25/07/2026
Hari uwasavye ubusesanguzi ku kibazo c' ubwoko yipfuza kumenya uko cabayeho buriya iki kibazo c' ivy' ubuhutu n' ubututsi kiri mu karere ku bisanzwe gikora ku bigumbagumba (emotions) vy' abantu.
Hari ababa barabuze ababo mu miryango abandi barahohotewe muri kahise ntibige neza ntibaronke ubuzi kubera ubwo bwoko bamwe n' abandi biyitirira.
Ku rundi ruhande hari abatungishijwe n' ivy' ayo moko nyene iwabo vyabaye nka business bituma bamererwa neza baronka ubuzi bwiza n' icubahiro bagatunga bagatunganirwa abo uvuze nabi iyo nka yabahaye amata birumvikana ko bogutera amacumu.
Hari uyundi mugwi w' abafise umunoho w' ubutegetsi bakavyuririrako nk' ingazi ibashikana ku butegetsi bipfuza.
Leopord Sedhar Sengor niwe yavuze ko abirabure barangwa n' ibigumbagumba cane ntibarangwa n' ubwenge nk' abazungu (L' emotion est n***e tandis que la raison est hellene).
Umwanditsi Gustave Lebon nawe mu gitabu ciwe "La Psychologie de la Foule" arerekana ko abato (la masse) barangwa n' ibigumbagumba (l' emotion) kurusha ubwenge (la raison).
Niyo mpamvu uravye kuva muvya kahise ata kaboko k' abategetsi kabaye muri izo nryane ntizonabaho abategetsi babi babirema nk' uburyo bwo gusamaza abato (distraction de la masse) ngo ntibabazwe ivyo baba bajejwe mu kurema ubuzima bwiza bw' abo barongoye (le bien-être de la population) ku bato.
Yaba ibijanye n' indero (education),ibitaro,igwizwa ry' amahinguriro (industrialisation),amabarabara meza,umuyagankuba,umutekano,kugwanya ibiturire,...baca babasamaza ngo ntibiyumvire ivyo bibazo biba bibafitiye akamaro bakabajana mu bintu ata kamaro biba bifise ku buzima bwabo bakabateranya.
Abo bazungu baduteranije mu bukoroni bo uravye neza ntibafise amaso amwe,urukobwa rwabo ntirwera kumwe n' imishatsi yabo si imwe ariko bubakiye mu bumwe,umuntu arava no muri Espagne akaja kuba umutegetsi muri France,arava muri Autriche akaja kuba umutegetsi muri Allemagne ivyo nta kibazo bibateye ariko muri Afrika ntivyokunda.
Ivy' ayo moko none vyabayeho gute?
Uravye muri kazinduzi (dictionnaire) ijambo "ethnie" ubwoko risigura imigwi y' abantu itandukaniye ku bintu 2 ururimi (la langue) hamwe n' umuco (la culture) "gusa" ibitari ivyo ntivyitwa ubwoko.
Muri Kenya bafise ubwoko burenga 40 nta numwe afise ururimi rumwe ruhuye n' urw'uyundi hamwe n' umuco baca bahurira ku rurimi rw' igiswahili gusa n' icongereza nuko bashobora kwumvikana.
Umukenya akubajije ko iwanyu mufise ivy' ubwoko ukamubwira ko mutandukanira ku mazuru ko bamwe bafise manini abandi mato aca akubona nk' "umusazi" ntagutahura.
Ku bisanzwe bariya bavunamuheto (abakoroni) rero ico bubatse ni poritike yo "guteranya ngo uganze" (diviser pour regner).
Mbere bataraza ubwo bwoko ntibwabaho habaho imigwi (les classes sociales) y' abakene (les proletaires) n' abatunzi (les bourgeois) bishingiye kuco umuntu atunze.
Umuntu kugira yitwe "umututsi" yaba afise inka 10 n' izirenga ntivyari ibishingiye ku bihimba vy' imibiri amazuru abantu bavukanye.
Inyandiko y' Umuganwa Rugema Rwigemera yigeze kwandika kuri page yitwa "Alliance Monarchique du Burundi" irerekana ko hari abitwa abahutu uno munsi bitwa abatutsi ico gihe bo mu miryango y' abahanza n' abajiji kuko bari batunze inka nyinshi abo bitwa abatutsi kuko bari abatunzi.
Uno munsi n' uwudafise inkoko canke urukwavu mu rugo iwe wumva bamwita "umututsi".
Umuhutu nawe yaba ari umukozi w' uwifise.
Umwanditsi Hans Meyer yanditse igitabu "Die Barundi" (Les Barundis) ari mu baremye amacakubiri avuga uko abahutu ngo bateye uku ngo abatutsi bateye kuriya abantu basoma ivyo ivyiyumviro vyiwe iba intango y indyane ivyakweze n' ubwicanyi butandukanye 65,72,93,...
Uwahoze atwara Uburundi umuhisi J.B.Bagaza nawe mu kiganiro yigeze guha abamenyeshamakuru yavuze ko yigeze kwegeranya abahinga bo muri kaminuza ya Sorbone ngo bamwigire ikibazo c' ivy' ayo moko y' abahutu n' abatutsi bamubwiye ko ivyo bitokwitwa "ethnies" bo bavyise ama "categories".
Nubwo biri uko ico kibazo mu karere biraboneka ko cafashe iyindi mero (metamorphose) gihinduka abarimyi ( bantous) ngo bavuye Tchad ngo n' aborozi (les nilotiques) ngo bavuye Ethiopia bakurikira inka zabo.
Abitwa ba Ryckmans,Von Gotzen n' abandi bagiye bararema ivyo vyiyumviro maze bishinga imizi.
Nivyo navyo ni ibinyoma umu bantou ni umuntu avuga ururimi rurimwo ijambo -tu- ntibisigura umurimyi na gato.
Ibi bishobora gushira mu kaga Afrika yose kuko inryane z' abarimyi n' aborozi ziriyo no mu bice vya Mali,Senegal,Mauritanie,....bishobora gutuma haba ama blocs bamwe bakabona abandi ngo benewabo abandi ngo ni banyagupfa bagahangana rukaba urugamba runini rwagutse rutonahera Afrika yose ikaka umuriro.
Mu gusozera,umwe wese yokwirinda kujana n' ico gihuhusi cuzuza inda z' utugwi duto twa bamwe (les bourgeois) nimwame mukundana umwe wese yige uko yibeshaho yige umwuga abe n' umu entrepreneur ahe akazi mwenewabo ata bindi aravye atari ico ashoboye "competence" ntarabe ibihimba vy' imibiri maze twubake Afrika iteye imbere (une Afrique prospere) nkuko vyari mu ndoto y' umweranda Kwameh Nkrumah kandi ishingiye no ku bumwe kuko amacakubiri arema intege nke ntiyubaka arasenya.
2
