17/05/2025
Nimbiji minyamaaro yaku na mokia jaku, (indi uri gitonga), na nimbiji irumi bia baria baciitaga Ayahudi na tibo, tiga ni kiuthurano gia Shaitani.
Ugakira mantu kinya jariku jaria wengeerie kunyamarua najo; atiri uria muthuuku eengerie gwikia bamwe benu korokorone kenda bagerua; na bukoona thiina antu a ntuku ikumi. Nagwe karaga uri mwitikua mwanka gukua, nani ngakwa thiru ya mwoyo.
Uria uri na gutu nathikiire nteto iria Kirundu akwira makanisa. Atiri, uria ukoombana atikaringithua ni gikuu kia jairi.
Na muraika wa kanisa ya Perigamo mwandikire atiri: We uria uri na ruciu ruria ruugi nteere cio-ijiri auga atiri:
Nimbiji aria utwire, na kuu kuri ruriga rwa Shaitani'; nagwe nutwire ugwatiirite riitwa riakwa, na utakaana witikio bwakwa, kinya igiita riria Antipa aakuire ni untu bwa witikio buria aari nabu kirini, uria woragiirwe gatigati kenu aria Shaitani atuuraga.
Indi ndina mantu jamwe nkuguutirikia, indi ti jamaingi, nikwithirwa buri na aritani bamwe kuu baria bagwete uritani bwa Balaamu; uria waritanaga Balaki agiitaria aana ba Isiraeli kenda baria biakuria biria biaritagirwa ming'uanano, na ningi nikenda batua kuthungagiira.
Ningi gwe ou uri na antu bamwe baria batwire bagwete uritani bwa Anikolai.
Tontu buu irirange ntuti; na kethira tiu nkeeja ntuti ndue nabo na ruciu ruru ruri kanyua gakwa.
Uria uri na gutu nathikiire uria Kirundu akwira makanisa. Atiri, we uria ukoombana-ri, nkamwitikiiria arijage rwiga rwa mana ruria rwithi; na nkamwa iiga ririeru riria rikeethirwa riandiki riitwa ririeru, riria ritiijiwe ni muntu kinya uriku nonga uria ukaewa wenka.
Na muraika wa kanisa ya Thiatira mwandikire atiri: Uju niu Mutana wa-Murungu auga, tawe uria uri metho jakari ta rumuri rwa mwanki, na mikinya-nthi yawe yeenetie ta ithuruthia riria rithambitue mono, auga atiri:
Nimbiji kiao na wendani bwaku, na mathithio jaku ja kiao, na witikio bwaku na kuumiiria gwaku na miitire yaku; ninkumenya ati jaria uthithagia nandi ijakurukite jaria wathithagia mbere.
Indi untu buria
