05/09/2025
တိုက်ပွဲကြောင့် ပိတ်မိနေသည့် ကုန်စိမ်းများ ထားဝယ်သို့ လှေဖြင့်ကဲ့နေရ
Dawei Watch| စက်တင်ဘာ ၄
တိုက်ပွဲကြောင့် ပိတ်မိနေသည့် ရန်ကုန်-မော်လမြိုင်- ထားဝယ်သွား အမှတ် ၈ ပြည်ထောင်စုလမ်းမကြီး လမ်းပိုင်းပေါ်ရှိ ကုန်ကားများပေါ်မှာ ကုန်စိမ်းများကို လှေဖြင့် ထားဝယ်မြို့သို့ ကဲ့(ဖြည်းဖြည်းချင်းသယ်ယူ)နေရကြောင်း သိရသည်။
မွန်ပြည်နယ်ရေးမြို့မှတစ်ဆင့် ထားဝယ်ခရိုင်၊ ရေဖြူမြို့နယ် ကံပေါက်တိုက်နယ်သို့ သယ်ကြရပြီး ယင်းမှတစ်ဆင့် ထားဝယ်မြို့ သို့ အဆင့်ဆင့်သယ်ယူရကြောင်း ကုန်စိမ်းသည်အချို့ထံမှ သိရသည်။
စက်တင်ဘာလ ၃ ရက်နေ့က ထိုလမ်းကြောင်းအတိုင်း ကျပ်သိန်းငါးရာကျော်ခန့်တန်ဖိုးရှိ ကုန်စိမ်းများ ထားဝယ်မြို့ ကမ်းနားဈေးသို့ ရောက်ရှိလာကြောင်းဆိုသည်။
“ကုန်ကားနှစ်စီးစာ လှေနဲ့ရောက်လာတယ်။ တစ်စီးကို (ကျပ်) သိန်း ၂၅၀ လောက်တော့ရှိမယ်” ဟု ကမ်းနားလမ်းရှိ ဈေးသည်တစ်ဦးကပြောသည်။
ကြက်ဥမှလွဲပြီး ဂေါ်ဖီထုတ်၊ ခရမ်းချဉ်သီး၊ ခရမ်းသီး အစရှိသည့် ကုန်စိမ်းများရောက်လာခြင်းဖြစ်ပြီး အလုအယက်ဝယ်ယူကြသဖြင့် ခဏအတွင်း ကုန်သွားကြောင်းလည်း ၎င်းကဆိုသည်။
နောက်ထပ်လည်း ပိတ်မိနေသည့် ကုန်စိမ်းများကို ရေလမ်းမှ လှေဖြင့်သယ်ယူရန် အစီအစဉ်ရှိပြီး လာမည့်ရက်အပိုင်းအတွင်း ထားဝယ်မြို့သို့ ရောက်လာနိုင်ခြေရှိကြောင်းလည်း ကမ်းနားဈေးသည်အချို့ထံမှ သိရသည်။
တိုက်ပွဲကြောင့် ရန်ကုန်-ထားဝယ်လမ်းပိုင်း မလွှဲတောင်အနီးတွင် ကုန်ကားအပါအဝင် ခရီးသည်တင်ကားများ ဩဂုတ်လ ၁၄ ရက်ကတည်းက ပိတ်မိနေကြသည်။
ယင်းသို့ပိတ်မိနေကြသဖြင့် ထားဝယ်မြို့တွင် အခြေခံစားသောက်ကုန်များ ပြတ်လပ်ပြီး ဈေးအဆမတန်မြင့်တက်လျက်ရှိသည်။
ပုံစာ - ကုန်တင်နေသည့်စက်လှေတစ်စီး(ပုံဟောင်း)
