02/08/2025
لە سنووری هەولێر پرۆسەی دابەشکردنی زەوی دەستیپێکردووە و تاوەکو ئێستا تیروپشک بۆ دابەشکردنی نزیکەی 24 هەزار پارچە زەوی کراوە، بەپێی وردبینی فۆرمەکان دەرکەوتووە 30%ـیان پێشووتر زەوییان وەرگرتووە.
جگە لە مەرجی هەشت ساڵ خزمەت، یەکێک لەمەرجە سەرەکییەکان بۆ وەرگرتنی زەوی ئەوەیە کە نابێت داواکار پێشووتر لە پرۆسەی وەرگرتنی زەوی سوودمەند بووبێت، هەر کەسێک پێشووتر سوودمەند بووبێت ناوی دەردەهێنرێت.
لەوبارەیەوە مەریوان حاکم هادی، بەڕێوەبەری گشتی شارەوانییەکانی هەولێر رایگەیاند، "پێش ئەوەی هەر ناوێکی نوێ بڵاوبکەینەوە بەمەبەستی وەرگرتنی زەوی، دووبارە بە وردی پێداچوونەوە دەکەین، هەر ناوێک دوو ڕۆژی پێویستە، لەماوەی ڕابردوو 30%ـی ئەو فۆڕمانەی بۆمان گەڕانەتەوە پێشووتر لە وەرگرتنی زەوی سوودمەند بوون.
ئەمە لە کاتێکدایە بڕیارە سبەی تیروپشک بۆ دابەشکردنی هەزار پارچە زەوی لە سنووری کەورگۆسک بکرێت، هەنگاوی داهاتووش لە سنووری ناحیەی شەمامک دەبێت.
#ھەواڵ
