30/05/2026
गर्नेले चुपचाप गर्छ:
१. क्रिकेट खेलाडीले छक्का हान्छ । ब्याट आकाशतिर उचाल्छ र अव्यक्तलाई धन्यवाद दिन्छ । तर केही बोल्दैन । हल्ला त दर्शकले गर्छन् ।
२. फुटबल खेलाडीले गोल हान्छ । उसलाई अङ्गालो हाल्न गोल हान्न नसकेकाहरू हुर्रिएर आउँछन् । दर्शकदीर्घा जुरुक्क उठ्छ । ठूलो हल्ला हुन्छ । तर खेलाडी मौन बस्छ ।
३. एउटा वैज्ञानिकले वर्षौँको अनुसन्धानपछि कुनै सूत्र पत्ता लगाउँछ । घोषणा संसारले गर्छ । पत्रिकाले शीर्षक बनाउँछन् । तर वैज्ञानिक भने चुपचाप अर्को प्रयोगतिर व्यस्त भइसकेको हुन्छ ।
४. एउटा सर्जनले कठिन शल्यक्रिया सफल बनाउँछ ।
आफन्तहरू खुशी हुँदै भगवानलाई धन्यवाद दिन्छन् ।
तर सर्जन भने हात धुँदै अर्को बिरामीको सेवामा लागिसकेको हुन्छ ।
५. किसानले बाली भित्र्याउँछ । बजार बोल्छ— “यो वर्ष उत्पादन राम्रो भयो ।” देश उत्सवमय हुन्छ ।
तर किसान भने आकाशतर्फ हेर्दै अर्को मौसमको प्रतीक्षा गर्न थालिसकेको हुन्छ ।
६. कविले एउटा अमर कविता लेख्छ । पाठक ताली बजाउँछन् । समालोचक अर्थ खोज्न् थाल्छन् ।
तर कवि एकान्तमा अर्को पङ्क्तिसँग मौन लडिरहेको हुन्छ ।
७. सङ्गीतकारले अपूर्व धून निकाल्छ । श्रोता / दर्शकहरू “once more” भन्दै चिच्याउँछन् ।
तर सङ्गीतकारका आँखा बन्द हुन्छन् । मानौँ ऊ कुनै नसुनिएको स्वर सुनिरहेको छ ।
८. शिक्षकले एउटा विद्यार्थीको जीवन मोडिदिन्छ । विद्यार्थी सफल भएर संसारभर बोल्न थाल्छ ।
तर शिक्षक चुपचाप अर्को शिष्य तयार गर्नमा व्यस्त हुन्छ ।
९. सिपाही सीमामा लड्छ । मुलुक राष्ट्रवादी नाराले गुञ्जायमान हुन्छ । नेताहरू मञ्चमा भाषण गर्न थाल्छन् । तर गुमनाम सिपाही दुर्गम मुकाममा मौन पहरा दिइरहेको हुन्छ ।
१०. एउटी आमा होनहार पुत्री/पुत्रलाई जन्म दिन्छिन् । उनी अनेकौँ रात जागा बसेर सन्तालाई हुर्काउछिन् ।
हुर्केपछि असल सन्तानले नाम कमाउँछ । समाजले पुरस्कार र सम्मान दिन्छ । तर आमा भने चुपचाप भान्सामा खाना पकाउनमा व्यस्त हुन्छिन् ।
११. इन्जिनियरले बाटो, पुल, पानीट्याङ्की, सुरुङ, नहर भवन आदिको डिजाइन गर्छ । योजना निर्माण गर्छ । फिल्डमा खटिएर दिन, रात, जाडो, गर्मी र भोक प्यास नभनी अविरल काम गर्छ । तर पनि ढिलासुस्ती र नराम्रो काम भन्दै गाली पनि खान्छ । तर जब काम सकिएर उसको प्रशंसा हुन थाल्छ (यदाकदा ), त्यो सुन्नका लागि ऊ त्यहाँ हुँदैन । अन्यत्र कतै अर्को काममा पुगिसकेको हुन्छ ।
