https://www.facebook.com/847831348592115/

Таттыбү Назаркулова, Кыргызстан, Bishkek (2025)

18/08/2025

ТЕРЕЗЕДЕН КАРАГАН ЭКИ АДАМ

Ооруканада бир палатада эки оорулуу жатат экен. Экөөнүн тең көзү жакшы көрбөй калган.

Бир күнү бирөөсү терезеге жакын коюлган керебетке которулду да, сырттагы көрүнүп турган көз ирмемдери менен бөлүшүп, сүйүнүп айтып берчү болду:

— Карачы, күн чыгыптыр, бак-дарактардын жалбырактары кызыл, сары түскө боелуп, көл жээгинде оюндун кызыгына баткан балдар, куштар сайрап жатат. Дүйнө керемет экен!

Экинчи бейтап болсо ушунун баарын угуп, көңүлү көтөрүлүп калчу эле.

Күндөрдүн биринде терезеге жакын адам көз жумду. Аны башка бөлмөгө алып кетишкенде, жалгыз калган бейтап медайымдан сурады:

— Мени ошол керебетке которуп койчу. Дүйнөнү мен да көрөйүнчү.

Аны которушканда терезени ачып караса, сыртта эч нерсе жок экен – жалаң боз дубал менен эски короо гана көрүнүп турду.

Ал таң калып сурады:
— Мурда жанымда жаткан бейтап кооз бактар, көл, асман жөнүндө айтып берчү эле?

Медайым жылмайып жооп берди:
— Ал өзү да эч нерсени көрчү эмес. Бирок сенин үмүтүң өчпөсүн деп, дүйнөнү кооз кылып сүрөттөп айтып берчү.

****
Дүйнө бир эле. Бирок аны кантип көрүү – биздин тандообуз. Кимдир бирөө боз дубалды гана көрөт, кимдир бирөө ошол дубалдын ары жагындагы жарыкты элестетет.

Дүйнөнү өзгөртүүгө аракет кылуу кыйын болушу мүмкүн, бирок аны кандай көрөрүбүз – өз тандообуз. Бул тандоо – жүрөк, аң-сезим жана чечим аркылуу жасалат. Ар бир күнүңдө позитивди танда, дүйнөнү жарык кыл!

Боз дубалдын артында жарык бар экенин билген адам гана чыныгы бакытты таап, жашоону ырахат менен өткөрөт.

12/08/2025

«АЛТЫН САРАЙ ДА АЗДЫК КЫЛГАНДА…»

Бир убакта бай киши жашаптыр. Анын байлыгы чексиз, малы көп, жери кең экен. Бирок бир гана нерсе тынчтык берчү эмес — аялынын тынымсыз нааразы болгон сөздөрү.

Аялы күн сайын:
— Үйүбүз кичине… кийимим эски… тамагыбыз жөнөкөй… — деп арыздана берчү.

Бай канчалык жакшы тамак-аш, кооз кийим бербесин, аялдын көңүлү ток болбойт. Акыры бир күнү бай чечим чыгарып:
— Мейли, сага алтындан сарай курам! — дейт.

Көп убакыт өтүп, сарай бүтөт. Алтын дубалдар күнгө жаркырап, эшик-терезеси кооз жасалгаланган. Короо гүлгө толуп, ичи жыпар жыттуу. Бай аялына сыймыктануу менен:
— Мына, эми сен дүйнөдөгү эң кооз жана эң кымбат үйдө жашайсың! — дейт.

Аялы үйдү айланып көрүп чыгат да, жүзүн буркулдатып:
— Жок… Бул деле мен каалагандай эмес, — деп жооп берет.

Ошондо бай түшүнөт: жүрөгү ач адамга дүйнөдөгү эң чоң байлык да жетпейт.

Ыраазы болбогон жанды эч нерсе бактылуу кыла албайт. Ал эми жүрөгү ток адам эң жөнөкөй шартта да бакыт табат. Адамдын көңүлү ток болбосо, дүйнөдөгү эң чоң байлык да аны бактылуу кыла албайт. Жүрөгү ач адамга – алтын сарай да аздык кылат.

Автор: Таттыбү Назаркулова

05/08/2025

АДАМДЫН САГА КАНЧАЛЫК КЫМБАТ ЭКЕНИН АНЫКТАГАН 7 БЕЛГИ:

СЕНИ УНУТПАЙ ЭСТЕП ТУРСА

— Шылтоо издебей кабар алат. Жөн эле салам айтса да, көңүл коюп сүйлөшөт.

КЫЙЫН КҮНДӨ ЖАНЫҢДА БОЛСО

— Күлкүңдү бөлүшкөн эмес, кайгыңда жаныңда тике туруп колдогон адам баалуу болот.

СЕН ЖОКТО БАШКАЛАРГА СЕНИН МЫКТЫ ТАРАБЫҢДЫ АЙТСА

— Артыңдан сен жөнүндө жакшы сөз айтып жүрсө, ал сени чын дилден баалап жүрөт деген сөз.

СЕНДЕН ЭЧ ПАЙДА КҮТПӨЙ ЖАКШЫЛЫК КЫЛСА

— Мындай мамиле чыныгы адамдын кымбат сапатын билдирет.

ЖАШЫРЫП ЭМЕС, АЙКЫН СҮЙЛӨСӨ

— Жан дүйнөсүн жаап-жашырбай, чынчыл сүйлөгөн адам сенин жан дүйнөңдү да урматтагандыгы.

СЕНИН ЖЕТИШКЕНДИГИҢЕ (КӨРӨ АЛБАСА ЭМЕС) СҮЙҮНСӨ

— Сүйүнүчүңө кошо сүйүнгөн адам – жүрөгү таза, кымбат адам.

СЕНИ ӨЗГӨРТҮҮНҮ КААЛАБАСТАН, КАНДАЙ БОЛСОҢ ОШОНДОЙ КАБЫЛ АЛСА

Сен ким болсоң, ошол калыбыңда жакшы көрсө – мына ошол эң баалуу адам.

Адамды ар ким эле баалай бербейт. Аны убакыт көрсөтөт.
Анан адамдын чын эле кымбат экендигин жүрөгү таза, акыл-эси жетик гана адам көрө алат.

Автор: Таттыбү Назаркулова

#адамдыксапат #ыйман #баалуулук #адамкымбаты #ишеним #жакшылык #жүрөгүтазаинсан

01/08/2025

ГҮЛ САЛЫНГАН ИДИШ 🌺

Бир аял базардан сынык идиш сатып алды. Күндөн-күнгө ал идиштен суу жарым жолдон эле тамчылап отуруп калбай калчу.

Бирок аял күнүгө суу алып келээрде, дал ошол идишти колдончу. Башка идиште суу толук алып келинсе, бул идиш жолдун жарымына чейин гана жеткиче суу сактайт эле.

Бир күнү идиш аялдан уялып:

— Мен эч нерсеге жарабайм, мени таштачы... — дейт.

Аял жылмайып жооп берет:

— Сен жарым идиш суу гана көтөрүп келсең да, сенин аркаңдан жолдо гүлдөр өсөт. Сенден тамчылаган суу ошол гүлдөрдү сугарат. Ошол гүлдөрдү күндө терип базарга алып барам. Сен мага пайда алып келип жатасың! деген экен.

Кээде өзүбүздү эч нерсеге “жараксыз”, “сынык”, жан дүйнөбүзгө бир нерсе “жетишпегендигин” сезген учурлар болот. Бирок Жараткан ар бир жанды – кемчилиги менен да – өзүнчө максаты менен да жараткан.

Биздин жетишсиз деп ойлогон жактарыбыз, чындыгында бирөөгө жардам, жакшылык, шык бериши мүмкүн.

Сиз дагы, сиздин жолуңуз дагы — башкалардын гүлдөшүнө себеп болушу мүмкүн.

"Ар бир жан – өзүнүн наркы менен баалуу. Сенин жүрөгүң – кимдир бирөөнүн үмүтү болушу мүмкүн."

"Сенин ойлобогон жерден кылган жакшылыгың, бирөөнүн жашоосун гүлдөтүп коюшу мүмкүн."

Таттыбү Назаркулова

31/07/2025

КӨРӨ АЛБАС КОҢШУ!

Бир күнү бай дыйкан өз багынан эң таттуу алма терип, коңшусуна белек кылып барды.

Бирок коңшусу буга таң калып:

— Эмне үчүн мага белек берип жатасың? Сен билесиң го, мен сени жакшы көрбөйм, — деп какшыктады.

Бай дыйкан жылмайып жооп берди:

— Ар ким өзүндө эмне бар болсо, ошону берет. Сенде ачуу сөз болсо, менде таттуу алма бар, деген экен.

Көрө албас коңшу — ал сенин бактыңдан күйбөйт, өз ичинен күйөт.

Сен үй салсаң, ал дубалыңды санайт. Машине алсаң, моторуңдун үнүн угат. Жакшы жашасаң, кайдан акчаларды таап жатат деп, жаман ойлонот.

Көрө албастык жүрөктү караңгылатат. Бирок ак көңүл адам андайлардын жүрөгүнө да жарыгын чачат. Ошондуктан башканын жарыгына карап караңгылашпа, өз жарыгыңды жандыр!

Таттыбү Назаркулова

30/07/2025

ӨЗҮҢДҮ БААЛАСАҢ – БАШКАЛАР ДА СЫЙЛАЙТ.

Бир күндөрү жаш бала чабан атасына келип мындай дейт:

— Ата, айылдагы балдар мени шылдыңдайт. "Сен кой кайтарып эле жүрөсүң!" дешет. Мен уялам, өзүмдү кемсингендей сезем...

Атасы бир мүнөт ойлонуп, уулунун ийинине колун коюп айтат:

— Балам, мен сага бир нерсени көрсөтөйүн.

Алар тоого чыгышат. Атасы уулуна бир түймө берип:

— Бул түймөнү базарга алып бар да, канча акча беришет, сура. Бирок сатпа! — дейт.

Бала базарга барып, ар кимге көрсөтөт. Кимдир бирөө 1 сом, экинчиси 10 сом берет. Кечинде бала келип айтат:

— Ата, эң көп дегенде 10 сомго баалашты.

Атасы күлүмсүрөп жооп берет:

— Эми ошол эле түймөнү зергерге алып бар.

Бала зергерге барат. Зергер түймөнү көрүп таң калат:

— Бул кымбат баалуу таштан жасалган. Мындан жогорку баага татыктуу, 5000 сомго берем десең, азыр эле алайын! — дейт.

Бала таң калып үйүнө келет. Атасы ага карап:

— Көрдүңбү, балам… Сени ким баалайт – ошол маанилүү. Эгер өзүңдү кой катары көрүп, өзүңдү кем сезсең, сен ошол бойдон каласың. Өзүңдү бааласаң – башкалар да сыйлайт.
Мейли ким эмнени айтпасын, өзүнүн наркын билген адам эч качан жоголбойт.

Автор: Таттыбү Назаркулова

30/07/2025

“АТАНЫН АКЫРКЫ ОСУЯТЫ”

Бир карыя атанын үч уулу болгон. Ал өлүм алдында жатып уулдарын чакырып мындай дейт:

— Балдарым, мен бул дүйнөдөн кете электе силерге үч осуят калтырам. Эгер ушул үчөөнү турмушуңарда кармасаңар, бактылуу болосуңар.

Уулдары тынчсызданып:

— Айтыңыз, ата, укканга даярбыз, — дешет.

Карыя жай сүйлөп осуятын айтат:

“Ачууң келгенде сүйлөбө” – анткени ал сөз эртең өз жүрөгүңдү күйгүзөт.

“Башка адамдын оокатына кызыкпа” – анткени ал сенин ырыскыңды үзөт.

“Эмгекти ыйык тут” – анткени эмгек бар жерде жыргал жашоо бар.

Атасы бул осуятты айтып, ошол түнү дүйнөдөн өтөт. Убакыт өтөт… Уулдарынын ичинен улуусу гана ошол осуяттарды жүрөгүнө түйүп жашайт. Ал жакыр турмуштан көтөрүлүп, үй-бүлөсүн багып, эл арасында кадырлуу адам болот.

Калгандары болсо ата сөзүн унутуп, ачуу менен чырдап, кумарга берилет, кыйналып жашашат.

Бир күнү алар агасына келип:

— Биздин жашообуз неге мындай оор болду экен? — дешет.

Агасы жымжырт жооп берет:

— Себеби силер атабыздын сөзүн кулак менен уккансыңар, жүрөк менен эмес...

Таттыбү Назаркулова

30/07/2025

«ТИЛДИ ТИКЕН КЫЛБА – ӨЗҮҢӨ САЙЫЛАТ»

Бир күнү бир жигит айылындагы улук киши менен кайым айтышып кетет. Ачууланган бойдон, жигит улук кишиге орой, катуу сөздөрдү айтып, аны капа кылат. Анан кетип калат.
Эртеси күнү ал жигиттин ачуусу таркап, жүрөгү кысылып, өзүнүн айткан сөздөрүнө өкүнүп, кечирим сурамак болуп кайра ошол аксакалга келет.

Аксакал аны жылмайып тосуп алып, мындай дейт:

— Кечирим сурооң жакшы, бирок айткан сөз жоголбойт. Муну сага көрсөтүп коёюн.

Аксакал үйүнөн бир жаздыкты алып чыгып:

— Бул жаздыкты тилип, ичиндеги мамыктын баарын шамалга чач! — дейт.

Жигит айткандай кылат. Мамык шамалга тарап кетет.

Ошондо аксакал:

— Эми ошол чачкан мамыктын бардыгын кайра терип келип, ушул жаздыка салып кой! — дейт.

Жигит таң калып:

— Бул мүмкүн эмес! Мамыктар ар кайсы жакка учуп кетти го! — дейт.

Аксакал башын ийкеп:

— Дал ошол сыяктуу эле, оозуңдан чыккан катуу, орой сөздөр да шамалга чачылган мамык сыяктуу — аны артка кайтарып алуу мүмкүн эмес. Ошондуктан адам оозунан чыккан сөздү ойлонуп сүйлөшү керек! — дептир.
Таттыбү Назаркулова

29/06/2025

Сельсаяктардын ичинде өтө жогорку билимдүү, ар тармактуу кесиптин адистери бар. Сүрөтчүлөр, бывший военныйлар, врачтар, профессорлор бар. Бул долбоор БИШКЕКТЕ да иштесе жакшы болоор эле. Жеңишбек Токторбаев ОШ ШААРЫ #сельсаяктар #Ош #бишкек #Кыргызстан #рек

27/06/2025

ТАЗА АБАДА, ТУУРА ТАМАКТАНУУДА ӨМҮР УЗАРАТ! АЙЫЛДЫН КЕРЕМЕТИ❤️. #тазааба #экологияжизни #айыл #тууратамактануу #рекомендации

28/04/2025

Сүйүнбек Касмамбетов: Садыр Жапаров бекеринен өзүнүн мамлекет башчысы катары эӊ алгачкы кадамын “Инсандын руханий-адеп-ахлактык өнүгүүсү жана дене тарбиясы жөнүндө” жарлыгын кабыл алуудан баштаган жок. Ал киши дүйнөлүк тендециянын, анын ичинде кыргыз коомчулугунун канчалык деӊгээлде деградацияга учурап жатканын астыртан баамдаган чыгар.

Өөдүк-сөөдүк сүйлөнгөндөн башкага жарабаган, эзели кургак сөз менен куру убададан арылбаган, өз алдынча акыл тегерете албаган, күнүмдүк жашоодо чабал адамдар менен өнүккөн өлкөнү куруу мүмкүн эмес. Кыргызстандын бакубат келечеги – дени сак, акылы тунук, ак-караны ажырата билген, ар-намыстуу жана кайраттуу жарандардын колунда.
Жапаров Садыр Сүйүнбек Касмамбетов

15/04/2025

" Энесинин мээри өткөн балага эгесинин көөнү өтөт, Атасынын мээри өткөн кызга, Алланын каары өтөт" -- деген мүчөлүү макал бар.

Балага карата кыйын айтылса, кыз үчүн кыйыр айтылган кески сөз.

Тарбия-таалимге карата шилтей айтылган кыргыздын медир кеби- деп дагы түшүнсөк болот.

Нарк кабарында, баланы артыкча сүйүүнүн чеги да болот экен,
Ашыкча мээримге, Алланын кеги да болот экен, делет.

Атанын айтканы ДЕМ, Апаныкы ЭМ болсо, МАНАСТА айткандай --- ...Айың менен күнүңдүн, БИР ӨЗҮНӨН бүткөндөй, Асман менен жериңдин ТИРӨӨЧҮНӨН бүткөндөй --- деген мүнөздөмөнүн тик түшкөнүн караңыз.

Балаң, жети жашка чыккыча падышага кылган мамилени жаса, ЖАТЫП ОЙНОГОН ТӨШӨГҮ БОЛ, МИНИП ОЙНОГОН ЭШЕГИ БОЛ, ыргытам десе ТАШЫ болуп бер, чыгамын десе ШАТЫ болуп бер, ойно, жетеле, оюу менен бол...

Жетиден он төрт жашка чыккыча кулга кылган мамилени жаса, отун жарсын, күл чыгарсын, эшик ачсын,суу куйсун,ат алсын, мал кайрысын,бөрү тоют болуп чоңойсун! тынбасын,чарчасын, чаалыксын.

Он беш жашка келгенде башкача ЖОСУН кыл!,Оң- солду аралаганда ДОСУҢ кыл!

Кеңешип иш кыл, кебин ук, билсең да, билбесең да сура,үзөңгүлөш бастыр,топко аралашсын.

Баланы, эс алуучу жондон көрбөй, из салуучу жолдон көрөлү!...

Жол салбай, кол салып, коога күчөп жаткан заманда Салтыңы ҮЗБӨЙ жандаган, камчыны БҮКТӨЙ кармаган, БАШЫНДА ТҮГҮ, ЖҮЗҮНДӨ СҮРҮ бар ! дарбедес дармандуу, кагелес канжарлуу, эл жеринин ЭРТЕҢИ ҮЧҮН, БҮГҮН ЖАНЫН КЫЙГАНГА ДАЯР, Нарк сүйгөн, салт билген,тирикарак балдарды эрезеге жеткирели...

Дүйнөдөгү миң элдин, БИРИНИН ТИЛИНЕ которулбаган КЫРГЫЗ ЭНЕНИН ЭРКЕЛЕТКЕНИН дагы бир ирет эсиңерге салып өтөйүн :

-- Алдыңа гана кетейин...

-- Садагаң гана болойун...

--- Ананайын берекем...

--- мээнетиңди алайын..

--- балакетиңди алайын.

--- каражаным го...

--- каралдым менин..

КР Мамлекеттик катчысы Сүйүнбек Касмамбетов, Нарк куржун 2024📚...

Кыргыз Мурасы

Таттыбү Назаркулова

18/08/2025

12/08/2025

05/08/2025

01/08/2025

31/07/2025

30/07/2025

30/07/2025

30/07/2025

29/06/2025

27/06/2025

28/04/2025

15/04/2025

Address

Website

Alerts

Contact The Business

Shortcuts

Share

Category