16/08/2025
អ្នកស្រាវជ្រាវប្រវត្តិសាស្ត្រ ប្រាប់ពីយុទ្ធសាស្ត្រការពារខ្លួន ក្រោយឃើញកងទ័ពថៃដកថយពីទីតាំងរាយបន្លាលួសដោយស្ងាត់ៗ
(ភ្នំពេញ) អ្នកស្រាវជ្រាវប្រវត្តិសាស្ត្រលោកបណ្ឌិត អុិន សុផល បានប្រាប់ពីយុទ្ធសាស្ត្រការពារខ្លួន ក្រោយឃើញកងទ័ពថៃដកថយពីទីតាំងរាយបន្លាលួសនៅតំបន់បុស្សស្បូវ ជាំតែ ផ្ទះតាម៉ុក ដោយស្ងាត់ៗ។ លោកបណ្ឌិត អុិន សុផល បានរំលឹក និងប្រាប់ពីយុទ្ធសាស្ត្រមួយចំនួន ដើម្បីដាស់ស្មារតីយុទ្ធជនជួរមុខ និងប្រជាពលរដ្ឋកម្ពុជាឲ្យចេះប្រុងប្រយ័ត្នដូចខាងក្រោម៖
នៅពេលឃើញថៃដកកងទ័ពថយដោយស្ងប់ស្ងាត់ ធ្វើឱ្យចិត្តខ្ញុំកាន់តែមិនស្ងប់ ! មិនបំភ័យទេ គ្រាន់តែធ្លាប់ស្រាវជ្រាវ និងសរសេរសៀវភៅ “កម្ពុជា ក្នុងសង្គ្រាមវៀតណាម” យល់ដឹងពីយុទ្ធសាស្ត្រយោធាខ្លះៗ !
១.ឃើញកងទ័ពថៃដកចេញពីតំបន់គ្រប់គ្រងដោយស្ងប់ស្ងាត់ នឹកដល់សមរភូមិចេនឡាទី២ ឆ្នាំ១៩៧២ កងទ័ពវៀតកុងបានបង្ហាញភាពចុះខ្សោយរបស់ខ្លួន ដកថយពីសមរភូមិប្រយុទ្ធជាបន្តបន្ទាប់។ ពេលនោះកងទ័ពលោក លន់ នល់ មានមោទនភាពយ៉ាងខ្លាំងពីជ័យជម្នះរបស់ពួកគេ ព្រមទាំងមានពិធីជប់លៀងអបអរសាទរថែមទៀត ។
២.នៅពេលកងទ័ព លន់ នល់ កំពុងសប្បាយភ្លេចខ្លួន កងទ័ពវៀតកុងវិលវិញ ដូចទឹកបាក់ទំនប់ ធ្វើឱ្យកងទ័ព នល់ នល់ មិនអាចស្រោចស្រង់បាន ។
៣.ការលើកឡើងនេះ ពុំមែនបំភិតបំភ័យអ្វីនោះទេ គ្រាន់តែជួយរំលឹកដាស់ស្មារតី យុទ្ធជនជួរមុខរបស់យើងឱ្យមានការប្រុងប្រយ័ត្នប៉ុណ្ណោះ ! ចោរសៀមល្បិចកលពិសពុលណាស់ ដូច្នេះកុំធ្វេសប្រហែសឱ្យសោះ !
៤.លុះត្រាកងទ័ពសៀម ដកថយទាំងកម្លាំងប្រយុទ្ធ រថក្រោះ កាំភ្លើងធំ ឱ្យស្ថិតនៅក្នុងស្ថានភាពដូចដើមវិញ ទើបអាចទុកចិត្តបាន ។ បើនៅតែកំដៅម៉ាស៊ីន រថក្រោះជាប់រហូតបែបនេះ តើឱ្យទុកចិត្តដោយរបៀបណា?
៥. សូមប្រយ័ត្នវាដាក់មីនថ្មីនៅតំបន់ដែលវាធ្លាប់គ្រប់គ្រង ដើម្បីសងសឹក ! ជាពិសេសនៅក្នុងលាណដ្ឋាន ត្រូវពិនិត្យមីនឱ្យបានច្បាស់មុននឹងចូល ! ឬក៏វាអាចបង្កប់ GPS នៅគ្រប់លាណដ្ឋាន ឬទីតាំងសំខាន់ៗរបស់កងទ័ព បើសង្គ្រាមផ្ទុះឡើងវាបានកំណត់គោលដៅច្បាស់ណាស់ !
" សុខចិត្តសង្ស័យខុស ! ប្រសើរជាងជឿជាក់ខុស !"
បំណងល្អពីរាជធានីភ្នំពេញ ១៥ សីហា ២០២៥ !
គួរបញ្ជាក់ថា នៅព្រឹកថ្ងៃទី១៥ សីហា នេះ វីរៈកងទ័ពកម្ពុជាដែលកំពុងឈរជើងនៅបុស្សស្បូវ ជាំតែ បាននាំគ្នារុះរើបន្លាលួស នឹងដកទម្លាក់ទង់ជាតិថៃចេញ ក្រោយពីទាហានថៃទាំងនោះបានដកថយទៅវិញស្ងាត់ៗ បន្ទាប់ពួកគេបានដាក់ទង់ជាតិ និងព័ទ្ធពង្រាយបន្លាលួសកាលពីពីរថ្ងៃមុន។
