30/07/2026
عومەر کۆچەر و قەیرانا زمانێ سیاسی: دەمێ کومێنتێن دژ یێن خەلکێ ب مەلاق و کرێگرتی تۆمەتباردکت
نڤێسەر : رەعەد عومەر
دەمێ مەلایەک یان پەرلەمانتارەک دکەڤیتە بەر پێلا ڕەخنێن نەرەزایەتییا خەڵکی ل سەر تۆڕێن جڤاکی، ئەرکێ وی ژیرانە ئەوە ب سنگەکێ بەرفرەه و ب زمانەکێ لۆژیکی و جوان بەرسڤا تێبینییان بدەت،بەلێ ئەوا د. عومەر کۆچەر ئەندامێ جڤاتا نوونەرێن ئیراقێ ئەنجام دای دەمێ ئاخفتنێن خەڵکی و ڕەخنەگران ب دەستەواژەیێن وەک مەلاق و کرێگرتیێن دەستهەلاتێ ناڤ بڕین، نیشانا دورایتیەکا مەزنە د کەسایەتیا وی دا تایبەت وەک ئەو خو ب پشتەڤانێ ئازادیا رادەربرنێ د دانت .
سرووشتێ هزرا مروڤی و جڤاکی وەسا نیشان ددەت کو نە هەر بابهتەکێ مروڤ بنڤێسیت یان بێژیت، یا بەرعاقلە کو هەمی کەس پشتەڤانێ ڕەئیا وی بن .
بێگومان دێ هەر ڕەئیەکا هەڤدژ و جودا هەبت،لێ مخابن، نە ل بەر عاقلە و نە جوانە کو مروڤ بێڕێزی و سڤکاتیێ ب ڕەئیا هەڤدژ بکەت.
هەکەر ئەو ب ڕاستی ڕێزێ ل پرنسپێن ئازادیا دەربڕینێ دگریت و پەیڕەو دکەت، پێدڤییە بەری هەر کەسەکێ دی ڕێزێ ل ئازادیا کەسێ بەرامبەرێ خۆ بگریت نەک هەر کەسەکێ دژی هزرا وی باخڤیت یان نێڕینەکا جودا هەبیت ب مەلاق و کرێگرتی ناڤ بکەت.
ئەڤ رەفتارە دەمەکی پتر جهێ داخێ یە، تایبەت کو ناڤهاتی ماموستایەکێ ئاینییە و هەڵگرێ باوەڕناما دکتورایە لەوما پێدڤی بوو نموونەکا بلندتر یا پیرۆزڕاگرتنا رەئیا جودا بەرچاڤ گرتبا.
وەک لایەنگر و سەرکردەیەکێ پارتەکا ئیسلامی، دڤیابا کو ب شێوەیەکێ ئەخلاقی و دویر ژ تۆمەتبارکرن و سفکاتێ کرن و قەسێن کرێت بەرسڤا خەڵکەکێ دابا یێ کو دژی بۆچوونا وی دەرکەتینە، نە کو پەنا یێ ببتە بەر قەسە و پەیڤێن نزم و سەقەت .
کەسەک کو هەڵگرێ ناڤونیشانێ ئاینی و ئەکادیمی بێت بەری هەر کەسەکێ دی پێدڤییە ڕێزێ ل کەرامەت و ئازادیا رادەربرینا خەلکێ بگریت .
جوداهیا بۆچوونان و ناڕەزایەتی دەربڕین ل سەر ئاخفتنێن وی ژلایێ وەلاتییان ڤە ناکەتە ئاماژە کو ئەڤ خەڵکە هەمی کڕێ گرتینە یان فەرمانا دەستهەڵاتێ جێبەجێ دکەن یان مەلاقن. کەسێ سیاسی و خودان هەڵویست دڤێت بزانیت کو دیمۆکراسیەت ڕێگەکە ب هەردوو ڕەیان دچیت؛ وەک چاوا ئەو ئازادە ڕەخنەیێ ژ پڕۆژەیێن دەستهەڵاتێ یان هەر کەسەکێ یان کارەکێ بگریت ب هەمان شێوە مافێ هاولاتییان ژی هەیە بەرسڤێ بدن و ڕەخنەیێ ژ لێدوان و هەڵوێستێن وی بگرن.
ئەو کەسێ نەشێت ب زمانێ زانست و رێزگرتن و ڕاستییان بەرسڤێ بدت بکارئینانا زاراڤێن بێ بها نەزانین و توندرەوایەتی ونەزانینا وی د سەلمینیت.
پەیاما داویێ بۆ د. عومەر کۆچەر ئەوە کو پێدڤییە ب شێوەیەکێ جددی پێداچوونێ د زاراڤ و پەیڤ و هەڵوێست و ڕەفتارێن خۆ یێن سیاسی دا بکەی.
پێگەهێ تە یێ ئاینی و ئەکادیمی، بەری هەر تشتەکێ دی، ڕێزگرتنێ ژ را یا جودا و رەخنەیێن خەلکێ گری کا چەوا تو رەخنێ دگری دڤێت تو ب سینگەکێ بەرفرەه رەخنێ ژی قەبیل بکەی .
سیاسییەکێ سەرفراز ئەو نینە یێ هەمی نەیارێن خۆ ب کڕێ گرتی یان مەلاق ناڤ ببەت بەلکو ئەو کەسە یێ ب لۆژیک و پەیڤێن جوان بەرەڤانیێ ژ بۆچوونا خۆ بکەت و کەرامەت و ئازادیا گشتی بپارێزیت.
