12/05/2024
Falka lagula kacay ninkaan dhallinyarada ah ee caafimaad ahaan xanuunsanaa, xilli uu ka ambaday reerkiisa, waa fal ka baxsan bini'aaddanimada iyo Islaamnimada.
In dumar loo gacan galiyo, muuqaalkii la arkayna ay ka duubaan inta aysan dilin iyagoo leh "Ashahaado, labo rakco salaad ah duko, waa ku dileynaaye" waa damiir xumo iyo ihaano loo geystay marxuumka, ka hor inta uusan dhiman, waana ka wada xanuunsanay dhammaanteen, inteenna damiirka leh.
Waa fal basiin kusii shubaya dagaal beeleedyada ka jira Mudug, waana xujo hor taallo Maamulka iyo laamaha ammaanka Puntland, haddaan lasoo qaban dumarkaasna ay ka dhalan karto falal ka foolxun.
Soomaali waligeed ayey diriri jirtay, falka noocaan ahna waa mid ku cusub fagaaraha dagaallada sokeeye, kaas oo meesha ka saari kara ilaalin iyo dhowrista birimageedada ay ku jiraan carruurta, haweenka, dadka da'da ah iyo kuwa maskaxiyan xanuunsan.
Reerka uu ka baxay marxuumkan xanuunsanaa iyagana waa la gudboon in aysan ku dayan, oo ay ilaaliyaan birimageedada, dadku waa walaalo aan kala maarmin si kasta ay isku dilaan.
Cali Aadan Muumin
