20/09/2026
چونکە لە کوردستانە نابێتە جێگای بایەخ بەداخەوە
لە دانیمارکەوە بۆ بازاڕێکی میللیی سلێمانیی ؛ مۆبایلێکی ٧ هەزار دیناری، نهێنییەکی سەرسوڕهێنەر ئاشکرا دەکات
چیرۆکەکە لە ٢٠ی ئابی ئەمساڵەوە دەست پێدەکات. سۆران عەلی، هاووڵاتییەکی دانیشتووی ناحیەی عەربەت، وەک بە کەی ئێن ئێنی وت: لە بازاڕی راپەڕینی سلێمانی مۆبایلێکی دەستی دووی کۆنی جۆری (سۆنی ئەریکسۆن) بە بڕی تەنها ٧ هەزار دینار دەکڕێت. کاتێک مۆبایلەکە دادەگیرسێنێت، لەبری ئامێرێکی بەتاڵ، ڕووبەڕووی ژیان و یادگارییەکانی کەسێکی دیکە دەبێتەوە کە هەزاران کیلۆمەتر لێیەوە دوورە.
مۆبایلەکە پڕە لە وێنە، نامە و تۆماری تەلەفۆنیی ژنێکی دانیمارکی بە ناوی (بێتی)، کە دانیشتووی ناوچەی تیاربۆرگە لە دانیمارک. تا ئێستا بۆ هیچ کەسێک ڕوون نییە ئەم مۆبایلە چۆن ئەو گەشتە درێژەی لە باکووری ئەوروپاوە بۆ ناو بازاڕێکی هەرێمی کوردستان بڕیوە.
لە ئێستادا، سۆران مۆبایلەکەی بە پارێزراوی لای خۆی هێشتووەتەوە و وەک ئەرکێکی ئەخلاقی، دەستی بە گەڕانێکی چڕ کردووە بۆ دۆزینەوەی بێتی، تا مۆبایلەکە و یادگارییەکانی ناویشی بۆ خاوەنە ڕاستەقینەکەی بگەڕێنێتەوە.
ئێستا ئەو گەنجە کوردە خۆی تەنها بە هەڵگری پارچەیەک ئەلیکترۆنیات نازانێت، بەڵکو بووەتە پارێزەری ئەمانەتێکی مەعنەوی و بەشێک لە مێژووی "بێتی"، بەو هیوایەی ڕۆژێک تاقە نامەیەک یان پەیوەندییەک، پردێکی سەرسوڕهێنەر لە نێوان کۆڵانەکانی عەربەت و شەقامەکانی تیاربۆرگ دروست بکات.
