18/05/2025
Laftagareen wuxuu qorsheynayaa in uu weeraro wasiir Xasan Eelaay oo Baydhabo ku sugan, shalay buu mar isku dayey se wali uma hagaagin sida uu wax u rabay. Xasan iyo Laftagareen dagaalkooda kan billaw uma aha, maamulka Laftagareen billawgiisa bey mar isku dhaceen, kolkaas arrintu maysan gaarin heer la isku qoryo qaato, xalkuna wuxuu ku soo dhammaaday in Xasan la raalligeliyey.
Hadda dagaalka Laftagareen wado wuxuu salka ku hayaa in Xasan qorsheystay u tartamida kursiga Laftagareen ku fadhiyo, taasi oo Laftagareen u arkay mid culeyska ku sii kordhinaysa.
Laftagareen wuxuu go'aan ka dhigtay qof waliba oo mucaarad ku ah ama uu ugu shakisan yahay damaca kursiga madaxweynenimo ee KG in uu dagaal la galo, waa tan keentay maanta guddoomiye Mursal in uusan Baydhabo ka deggi karin, sabab ka xiriirta musharraxnimadiisa.
Xasan wuxuu ka mid yahay siyaasiyiinta kaadiriinta ah oo billawgii dhismaha maamulka KG illaa iyo hadda saaxadda siyaasaddeed kaalintiisa ka qaata, isla Laftagareen buu gacan wayn u fidiyey waagiisii ay Farmaajo iyo Fahad KG xoog ku geynayeen.
Xasan maanta hoygiisa Baydhabo waxaa buuxa sakaariil, askar, odayaal, dhallinyaro iyo cid waliba oo tabasho ka ah maamulka qoyseed ee Baydhabo ka jira.
Dib-u-doorashadii Mw. Xasan waxay filashadu ahayd in isbeddel maamul ka dhaco KG si bulshadu ay u nafisto maaddaama uu Laftagareen xarrig iyo caburin isugu daray qof waliba oo ka aragti duwanaada, taas oo keentay in bulshadii ay karahsatay maamul qoysaadka Laftagareen.
Dagaalka Xasan iyo Laftagareen hadda waxaa ku dhax jira Gud. Aadan Madoobe oo isku dayaya in uu kala dhaxdhaxaadiyo, si aysan u dhicin khasaaro naf iyo maalba leh.
Waxaan codkayga ku biirinayaa in garab iyo gaashaan loo noqdo wasiir Xasan Eelaay, Laftagareen iyo maamulkiisa qoyseedna runta loo sheego, dulmiga iyo caburinta uu shacabka iyo waxgarata ku hayana wax laga qabto, lana dardargeliyo sidii uu u dhici lahaa isbeddel maamul.
Koonfurgalbeed intaan ka badan ma xamili karto kaligiitaliye maamulkii ka dhigay mid qoyseed.
