11/09/2026
گۆڕینی مرۆڤ بۆ شت objects.
بنەڕەتی ئەم بۆچوونە بریتییە لە بەشتکردن بەئۆبجێکتکردن-Objectification .
بە شێوەیەکی ئاسایی مرۆڤ وەک بکەرێک - subjects سەیر دەکرێت و خاوەنی سەربەخۆییەکی خۆیی یە .
ئاشکرایە بکەربوون چەند پرسیارێک بەرهەم دەهێنێت، وەک : چۆن بیردەکەمەوە؟ دەتوانم چی بکەم ؟ کامەیە کارەکتەری من ؟ پرس و پڕۆژەکانم چین لە ژیاندا؟
بەڵام لە بەشتکردندا، سەرنجەکان دەچنە سەر چەند پرسیارێکی دیکە : چەندە جوانم؟ چەندە ئارەزوو دەوروژێنم ؟ چەندە لە ڕووی سێکسییەوە سەرنجڕاکێشم ؟ نرخی لەشم چەندە لەم سیستەمەدا ؟
لە هەموو ڕوویەکەوە ئەمە کێشە بۆ ڕەهەندی مرۆڤ بوون دروست دەکات، چونکە مەترسی ئەوە هەیە کە جەستە ببێتە پێوەری زاڵی بەهای کەسەکان لە ژیان و لە کۆمەڵگەدا .
بۆیە دەبێت بپرسین چی ڕوودەدات کاتێک سیستەمی ئابوری بە شێوەیەکی ڕێکخراو و بەردەوام ڕواڵەتی سێکسی لەگەڵ سەرنجی مرۆڤەکان دەگۆڕێت بۆ جۆرێک لە سەرمایە؟
کاتێک جوانی لەش، سەرنج قۆرغکردن، ئارەزوو وروژان و فۆڵەوەر دەگۆڕینەوە بە پارە . ئێمە جەستە دەکەین بە جۆرێک لە سامانی ئابووری.
باشە ژینگەیەکی ئابەم شێیوەیە چ جۆرە هاندەرێکی ئابووری بەرهەم دەهێنێت لە کۆمەڵگەدا؟ یان چ نۆرمێکی کۆمەڵایەتی دهێنێتە ئاراوە؟
ئەو دەمەی خانمێک دەبینێ دەقێکی کولتوری ٥ هەزار بینەری هەیە و جەستەیەکی سێکسی ٥٠٠ هەزار! ئیتر تێدەگات بازاڕ و ئابوری کۆمەڵگە سپۆنسەری ئارەزوو وروژاندن دەکەن! چونکە سیستەمەکە ئاماژەیەکی وورد دەدات بەوەی ئەم تایبەتمەندیە بەهایەکی ئابووری و کۆمەڵایەتیت پێ دەبەخشن .
ئینجا مەترسی پرسی ئاسایبوون normalizzazione دەست پێدەکات، کۆمەڵگە وردە وردە پێوەری بەهاکانی خۆی دەگۆڕێت، چۆنیەتی بوون دەکاتە چۆنیەتی دەرکەوتن ، چەند لێهاتووی دەکاتە چەند ئارەزووکراوی، ووردە ووردە ئەمانە دەبنە بەهایی ئاسایی.
یەکێک لەو چەمکانەی تر کە زۆرترین لێکۆڵینەوەی لەسەر کراوە بریتییە لە خۆ بەشتکردن - self-objectification .
واتە ئەو کاتەی مرۆڤ دەست دەکات بە سەیرکردنی جەستەی خۆی لە ڕێگەی چاوی بینەرەوە.
لێرەوە ئیتر مرۆڤ پرس دەکات چۆن دەردەکەوم؟ لەبری ئەوەی بپرسێت: چیم؟ چی دەکەم؟ دەتوانم چی بم و چی بەرهەم بهێنم؟.
شیکارییەکی گەورەی دەروونی ساڵی ٢٠١٨ Met-analysis کە لە ٥٠ لێکۆڵینەوەی سەربەخۆ پێکهاتبوو، پەیوەندییەکی ئەرێنی لە نێوان بەرکەوتن بە میدیای سێکسی کراو و خۆبەشتکردندا دۆزییەوە .
هەروەها شیکارییەکی نوێتری ٦٨ لێکۆڵینەوەی پەیوەندییەکی گەورەی لە نێوان بەکارهێنانی سۆشیال میدیا و خۆبەشتکردندا دۆزییەوە.
لە هەمووی سەرنجدارتر شیکاریەکەی ساڵی ٢٠٢٤ کە لە لەسەر ٣٣,٠٨٦ هەرزەکار ئەنجام درا، پاش ٤٥ توێژینەوەی چڕ و پڕ سەلماندی کە پەیوەندییەکی بەهێز هەیە لە نێوان بینینی وێنە و ڤیدیۆی جەستەی جوان و سێکسی و خۆبەشتکردن و ناوخۆیکردنی ئایدیاڵە جوانکارییەکان و نیشانەکانی تێکچوونی خواردن.
#مۆدێل
#کچ
#کورد
