18/06/2025
الناس تستغرب: ليش ما تزرع شلب؟
أجاوبهم ببساطة:
“الشلب يصرف ماي والثيل ما يصرف ماي هواي… يحب الرش، و من ماء البير الارتوازي.”
أنا إبراهيم علي كريم، من قرية الرسول خان بني سعد في #ديالى. من 2005 بديت بمشروع صغير لزراعة الثيل الطبيعي، وسميته “المسطح الأخضر”.
اليوم، مشروعي يجهّز حدائق ومتنزهات من البصرة لأربيل.
واكثر الطلب عندي على الثيل الهندي لان يقاوم الحرارة بالعراق ويتحمل العطش لفترات
وما أشتغل وحدي… عندي عمال وفّرت فرص عمل لأكثر من 60 شاب، من طلاب جامعة ومدرسة ونازحين.
رغم صعوبة المي وغلاء الأسمدة، ما وقفت. طورت شغلي، وجبت قالعات حديثة ومنظومات ري متطورة اشتغلتها بيدي كلها.
اني ما مكمّل دراسة، بس تعلّمت من الأرض، وحبّيت شغلي.
وأؤمن إن العراق يحتاج مشاريع مساحات خضراء تحسن البيئة العراقية.
#ديالى #الثيل
