كتابات حجي تمساح

27/10/2021

06/09/2021

كان هناك فارس يطعم حصانه احسن انواع الحشيش ويسقيه من الماء النقي الصافي وكان الفارس شجاعا مغوارا لا يهاب الاعداء ويدخل بحصانه كل مكان ويصيح باعلى صوته " انخااااااله خبز يابس طحين انخاااااله"

نعم انه فارس ابو العربانه مال حصان الذي يشتري انخاله

14/05/2019

طالبة الجامعة .. الفتاة اللطيفة وتفاعلها مع المجتمع الجامعي

تستيقظ الفتاة في الصباح الباكر قبل اذان الفجر بخمسة وثلاثين دقيقة لكي تجهز نفسها للدوام فتلبس افضل ما لديها من ثياب كشاخية .. ثم تأتي للميك آب فتضع وجهها في كونية الطحين وترض بعض الماء بالبخاخ مال الحلاق وتلبخ الجهرة لكي تخفي كوارث الطبيعة وعجائب الخلق في خريطة وجهها التي تشبه خارطة الصومال هلكد مو مخربطة .
بعد الانتهاء من اللبخ والدفن والتسوية الترابية تأكل رمانة حمره عالريك عود على اساس حاطة حمرة .
وتذهب الى منقل الشوي وتنخبش وتفتش عن بقايا الفحم لكي تكحل بها اللايتات او القوبجات الموجودة على لوحة الجهرة .

ومن ثم يأتي ابو الاشتراك الافندي وقد خبصها للدنيا بالهورنات ومشغل اغاني اليسا او تامر حسني عود رومانسي ابو الهي هي ومن ينزلن من الاشتراك يبدل محمود العامري .
المهم .
عند باب الجامعة من تريد اتطلع الهوية من الجنطة وتجفص ايدها باللبن اثاري قبلها بيوم جانت مشترية جدر لبن وناسيتها بالجنطة لأن بعد اخوك كونية شايلة مو جنطة , والاغراض الثانية الموجودة بالجنطة هي ككوايه مايعه صارلها اسبوع , جكليت عدد اثنين , ونستله ماكله منها ثترباعها , وبيها ايضاً الفين دينار مشككات ومحروكة من الزواية وبيها احد الالفين الارقام مالتها مختلفة لأن يحبن التزوير .
وتدخل الجامعة منتصبة القامة وي كأنها طياره في المدرج على وشك الاقلاع (على كيفج انجلينا) .

وهي تمشي بالشارع والحذاء ابو الكعب مالتها واحد اعلى من الثاني وواحد منهم يطلع صوت قوي والثاني صامت وتروح للكلية مالتها

اهم الاشياء لدى الفتاة الجامعية .

_ الكشخة , يعني اذا لبست شي جديد لازم تأخذلها فرة بالجامعة كلها حتى الكل يشوفوها بهاي الملابس الجديدة عود مودلز

_ الميكاج , وجهها عبارة عن حقل تجارب للمساحيق وجميع مواد الحصة التموينية

_ الحجي على الاخرين , حيث لا يخلو حديثها عن الكلام على الاخرين مثل .. دحقي حمودي اشقيعمل , تجيبها زميلتها , عووووع اشقد سقيع هذا الولد .. وهكذا .

وبأختصار ان اهم الاشياء التي تحبها الفتاة هي الفلافل ومظهرها وان تصادق كبل حلو

ودمتم فشك للشواجير

ملاحظة : تحشيش للضحك فقط

12/05/2019

بقعة ضوء (تحشيش)

بعنوان : نيوتن

حینما كان نیوتن یجمع التفاح لیبیعه في السوق
ویكسب لقمة عیشه ویسدد الفواتیر ویوفي
الدیانة فكر بعمق لماذا عندما یسقط التفاح من
الشجر نجمعه ونبیعه؟ فاخذ یفكر ویفكر واذا
بفكره تخطر على باله ان التفاح اذا سقط فله
الحق ان یمتحن في الدور الثاني
ومن هذا المنطلق اتخذ نیوتن المعادلة
الطول +العرض* عدد المولدات= عدد العاطلین
عن العمل
وقد استخدم نیوتن وحدة قیاس اسمها نیوتن
وتعني نیو جدید وتن معناها نغمة والمقصود بها
النغمات الجدیده واصبح نیوتن من بائع تفاح الى
صاحب مكتب موبایلات والآن اصبح عالما
فیزیائیا حینما اتت امرءة جمیله ولابسه كیمون
وبرمودا فلحقها فجذبته قال لها انتي جذابه
وضربته بالحذاء وقالت له یاجذاب یا ابن الجذاب
فعرف ان الجاذبیة موجوده واصبح مخترع
الجاذبیة نیوتن وبهذا یكون لنیوتن ثلاث وظائف
كما یقول المثل ثلث صنایع والبحر شاسع!!

11/05/2019

نشرة الاخبار

قام الرئيس الكوري الشمالي من مقر اقامته في بيونغ يانغ بأطلاق اربع طيور زواجل بعيدة المدى تحمل رؤوس بصل بأتجاه اليابان اسفرت عن نزول دموع سبعة يابانيين من ضمنهم عامل النظافة يامادوكو اوروهاوا . وادت هذه العملية المفاجئة الى ردة فعل قوية من الجانب الامريكي حيث قام ترامب بالرد على هذا الاعتداء السافر من بيونغ يانغ بفتح لابتوبه وانزل منشوراً على تويتر يقول فيه "انا منزعج من التصرفات الكورية الشمالية" واتبعها بأربع سمايلات حزينة وخامسة تبكي
كما من جانبها صرحت السلطات اليابانية بالتصريح التالي
"لقد قمنا بأرسال زوج طيور ارفليات لأعتراض طريق الزواجل الكورية واقتيادهم الى جزيرة اوكيشاوا للتحقيق معها"
وصرح خبراء ان الزواجل الكورية كانت لخلدون المطيرجي في باب الشرجي كان قد باعها لشخص بنغالي يعمل بتنظيف التواليت في مول المنصور .. كما بينوا في التصريح ايضاً ان رؤوس البصل هي من مدينة بلد شمال بغداد .
وهذا ما ادى الى ان تصرح الخارجية الكورية الجنوبية بأن على العراق الحفاظ على الحيادية وعدم التدخل في شؤون الدول الاخرى محذرةً عادل عبدالمهدي من مغبة انتهاج السياسة التدخلية في شؤون الاخرين
من جانبه نفى عادل عبدالمهدي تدخله في ارسال الزواجل لكوريا الشمالية رافضاً التهديدات من الجانب الكوري الجنوبي حيث صرح قائلاً "نحن نرفض التهديدات للعراق" مؤكداً ان "حصة العدس في رمضان ستصل لكل العراقيين"
ما ادري شنو الربط بس هو هذا الكاله
نهاية النشرة وشكراً لحسن الاستماع
كانت معكم محدثتكم من قلب الصالون
جاسبية مسكاره

19/10/2018

ترقبوا .. شغلات جديدة بالباكيت

06/06/2018

سميراميس

راح نسولف اليوم عن واحده من اهم اساطير الدالغة والصفنات حيث يحكى انها جانت شكاكيه ويصفن كلمن يباوعلها ويضرب دالغة ابو صابر
جانت سميراميس مطيرجية منذ الصغر وجانت كرفيقاتها من البنات تحب السوالف الفاهيه والسطحية
سميراميس عتيكه كلش حتى جان اسمها عالفيس اميرة الاحزان هلكد مو قديمة
ترعرعت سميراميس مع سعدون جابر وشمشي ادد واكتسبت مهارات عدة منها طم خريزة والتصاوير
وجان اكو واحد بالمنطقة يحبها اسمه نينوس .. نينوس هو الثاني حديقة وعنده موبايل شحاطة ام اللايت
جانت سميراميس تعبد الصخول والنعاج ولكنها كانت تحترم المطايا جداً
سمي سينما سميراميس تيمناً بأسمها ولو عرفت الافلام الي تنعرض بهاي السينما جان انتحرت
وبعد قصة حب تعبانه مع نينوس الي كضوها تليفونات تالي الليل جاء شلمنصر الى منزل سميراميس وخطبها لأبنه شمشي ادد في نفس عام صدور اغنية خدري الجاي خدري .

19/05/2018

حجي ستار والفيسبوك (تحشيش)

حجي ستار عمره ستين سنة فيترجي متقاعد , قرر حجي ستار ان يسوي فيسبوك سوى الحجي فيسبوك بس لما سوا صار اسمه بالفيسبوك "ستار حجي" لان كتب اسمه كبل الحجي بالتسجيل وحط صورة اسد كصورة شخصية .
وره يومين راد الحجي ان يغير اسمه ويسوي حجي ستار وبعد ما كمل وسوا حفظ التغييرات طلع اسمه "حي ستار" لان سحك بكلمة حجي والتغييرات قفلت بعد ماكو تغيير .
وبدا حجي ستار ينزل منشورات طولها تلث امتار عالشاشة (مثل منشورنا هذا هع ) ويجيله تعليق او تعليقين من جماعته حجي جمعة وابوفاروق .
وبالليل راد الحجي ينزل صورة منظر طبيعي وكتب "ما اروعه من منظر هذا المنظر الطبيعي الجميل" وفات عالاستوديو ينزل الصورة وجانت صورة مرته ام عناد بصف صورة المنظر الطبيعي وبالغلط داس على صورة مرتو ونزلت صورة ام عناد بالفيس مالته , انخبص حجي ستار مايعرف شيسوي كام طفا الموبايل وشال الباتري عباله تنمسح صورة الحجية .

وراها جان تصير التعليقات فوك الميه للحجيه ام عناد كلها جماعة حجي ستار وابنه عناد وعجايه المنطقة كلها علقت
"منووورة حجيه"
"طالعه كيكه خاله ام عناد"
"شكاكيه الحجيه"
فضاج الحجي ستار كلش لان انفضح بس بنفس الوكت كيف لان التعليقات يمه اول مره تصير هيج هوسه , منشوراته جانت يا تعليق يا ثنين وهسه فوك الميه واعجابات صار ازدحام بالتنبيهات مال الحجي .

بعد شهر فتحت التغييرات مال الاسم وفات حجي ستار على كروب صاكين وصاكات العراق وبدل اسمه سوا "ثلاثيني صاك"
وابنه عناد جان موجود بالكروب بأسم بنت "نبع الالم"
حجي ستار زحفلها عباله بنيه ونسق ويا ابنه وعناد استغل الفرصة واشترى خط جديد وانطاه لابوه على اساس بنيه وكام يخابره ويقلد صوت بنات وياخذ رصيد من ابوه لحد ما طكت بيده .

وبيوم بالليل فات الحجي عالغرفة مالته ودك علي ابنه عناد جاوبه الحجي ستار والحجيه نايمه بصفه واشتغل الغزل مال توالي الليل وكعدت ام عناد من النوم وكبسته وعلكت بنص الليل وصارت بالنعل على حجي ستار هو ينكتل وابنه عناد يضحك .

بعدين طلع حجي ستار من كروب صاكين وصاكات العراق وفات على كروب "غدر الزمن" .. واستمر المسلسل مال حجي ستار .

15/12/2017

دارميات عالونسه

واحد يدور تعيين كال لصديقة ..
كمت انه اصبر الروح اشرب جكایر ... كالو یجي التوظیف بنص ینایر

صديقة جاوبة وكال ..
یالي تصبر الروح وایدك نظیفه ... اشتغل بالجكلیت ماكو وظیفه

رجع رد عليه خوينه وكال ..
كالو اجا التوظیف سویلي جاره ... عندك عرف یاخوي یم الوزاره

بالاخير قفلها بوجهو وكال ..
لو عندي یمهم شي جا هذا حالي ... انحشش اعله الناس ویا السحالي

بقلم صديقي .. عضله ونص