08/07/2023
🔻دوو کوڕە لەندەنیەکەی مام جەلال چیان لەیەکێتی کرد!
🔸 یەکێتی نوێ نەمێژووی ماوە نە شوناس و ناونیشان
یەکێتی بەکۆنگرەی چوار سەری خۆی بڕیی و بەکودەتاکەی ٨ی تەمموزیش، بەتەواوی خۆی کردە جەستەیەکی سارد و سڕ! جەستەیەک کە ئیتر تا رۆژگارەکان تێپەڕن ئەویش ساردتر دەبێتەوە و زۆرتر لەبەریەک هەڵدەوەشێت و شیتەڵ دەبێتەوە، تا دەگاتە ئەو ئاستەی کوردستان دەگەڕێتەوە بۆ سەردەم و قۆناغی تاک حزبی و پێش راگەیاندنی کۆمەڵەی رەنجدەرانی کوردستان.
ئێستا کە یەکێتی نیشتمانی کوردستان، كۆتایی بەژیانی حزبیی و رێكخراوەیی خۆی هێناوە و ئەوەی بەعس و نەیارەکانی نەیانتوانی بەسەریدابهێنن، ئەم کۆمەڵە نەخوێنەوارەی ئێستا ناویان لەخۆیان ناوە مەکتەبی سیاسی و سەرکردایەتی، بەسەر یەکێتیان هێناو لەرۆژگاری ئامادەکاری بۆ کۆنگرەی چوارەوە دەستیانداوەتێ، یەکەم کار کە کردیان بەپارەو سەفەقات، بەدانانی لیست و گۆڕینی ناو و کاندیدانی سەرکردایەتی، لە بەرەبەیانی رۆژانی هەڵبژاردنی ئۆرگانەکان و مەڵبەندەکان و پاشتر دانانی ریکۆردەر لە ژێر کورسی ئەندامانی کۆنگرە، پەیڕەوی ناوخۆ و پرەنسیپە بنەڕەتیەكانی ژیانی حزبایەتی یەکێتیان توڕدا.
تا ئێستا کە یەکێتی لەحزبێكی مۆدێرنی دیموكراتەوە بۆتە حزبێكی بێ شوناس و ناونیشان و خاوەندارێتییەکەشی لەنمایشێکدا کرا بەناوی دوو کوڕە لەندەنییەکەی مام جەلال.
یەکێتی ئێستا نەمێژووی ماوە نە فەرهەنگ. نە شانازییەک بۆ گيڕانەوە نە ئەدەبیاتێک بۆ خوێندنەوە، یەکێتی نوێ تەنیا رۆژ بەڕێ دەکات و پلانی سبەی نیە، چونکە هیچ لەهاوکێشە سیاسیەکان و ئەگەرەکان و روداوەکان تێناگات، تا سیاسەت بکات و پلان دابڕێژێت. یەکێتی ئێستا تاکە فارگۆنی تێکشکاو و بەجێماوی ئەو شەمەندەفەرە دورودرێژەیە، کە لەناوەڕاستی رێگەدا ماوەتەوە، نە دەتوانی بگەڕێتەوە بۆ دواوە نە هێز و داینەمۆیەکیشی هەیە تا بۆ گەیشتن بە وێستگەکانی ئایندە بەردەوام بێ.
