23/07/2025
: Machadka Al-Irshaad ee ku yaalla degmada Dhoobley ayaa si rasmi ah u qabtay imtixaan gaar ah oo laga qaaday 9 arday oo dhameystay xifdiga Qur’aanka Kariimka, gaar ahaan 30-ka Juz. Imtixaankan ayaa qayb ka ah dadaallada machadku ku xoojinayo tayada xifdiga iyo fahamka ardayda baratay Quraanka.
Munaasabadda imtixaanka oo si weyn loo soo agaasimay ayaa waxaa ka qeyb galay macallimiin, Ardayda iyo culumada deegaanka ka tirsan iyo marti sharaf kale. Ardayda ayaa si toos ah loga qaaday imtixaan hortooda, iyagoo lagu eegayey saxnaanta, akhriska, iyo xifdiga buuxa ee Kitaabka Alle.
Maamulka Machadka Al-Irshaad ayaa sheegay in imtixaanka uu yahay mid lagu ogaanayo heerka ardaydu ka taaganyihiin xifdiga Qur’aanka, si markaa loogu diyaariyo shahaadooyin iyo kobcin hor leh oo dhinaca barashada diinta ah.
Waalidiinta iyo bulshada deegaanka ayaa si weyn u bogaadiyay dadaalka Machadka iyo guusha ay gaareen ardayda. Waxay sheegeen in barashada Qur’aanka ay tahay tiir muhiim u ah kobcinta Jiilka cusub ee Muslimiinta.
Machadka Al-Irshaad ayaa ka mid ah goobaha waxbarasho ee hormuudka ka ah fidinta cilmiga diinta Islaamka ee gobolka, gaar ahaan degmada Dhoobley, iyadoo sanad walba ay kasoo baxaan arday hufan oo kitaabka Alle ku xifdiyay xirfad iyo akhlaaq.
