17/12/2025
प्रधानमन्त्री सुशीला कार्कीले निर्वाचनबाट अभिव्यक्त हुने नयाँ
जनभावनाअनुसारको सरकारलाई शक्ति हस्तान्तरण गर्न आफू पूर्ण रूपमा प्रतिबद्ध रहेको बताउनुभएको छ ।
ललितपुर महानगरपालिकाको १०७औँ स्थापना दिवसका अवसरमा आज आयोजित कार्यक्रममा बोल्दै उहाँले फागुन २१ गतेका लागि तय गरिएको निर्वाचनलाई निर्धारित समयमै सम्पन्न गर्ने लक्ष्यसहित सरकार अहोरात्र सक्रिय रूपमा काम गरिरहेको जानकारी दिनुभयो ।
भदौ २३ र २४ गते सम्पन्न नवयुवाहरूको आन्दोलनपछि देशमा नयाँ राजनीतिक अवस्था सिर्जना भएको उल्लेख गर्दै प्रधानमन्त्री कार्कीले सुशासन र निर्वाचन नै सरकारका प्रमुख प्राथमिकता रहेको स्पष्ट पार्नुभयो ।
उहाँले समाजमा कुनै पनि प्रकारको अराजकता स्वीकार्य नहुने बताउँदै शान्ति भंग गर्ने, कानून हातमा लिने तथा आपराधिक गतिविधिमा संलग्न तत्वलाई नियन्त्रण गर्न सुरक्षा निकाय सक्षम र सतर्क रहेको बताउनुभयो । साथै, असामाजिक तत्वको प्रतिरोधमा समुदायको भूमिका पनि महत्वपूर्ण हुने भन्दै सबैलाई हातेमालो गर्न आह्वान गर्नुभयो ।
