووەتەوە بە مەبەستی دابینکردنی پێداویستییە ناوخۆییەکان لە بوارەکانی کشتوکاڵ، پیشەسازی، وزە و دەرمان.
